Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 61: Nangin Hari si David

Sugilanon 61: Nangin Hari si David

NAGTINGUHA liwat si Saul sa pagbihag kay David. Nagdala sia sing 3,000 sang iya labing maayo nga soldado kag ginpangita sia. Sang mahibal-an ini ni David, ginpangita niya ang gindulogan ni Saul kag sang iya tinao sang gab-i. Nian si David kag si Abisai, nga anak sang utod nga babae ni David nga si Sarvia, nagkadto didto.

Si David nga nagatawag kay Hari Saul

Si David kag si Abisai nagkamang sa dulogan ni Saul samtang nagakatulog ang tanan. Ginkuha nila ang bangkaw ni Saul kag ang iya tibud sang tubig, nga yara sa tupad sang ulo ni Saul. Wala sing nakakita sa ila, kay nagakatulog sila tanan.

Tan-awa karon si David kag si Abisai. Yadto sila sa ibabaw sang pukatod. Si David nagsinggit sa pangulo sang hangaway sang Israel: ‘Abner, ngaa wala mo ginaamligan ang hari? Toloka! Diin ang iya bangkaw kag ang iya tibud sang tubig?’

Nagmata si Saul kag nakilala niya ang tingog ni David. Namangkot sia: ‘Ikaw bala ina, David?’ Makita mo bala si Saul kag si Abner sa ubos?

‘Huo, ginuo ko nga hari,’ sabat ni David. Nian nagsiling sia: ‘Ngaa ginatinguhaan mo nga bihagon ako? Ano ang malain nga nahimu ko?’

Si Hari Saul kag si Abner

‘Nakasala ako,’ ginbaton ni Saul. Nian nagpauli si Saul. Apang nahadlok si David nga basi sa isa ka adlaw mapatay sia ni Saul. Gani nalagyo sia padulong sa duta sang mga Pilistinhon. Ginpapati niya ang mga Pilistinhon nga dampig na sia karon sa ila.

Sang ulihi, ang mga Pilistinhon nakig-away batok sa Israel. Sa inaway, napatay si Saul kag si Jonatan. Nagpasubo gid ini sing tuman kay David.

Sa tapos sini, nagbalik si David sa siudad sang Hebron. Ang iban nga mga tao luyag nga maghari ang anak ni Saul nga si Is-boset, samtang ang iban luyag kay David. Nag-inaway ang duha ka grupo, apang sang ulihi nagdaug ang tinao ni David. 30 ka tuig sia sang ginhimu sia nag hari. Naggahom sia sing pito ka tuig kag tunga sa Hebron. Ang pila ka anak nga nabun-ag sa iya didto amo sanday Amnon, Absalom kag Adonias.

Ang tion nag-abot sang ginbihag ni David kag sang iya tinao ang siudad sang Jerusalem. Si Joab, nga isa pa ka anak sang utod nga babae ni David nga si Sarvia, nanguna sa inaway. Ginpadyaan sia ni David paagi sa paghimu sa iya nga pangulo sang hangaway. Nagsugod karon sa paggahom si David sa siudad sang Jerusalem.

1 Samuel 26:1-25; 27:1-7; 31:1-6; 2 Samuel 1:26; 3:1-21; 5:1-10; 1 Cronica 11:1-9.



Mga Pamangkot:

  • Ano ang ginhimu ni David kag ni Abisai sang nagakatulog si Saul sa iya gindulogan?
  • Ano ang mga ginpamangkot ni David kay Saul?
  • Diin nagkadto si David pagkatapos niya ginbiyaan si Saul?
  • Ngaa ginsuboan gid si David?
  • Pila ang edad ni David sang ginhimu sia nga hari sa Hebron, kag sin-o ang pila sa iya mga anak nga lalaki?
  • Diin sang ulihi naggahom si David?

Dugang pa nga mga pamangkot

  • Basaha ang 1 Samuel 26:1-25.

    Ang ginsiling ni David nga nasulat sa 1 Samuel 26:11 nagapahayag sing ano nga panimuot sa teokratiko nga kahimusan? (Sal. 37:7; Roma 13:2)

    Kon indi pag-apresyahon ang aton hanuot nga panikasog sa pagpakita sing mahigugmaon nga kaayo, paano ang ginsiling ni David nga masapwan sa 1 Samuel 26:23 magabulig sa aton sa paghupot sing nagakaigo nga pagtamod? (1 Hari 8:32; Sal. 18:20)

  • Basaha ang 2 Samuel 1:26.

    Paano ang mga Cristiano karon makapalambo sing kaanggid nga ‘mainit nga gugma’ nga ginpakita ni David kag ni Jonatan? (1 Ped. 4:8; Col. 3:14; 1 Juan 4:12)

  • Basaha ang 2 Samuel 5:1-10.

    Pila ka tuig naghari si David, kag paano ginbahin ini nga panahon? (2 Sam. 5:4, 5)

    Sin-o ang ginpadunggan sa pagkadaku ni David, kag paano ini isa ka pahanumdom para sa aton karon? (2 Sam. 5:10; 1 Sam. 16:13; 1 Cor. 1:31; Fil. 4:13)

Magtuon sing Dugang Pa

Si David Wala Nahadlok

Basaha ining makawiwili nga istorya sa Biblia para mabal-an mo kon ngaa maisog si David.

Nangayo sing Hari ang mga Israelinhon

Sang nangayo sing hari ang mga Israelinhon, ginpili ni Jehova si Saul. Ngaa ginbuslan ni Jehova si Hari Saul kay David?