Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 59: Kon Ngaa Dapat Malagyo si David

Sugilanon 59: Kon Ngaa Dapat Malagyo si David

SANG mapatay ni David si Goliat, nahamuot gid si Saul sa iya. Ginhimu niya si David nga pangulo sang iya hangaway kag ginpapuyo sia sa balay sang Hari.

Sang ulihi, sang magbalik ang hangaway gikan sa pagpakig-away sa mga Pilistinhon, ginpadunggan sang mga babae si David sing labi kay Saul. Nahisa sa sini si Saul. Apang ang anak ni Saul nga si Jonatan wala mahisa. Ginahigugma gid niya si David, kag ginahigugma man ni David si Jonatan. Ang duha nanaad sa isa kag isa nga mag-abyanay sila tubtob san-o.

Si Hari Saul nga nagabangkaw si David

Si David maayo gid mag-arpa, kag si Saul naluyag mamati sa iya. Apang isa ka adlaw ang kahisa ni Saul nagpahimu sa iya sing malain gid nga butang. Samtang nagaarpa si David, ginbangkaw sia ni Saul. Apang nakalikday si David kag ang bangkaw wala makaigo. Sang ulihi wala liwat makaigo sing bangkaw si Saul kay David. Gani nakahibalo karon si David nga dapat gid sia maghalong.

Nadumdoman mo bala nga ang makapatay kay Goliat dapat mag-angkon sa anak ni Saul bilang asawa niya? Bueno, sang ulihi ginsilingan ni Saul si David nga maangkon niya ang iya anak nga si Micol, apang magpatay anay sia sing 100 sa kaaway nga mga Pilistinhon. Hunahonaa ina! Naglaum gid si Saul nga mapatay sang mga Pilistinhon si David. Apang wala nila mapatay, gani ginhatag ni Saul ang iya anak agod mangin asawa ni David.

Isa ka adlaw ginsugiran ni Saul si Jonatan kag ang tanan niya nga alagad nga luyag niya patyon si David. Apang si Jonatan nagsiling: ‘Dili paghimua ina. Si David wala gid sing ginhimu nga malain sa imo.’

Si David nga nagalikaw sa bangkaw

Gani nanaad si Saul nga indi paghalitan si David. Ginpabalik si David, kag sa liwat nag-alagad kay Saul sa iya balay. Apang, isa ka adlaw, ginbangkaw liwat ni Saul si David. Nakalikday si David kag wala maigo. Ikatlo ini nga tion! Nakahibalo si David nga dapat malagyo sia!

Sadtong gab-i nagkadto si David sa iya balay. Apang nagpadala si Saul sing mga tinao sa pagpatay sa iya. Nahibaloan ni Micol ang plano sang iya amay, kag ginbuligan niya si David sa pagpalagyo. Sa mga pito ka tuig, nanagu si David sa lainlain nga duog, agod nga indi sia makita ni Saul.

1 Samuel 18:1-30; 19:1-18.



Mga Pamangkot:

  • Ngaa nahisa si Saul kay David, apang paano tuhay ang anak ni Saul nga si Jonatan?
  • Ano ang natabu isa ka adlaw sang nagapatokar sing arpa si David para kay Saul?
  • Ano ang siling ni Saul nga dapat anay himuon ni David antes niya mapangasawa ang anak ni Saul nga si Micol apang ngaa ginsiling ini ni Saul?
  • Sang nagatokar sing arpa si David para kay Saul, ano ang natabu sa ikatlo nga tion, subong sang ginapakita sa laragway?
  • Ano ang ginhimu ni Micol agod maluas si David, kag pagkatapos sini ano ang ginhimu ni David sa pito ka tuig?

Dugang pa nga mga pamangkot

  • Basaha ang 1 Samuel 18:1-30.

    Paano ang indi mabungkag nga gugma ni Jonatan kay David nagalaragway sa paghigugmaanay sang “iban nga mga karnero” kag sang “diutay nga panong”? (1 Sam. 18:1; Juan 10:16; Luc. 12:32; Zac. 8:23)

    Bangod normal lamang nga si Jonatan ang dapat mangin manunubli ni Saul, paano ginapakita sang 1 Samuel 18:4 ang talalupangdon nga pagpasakop ni Jonatan sa isa nga ginpili nga mangin hari?

    Paano ginapakita sang halimbawa ni Saul nga ang kahisa mahimu magdul-ong sa daku nga sala, kag ano nga paandam ang ginahatag sini sa aton? (1 Sam. 18:7-9, 25; Sant. 3:14-16)

  • Basaha ang 1 Samuel 19:1-17.

    Paano gintaya ni Jonatan ang iya mismo kabuhi sang ginpamulong niya ang mga pulong nga nasulat sa 1 Samuel 19:4, 5? (1 Sam. 19:1, 6)