Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 57: Ginpili sang Dios si David

Sugilanon 57: Ginpili sang Dios si David
Ginluwas ni David ang kordero

MAKITA mo bala ang natabu? Ginluas sang bata ining kordero gikan sa oso. Kaunon kuntani sang oso ang kordero, apang ginluas ini sang bata. Kag nian ginpatay sang bata ang oso! Sa isa pa ka tion ginluas niya ang karnero gikan sa leon. Indi bala maisog sia nga bata? Nahibaloan mo bala kon sin-o sia?

Amo ini ang pamatan-on nga si David. Nagapuyo sia sa Betlehem. Lolo niya si Obed, nga anak ni Rut kag ni Boaz. Nadumdoman mo bala sila? Kag ang amay ni David amo si Jesse. Si David ang nagatatap sang mga karnero sang iya amay. Nabun-ag sia 10 ka tuig sa tapos mapili ni Jehova si Saul nga mangin hari.

Ang tion nag-abot sang si Jehova nagsiling kay Samuel: ‘Kuha ka sing pinasahi nga lana kag kadto ka sa balay ni Jesse sa Betlehem. Napilian ko ang isa sang iya mga anak nga mangin hari.’ Sang makita ni Samuel ang kamagulangan nga anak ni Jesse nga si Eliab, nagsiling sia sa iya kaugalingon: ‘Amo gid ini ang napilian ni Jehova.’ Apang si Jehova nagsiling sa iya: ‘Dili ka magtulok sa kon daw ano kataas kag kaambong sia. Indi sia ang napili ko nga mangin hari.’

Gani gintawag ni Jesse ang iya anak nga si Abinadab, apang indi sia ang napili ni Jehova. Nian gindala ni Jesse ang iya anak nga si Sama, apang indi man sia ang napili. Gindala ni Jesse kay Samuel ang pito niya ka anak, apang wala sing isa sa ila ang napilian ni Jehova.

Sang ulihi gindala nila si David, nga kamanghuran. Si Jehova nagsiling: ‘Amo ini sia. Ibubo ang lana sa iya.’ Gani ang tion maabot nga si David mangin hari sang Israel.

1 Samuel 17:34, 35; 16:1-13.



Mga Pamangkot:

  • Sin-o ang bata nga yara sa laragway, kag paano naton nahibaloan nga maisog sia?
  • Diin nagapuyo si David, kag sin-o ang iya amay kag lolo?
  • Ngaa ginpakadto ni Jehova si Samuel sa balay ni Jesse sa Betlehem?
  • Ano ang natabu sang gindala ni Jesse kay Samuel ang pito sa iya mga anak nga lalaki?
  • Sang gindala si David, ano ang ginsiling ni Jehova kay Samuel?

Dugang pa nga mga pamangkot

  • Basaha ang 1 Samuel 17:34, 35.

    Paano ginapadaku sini nga mga hitabu ang kaisog kag pagsandig ni David kay Jehova? (1 Sam. 17:37)

  • Basaha ang 1 Samuel 16:1-14.

    Paano ang pulong ni Jehova sa 1 Samuel 16:7 nagabulig sa aton nga indi magpasulabi kag likawan ang negatibo nga paghukom pasad sa nagua nga panagway? (Bin. 10:34, 35; 1 Tim. 2:4)

    Paano ginapakita sang halimbawa ni Saul nga kon kuhaon ni Jehova ang iya balaan nga espiritu gikan sa isa ka tao, ini nga pagkabakante mahimu sudlan sang malain nga espiritu, ukon sang sugyot sang kaugalingon nga maghimu sing malain? (1 Sam. 16:14; Mat. 12:43-45; Gal. 5:16)

Magtuon sing Dugang Pa

BIBLE CARD

Bible Card: David

Mahimo nga nahibaluan mo ang istorya nanday David kag Goliat, pero madamo ka pa sang mahibaluan parte kay David.