Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 56: Si Saul—Unang Hari sang Israel

Sugilanon 56: Si Saul—Unang Hari sang Israel
Ginahaplasan ni Samuel si Saul agod mangin hari

TAN-AWA si Samuel nga nagabubo sing lana sa ulo sang tao. Amo ini ang ila ginahimu sa pagpakita nga ang isa ka tao napili nga hari. Si Jehova ang nagsiling kay Samuel nga ibubo ang lana sa ulo ni Saul. Pinasahi ini mahumot nga lana.

Wala maghunahona si Saul nga sia bagay mangin hari. Naluyagan sia ni Jehova, bangod wala sia nagapahambog kag nagapaimportante. Gani ginpili niya sia nga mangin hari.

Apang si Saul naghalin sa isa ka manggaranon nga pamilya, kag tuman sia kaambong kag mataas. Madasig man sia magdalagan kag tuman kakusog. Nalipay ang kataohan nga ginpili ni Jehova si Saul nga mangin hari. Sila tanan nagsinggit: ‘Mabuhi ang hari!’

Ang mga kaaway sang Israel nagapanggamo gihapon. Sang mangin hari si Saul, ang Amonhon nagtaklad agod makig-away batok sa Israel, apang si Saul nagtipon sing daku nga hangaway kag ginlutos sila. Malipayon ang kataohan nga si Saul ang hari.

Samtang nagaligad ang tinuig, ginpangunahan ni Saul ang mga Israelinhon sa madamu nga kadalag-an. Si Saul may maisog man nga anak nga si Jonatan. Kag si Jonatan nagbulig sa Israel sa pagdaug sa madamung inaway. Isa ka adlaw linibo-libo ka Pilistinhon ang nagtaklad agod makig-away sa mga Israelinhon.

Ginsilingan ni Samuel si Saul nga maghulat tubtob nga mag-abot sia kag maghimu sing halad, ukon dulot kay Jehova. Apang naatrasar si Samuel, kag hinadlokan si Saul nga basi magsalakay ang mga Pilistinhon. Gani sia ang naghalad. Sang mag-abot si Samuel, ginsilingan niya si Saul nga nakalalis sia kag si Jehova magapili sing lain nga tao agod maghari sa Israel.

Sang ulihi naglalis liwat si Saul, gani si Samuel nagsiling sa iya: ‘Maayo pa ang pagtuman kay Jehova sang sa maayo nga dulot sa iya. Bangod nga ginlalis mo si Jehova, indi niya ikaw pagpadayunon subong hari sang Israel.’

Makita naton sa sini nga dapat naton pirme tumanon si Jehova. Aton man nakita nga ang isa ka maayong tao, subong ni Saul, mahimu magbalhin kag maglain. Dili gid naton luyag maglain, dili bala?

1 Samuel kapitulo 9 tubtob 11; 13:5-14; 14:47-52; 15:1-35; 2 Samuel 1:23.



Mga Pamangkot:

  • Sa laragway, ano ang ginahimu ni Samuel, kag ngaa?
  • Ngaa naluyagan ni Jehova si Saul, kag ano sia nga sahi sang tao?
  • Sin-o ang anak nga lalaki ni Saul, kag ano ang ginhimu niya?
  • Ngaa si Saul ang naghalad sa baylo nga hulaton si Samuel sa paghimu sini?
  • Ano nga mga leksion ang maton-an naton gikan sa rekord tuhoy kay Saul?

Dugang pa nga mga pamangkot

  • Basaha ang 1 Samuel 9:15-21 kag 10:17-27.

    Paano ang pagkamapainubuson ni Saul nagpugong sa iya sa paghimu sing padasudaso nga buhat sang naghambal ang pila ka lalaki sing di-matinahuron tuhoy sa iya? (1 Sam. 9:21; 10:21, 22, 27; Hulu. 17:27)

  • Basaha ang 1 Samuel 13:5-14.

    Ano ang sala nga nahimu ni Saul sa Gilgal? (1 Sam. 10:8; 13:8, 9, 13)

  • Basaha ang 1 Samuel 15:1-35.

    Ano ang mabug-at nga sala nga nahimu ni Saul may kaangtanan kay Agag, ang hari sang Amalek? (1 Sam. 15:2, 3, 8, 9, 22)

    Paano si Saul nagtinguha sa pagpakamatarong sang iya ginbuhat kag iban ang ginbasol? (1 Sam. 15:24)

    Ano nga paandam ang dapat naton pamatian karon kon ginalaygayan kita? (1 Sam. 15:19-21; Sal. 141:5; Hulu. 9:8, 9; 11:2)