Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 55: Ang Diutay nga Bata Nag-alagad sa Dios

Sugilanon 55: Ang Diutay nga Bata Nag-alagad sa Dios

INDI bala maambong ini nga bata? Si Samuel ang iya ngalan. Kag ang nagatakdung sang iya kamut sa ulo ni Samuel amo ang mataas nga saserdote sang Israel nga si Eli. Amo ina ang amay ni Samuel nga si Elkana kag ang iya iloy nga si Ana nga nagdul-ong kay Samuel kay Eli.

Nakilala ni Samuel si Eli

Si Samuel mga apat ukon lima ka tuig ang kagulangon. Apang magapuyo sia diri sa tabernakulo ni Jehova upod kay Eli kag sa iban pa nga saserdote. Ngaa ginhatag ni Elkana kag ni Ana ang subong ka bata ni Samuel sa pag-alagad kay Jehova sa tabernakulo? Tan-awon ta.

Pila lang ka tuig sa wala pa ini, tuman gid kasubo si Ana. Baw-as sia kag luyag gid magbata. Gani isa ka adlaw, nangamuyo sia sa tabernakulo: ‘O Jehova, kon hatagan mo ako sing anak, nagapanaad ako nga ihatag ko sia sa imo agod nga makaalagad sia sa imo sa bug-os niya nga kabuhi.’

Ginsabat ni Jehova ang pangamuyo ni Ana, kag wala magdugay nagbata sia kay Samuel. Ginhigugma gid ni Ana ang iya diutay, kag gintudloan niya sia tuhoy kay Jehova sang diutay pa sia ka tama. Nagsiling sia sa iya bana: ‘Kon malutas na si Samuel, dalhon ko sia sa tabernakulo agod mag-alagad kay Jehova didto.’

Amo ini ang makita naton nga ginahimu nila sa laragway. Kag malipayon si Samuel sa pag-alagad diri sa kayangkayang ni Jehova. Kada tuig, si Ana kag si Elkana nagasimba sa sining pinasahi nga kayangkayang, kag nagaduaw sa ila diutay nga bata. Kag kada tuig ginadalhan ni Ana si Samuel sing bag-o walay paku nga bayo.

Sa pila ka tuig, si Samuel nagpadayon sa pag-alagad kay Jehova, kag naluyagan sia ni Jehova kag sang kataohan. Apang ang mga anak sang mataas nga saserdote nga si Eli nga sanday Opni kag Pinehas indi maayo. Madamung kalautan ang ginahimu nila. Dapat pahalinon sila ni Eli sa pagkasaserdote, apang wala niya ginhimu.

Sa gihapon, nag-alagad si Samuel sa Dios. Apang bangod diutay lang ang nagahigugma kay Jehova, nagdugay pa kutob sang nakighambal si Jehova sa tao. Sang magdaku-daku na si Samuel amo sini ang natabu.

Nagakatulog si Samuel sa tabernakulo sang ginpukaw sia sang isa ka tingog. Nagsabat sia: ‘Yari ako.’ Kag nagdalagan sia kay Eli kag nagsiling: ‘Gintawag mo ako. Yari ako.’

Apang nagsabat si Eli: ‘Wala ko ikaw pagtawga; balik ka sa imo higdaan.’ Gani nagbalik si Samuel sa iya higdaan.

Natabu ini liwat, kag nian sa ikatlo pa nga tion. Sang ulihi, nahangpan ni Eli nga si Jehova ang nagapanawag. Gani ginsilingan niya si Samuel: ‘Maghigda ka liwat, kag kon magpanawag sia liwat, magsiling ka: “Maghambal ka, Jehova, kay ang imo alagad nagapamati” ’

Amo ini ang ginhimu ni Samuel. Nian ginsilingan ni Jehova si Samuel nga silotan niya si Eli kag ang iya mga anak. Sang ulihi si Opni kag si Pinehas napatay sa patag-awayan, kag sang mabatian ini ni Eli, natumba sia, nabali ang iya liog kag napatay man. Gani nagmatuod ang ginsiling ni Jehova

Nagdaku si Samuel kag nangin ang katapusan nga hukom sang Israel. Sang magtigulang na sia, ang kataohan nangabay sa iya: ‘Pilii kami sing hari nga magagahom sa amon.’ Wala magsugot si Samuel, kay si Jehova amo ang ila matuod nga hari. Apang ginsilingan sia ni Jehova nga pamatian ang kataohan.

1 Samuel 1:1-28; 2:11-36; 4:16-18; 8:4-9.



Mga Pamangkot:

  • Sin-o ang bata nga lalaki sa laragway, kag sin-o ang iban pa?
  • Ano ang ginpangamuyo ni Ana isa ka adlaw sang magkadto sia sa tabernakulo ni Jehova, kag paano sia ginsabat ni Jehova?
  • Pila ang edad ni Samuel sang gindala sia agod mag-alagad sa kayangkayang ni Jehova, kag ano ang ginahimu sang iya iloy para sa iya kada tuig?
  • Sin-o ang mga anak nga lalaki ni Eli, kag ano sila nga sahi sang mga tao?
  • Paano gintawag ni Jehova si Samuel, kag ano ang ginsiling Niya sa iya?
  • Nangin ano si Samuel sang magdaku sia, kag ano ang natabu sang magtigulang sia?

Dugang pa nga mga pamangkot

  • Basaha ang 1 Samuel 1:1-28.

    Ano nga maayong halimbawa para sa mga ulo sang pamilya ang ginahatag ni Elkana tuhoy sa pagpanguna sa matuod nga pagsimba? (1 Sam. 1:3, 21; Mat. 6:33; Fil. 1:10)

    Ano nga leksion ang maton-an naton gikan sa halimbawa ni Ana sa pag-atubang sa isa ka makatulublag nga problema? (1 Sam. 1:10, 11; Sal. 55:22; Roma 12:12)

  • Basaha ang 1 Samuel 2:11-36.

    Paano ginpadunggan ni Eli ang iya mga anak sangsa kay Jehova, kag paano ini isa ka paandam sa aton? (1 Sam. 2:22-24, 27, 29; Deut. 21:18-21; Mat. 10:36, 37)

  • Basaha ang 1 Samuel 4:16-18.

    Anong apat ka makapasubo nga mensahe ang naghalin sa patag-awayan, kag ano ang nangin epekto sini kay Eli?

  • Basaha ang 1 Samuel 8:4-9.

    Ngaa nagsakit gid ang balatyagon ni Jehova sa Israel, kag paano naton masakdag sing mainunungon ang iya Ginharian karon? (1 Sam. 8:5, 7; Juan 17:16; Sant. 4:4)

Magtuon sing Dugang Pa

Si Samuel sa Templo

Paano ginpakamaayo ni Jehova si Samuel? I-print ini nga piktyur, isugpon ang mga pintok, kag basaha ang istorya sa Biblia.

Si Samuel Padayon nga Naghimo sang Husto

Paano mo mailog si Samuel kag padayon nga maghimo sang husto bisan pa ang iban nagahimo sang malain?

Nagdaku si Samuel nga May Kahamuot ni Jehova

Ngaa lain gid sa iban ang kabuhi ni Samuel sang bata pa sia? Ano ang nakabulig para magbakod ang iya pagtuo sang ara sia sa tabernakulo?