Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 50: Duha ka Maisog nga Babae

Sugilanon 50: Duha ka Maisog nga Babae

SANG magsulod sa kagamo ang mga Israelinhon, nagtuaw sila kay Jehova. Nian ginhatagan sila ni Jehova sing maisog nga mga lider sa pagbulig sa ila. Ang Biblia nagatawag sining mga lider nga mga hukom. Si Josue amo ang unang hukom. Apang ang duha ka tao nga nagbulig sa Israel mga babae nga sanday Debora kag Jael.

Si Debora nga nagaistorya kay Barak

Si Debora isa ka manalagna. Ginasugid sa iya ni Jehova ang palaabuton, kag ginasugid man niya ini sa kataohan. Isa man sia ka hukom. Ang kataohan nagapangayo sing bulig sa iya sa ila problema.

Sining tion si Jabin ang hari sang Canaan. Ang iya hangaway mabaskog kag madamung Israelinhon ang ginpilit nga mangin alagad ni Jabin. Ang hepe sang hangaway ni Jabin amo si Sisera.

Isa ka adlaw nagpasugo si Debora kay Hukom Barak kag ginsilingan sia: ‘Si Jehova nagsiling: “Magdala sing 10,000 ka tao kag magkadto sa Bukid sang Tabor. Didto ihatag ko sa imo ang kadalag-an batok kay Sisera kag sa iya hangaway.” ’

Si Barak nagsiling: ‘Makadto ako kon magkadto ka man.’ Nag-upod si Debora, apang nagsiling sia kay Barak: ‘Indi ikaw ang padunggan sa kadalag-an bangod itugyan ni Jehova si Sisera sa kamut sang isa ka babae.’

Si Barak nagdulhog gikan sa Bukid sang Tabor agod sugataon ang hangaway ni Sisera. Sa hinali nagpabaha si Jehova, kag madamu sang kaaway nga soldado ang nalumos. Apang si Sisera nalagyo.

Sanday Barak, Jael, kag Sisera

Nian, nag-abot si Sisera sa layanglayang ni Jael. Ginpasulod niya sia kag ginhatagan sing gatas. Dugay-dugay natulogan sia. Nian ginpalpalan ni Jael ang ulo sining malain nga tao. Sang ulihi nag-abot si Barak kag nakita niya nga patay na si Sisera! Gani nagmatuod ang ginsiling ni Debora.

Sang ulihi napatay man si Hari Jabin, kag ang mga Israelinhon may paghidait liwat.

Hukom 2:14-22; 4:1-24; 5:1-31.



Mga Pamangkot:

  • Sin-o ang mga hukom, kag ano ang ngalan sang pila?
  • Ano ang pinasahi nga pribilehiyo ni Debora, kag ano ang nadalahig sa sini?
  • Sang may katalagman nga malutos ni Hari Jabin kag sang hepe sang iya hangaway nga si Sisera ang Israel, ano nga mensahe gikan kay Jehova ang ginhatag ni Debora kay Hukom Barak, kag sin-o siling niya ang dapat padunggan sa sini?
  • Paano ginpakita ni Jael nga sia isa ka maisog nga babae?
  • Ano ang natabu sang mapatay si Hari Jabin?

Dugang pa nga mga pamangkot

  • Basaha ang Hukom 2:14-22.

    Ngaa naakig si Jehova sa mga Israelinhon, kag ano nga leksion ang maton-an naton sa sini? (Huk. 2:20; Hulu. 3:1, 2; Ezeq. 18:21-23)

  • Basaha ang Hukom 4:1-24.

    Ano nga mga leksion tuhoy sa pagtuo kag kaisog ang maton-an sang Cristianong mga babae karon gikan sa mga halimbawa ni Debora kag ni Jael? (Huk. 4:4, 8, 9, 14, 21, 22; Hulu. 31:30; 1 Cor. 16:13)

  • Basaha ang Hukom 5:1-31.

    Paano ang ambahanon sang kadalag-an ni Barak kag ni Debora sarang maaplikar subong pangamuyo sa nagapakari nga inaway sa Armagedon? (Huk. 5:3, 31; 1 Cron. 16:8-10; Bug. 7:9, 10; 16:16; 19:19-21)