Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 49: Nagdulog ang Adlaw

Sugilanon 49: Nagdulog ang Adlaw

TOLOKA si Josue. Nagasiling sia: ‘Adlaw, magdulog!’ Kag ang adlaw nagdulog sa bug-os nga adlaw. Si Jehova ang nagpahanabu sini! Apang tan-awon ta kon ngaa luyag pasilakon ni Josue ang adlaw.

Ang adlaw

Sang ang lima ka malain nga hari nakig-away batok sa ila, ang mga Gabaoninhon nagpasugo sing bulig kay Josue. Sa gilayon, si Josue kag ang tanan niya nga hangaway naglakat. Sa bug-os nga gab-i nagmartsa sila. Sang mag-abot sila sa Gabaon ang mga soldado sang lima ka hari nagpalalagyo. Nian si Jehova naghulog sing dalagku nga bato gikan sa langit, kag mas madamu ang napatay nga soldado sa igo sang dalagku nga bato sang sa napatay sang hangaway ni Josue.

Nakita ni Josue nga ang adlaw magatunod. Magadulom, kag madamu sang kaaway nga soldado ang makapalagyo. Gani ginpangabay niya kay Jehova nga padulogon ang adlaw. Nian mabug-os sang mga Israelinhon ang pagpakig-away sa kaadlawon.

Si Josue

Sa kabilogan may 31 ka malain nga hari sa Canaan nga nagadumot sa kataohan sang Dios. Mga anum ka tuig ang nahinguyang ni Josue kag sang iya hangaway sa paglutos sa ila. Nian, ginpat-od ni Josue nga bahinon ang duta sa mga tribu nga nagakinahanglan pa sing teritoryo.

Pagligad sang madamu nga tuig, napatay si Josue sa edad nga 110 ka tuig. Tubtob nagkabuhi sia kag ang iya mga abyan, ang kataohan nagtuman sa Dios. Apang sang mapatay ining maayong mga tao, ang kataohan naghimu sing malain nga mga butang kag nagsulod sa kagamo. Nian ginkinahanglan nila ang bulig sang Dios.

Josue 10:6-15; 12:7-24; 14:1-5; Hukom 2:8-13.



Mga Pamangkot:

  • Sa laragway, ano ang ginasiling ni Josue, kag ngaa?
  • Paano ginbuligan ni Jehova si Josue kag ang iya hangaway?
  • Pila ka kaaway nga mga hari ang ginlutos ni Josue, kag daw ano ka dugay?
  • Ngaa ginbahin ni Josue ang duta sang Canaan?
  • Pila ang edad ni Josue sang napatay sia, kag ano ang natabu sa kataohan pagkatapos sini?

Dugang pa nga mga pamangkot

  • Basaha ang Josue 10:6-15.

    Bangod nahibaluan naton nga ginpadulog ni Jehova ang adlaw kag ang bulan para sa Israel, ano ang masaligan naton karon? (Jos. 10:8, 10, 12, 13; Sal. 18:3; Hulu. 18:10)

  • Basaha ang Josue 12:7-24.

    Sin-o gid ang kabangdanan kon ngaa nalutos ang 31 ka hari sa Canaan, kag ngaa importante ini para sa aton karon? (Jos. 12:7; 24:11-13; Deut. 31:8; Luc. 21:9, 25-28)

  • Basaha ang Josue 14:1-5.

    Paano ginbahin ang duta sa mga tribu sang Israel, kag ano ang ginapakita sini tuhoy sa mga palanublion sa Paraiso? (Jos. 14:2; Isa. 65:21; Ezeq. 47:21-23; 1 Cor. 14:33)

  • Basaha ang Hukom 2:8-13.

    Kaangay ni Josue sa Israel, sin-o sa karon ang nagapangalagad subong pugong batok sa apostasya? (Huk. 2:8, 10, 11; Mat. 24:45-47; 2 Tes. 2:3-6; Tito 1:7-9; Bug. 1:1; 2:1, 2)