Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 48: Maalam nga Gabaoninhon

Sugilanon 48: Maalam nga Gabaoninhon

MADAMU karon nga siudad sang Canaan ang naghanda sa pagpakig-away batok sa Israel. Apang ang kataohan sa kaiping nga siudad sang Gabaon nagpati nga ang Dios nagabulig sa mga Israelinhon. Dili nila luyag makig-away batok sa Dios. Ano ang ginhimu nila?

Namat-od sila nga magpakunokuno nga nagapuyo sa malayo. Ang iban sang mga lalaki nagsuksok sing gurisnay nga bayo kag guba nga sandalyas. Ginlulanan nila ang ila mga asno sing gision nga mga sako kag nagbalon sing pila ka tinapay nga agup-opon. Nian nagkadto sila kay Josue kag nagsiling: ‘Malayo pa ang ginhalinan namon, bangod nabatian namon ang tanan nga butang nga ginhimu sa inyo sang inyo dungganon nga Dios nga si Jehova. Karon, mga alagad mo kami. Manaad ka nga indi kamo makig-away sa amon.’

Nakita ni Josue kag sang iban nga mga lider ang ila gurisnay nga bayo kag tinapay nga pan-os, kag nagpati sila. Gani nanaad sila nga indi makig-away sa ila. Apang pagligad sang tatlo ka adlaw, natukiban nila nga sa malapit lang ang mga Gabaoninhon.

‘Ngaa nagsiling kamo sa amon nga malayo ang ginhalinan ninyo?’ pamangkot ni Josue.

Ang mga Gabaoninhon nagsabat: ‘Nabatian namon nga ginsaad sa inyo ni Jehova nga inyo Dios ining duta sang Canaan. Gani nahadlok kami nga basi patyon ninyo kami.’ Apang wala sila pagpatya sang mga Israelinhon. Sa baylo ginhimu sila nga mga alagad nila.

Ang hari sang Jerusalem naakig sa ginhimu sang mga Gabaoninhon. Gani nagsiling sia sa apat pa ka hari: ‘Kari kamo kag buligi ako sa pagpakig-away batok sa Gabaon.’ Kag amo ina ang ginhimu sang lima ka hari. Maalamon bala ang mga Gabaoninhon sa pagpakighidait sa Israel? Makita naton.

Josue 9:1-27; 10:1-5.

Si Josue kag ang mga Gabaoninhon


Mga Pamangkot:

  • Paano ang kataohan sang Gabaon tuhay gikan sa mga Canaanhon sa kaiping nga mga siudad?
  • Subong sang ginapakita sa laragway, ano ang ginhimu sang mga Gabaoninhon, kag ngaa?
  • Ano ang ginpanaad ni Josue kag sang Israelinhon nga mga lider sa mga Gabaoninhon, apang ano ang ila natukiban pagligad sang tatlo ka adlaw?
  • Ano ang natabu sang mabatian sang mga hari sa iban nga mga siudad nga nagpakighidait ang mga Gabaoninhon sa Israel?

Dugang pa nga mga pamangkot

  • Basaha ang Josue 9:1-27.

    Sanglit ginsugo ni Jehova ang pungsod sang Israel nga “laglagon ang tanan nga pumuluyo sang duta,” ano nga mga kinaiya ang ginpadaku sang iya pagluas sa mga Gabaoninhon? (Jos. 9:22, 24; Mat. 9:13; Bin. 10:34, 35; 2 Ped. 3:9)

    Paagi sa pagtuman sa katipan nga ginhimu upod sa mga Gabaoninhon, paano si Josue nagpahamtang sing maayong halimbawa para sa mga Cristiano karon? (Jos. 9:18, 19; Mat. 5:37; Efe. 4:25)

  • Basaha ang Josue 10:1-5.

    Paano ginailog karon sang dakung kadam-an ang mga Gabaoninhon, kag gani ginapuntariya sila bangod sang ano? (Jos. 10:4; Zac. 8:23; Mat. 25:35-40; Bug. 12:17)