Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 47: Ang Kawatan sa Israel

Sugilanon 47: Ang Kawatan sa Israel
Ginatago ni Acan ang iya ginkawat

TAN-AWA ang ginalubong sining tao sa iya layanglayang! Isa ka matahom malaba nga panapton, kag pila ka bilog nga pilak. Ginkuha niya ini sa siudad sang Jerico. Apang nadumdoman mo bala kon ano kuntani ang dapat himuon sa mga butang sa Jerico?

Dapat laglagon ini. Kag ang bulawan kag pilak dapat ihatag sa bahandian sang tabernakulo ni Jehova. Gani ginlalis sining mga tao ang Dios. Ginkawat nila ang iya sang Dios. Ining tao amo si Acan, kag ang upod sa iya amo ang katapu sang iya pamilya. Tan-awon ta kon ano ang natabu.

Sang nakawat ni Acan ining mga butang, ang mga Israelinhon nalutos sa inaway batok sa siudad sang Ai. Masubo gid si Josue kag ginpamangkot niya si Jehova kon ngaa gintugotan niya ini.

Si Jehova nagsabat: ‘Nakasala ang Israel. Ginkuha nila ang iban sang mga butang nga dapat laglagon ukon ihatag sa tabernakulo ni Jehova. Indi ko kamo pagpakamaayuhon tubtob laglagon ninyo ining mga butang kag ang nagkuha sini.’ Nagsiling si Jehova nga ipakita niya kay Josue kon sin-o ang malain nga tao nga naghimu sini.

Gani gintipon ni Josue ang tanan nga tao, kag gintudlo ni Jehova ang malain nga si Acan. Gin-ako ni Acan ang iya nahimu, kag ginsugid kay Josue ang gintagoan niya sing mga kinawat.

Sang makita ang mga butang, si Josue nagsiling kay Acan: ‘Ngaa bala nga gingamo mo kami? Gamuhon ka ni Jehova sining adlaw!’ Nian si Acan kag ang iya pamilya ginbato tubtob sa kamatayon. Wala bala ina nagapakita sa aton nga dili naton dapat kuhaon ang mga butang nga indi aton?

Pagkatapos sadto nakig-away liwat ang Israel batok sa Ai. Sining tion ginbuligan ni Jehova ang iya kataohan, kag nagdaug sila sa inaway.

Josue 7:1-26; 8:1-29.



Mga Pamangkot:

  • Sa laragway, sin-o ang lalaki nga nagalubong sang mga manggad nga ginkuha sa Jerico, kag sin-o ang mga nagabulig sa iya?
  • Ngaa malain ang ginhimu ni Acan kag sang iya pamilya?
  • Ano ang ginsiling ni Jehova sang mamangkot si Josue kon ngaa nalutos ang mga Israelinhon sa inaway sa Ai?
  • Sang gindala si Acan kag ang iya pamilya kay Josue, ano ang natabu sa ila?
  • Anong importante nga leksion ang ginatudlo sa aton sang paghukom batok kay Acan?

Dugang pa nga mga pamangkot

  • Basaha ang Josue 7:1-26.

    Ano ang ginasugid sang mga pangamuyo ni Josue tuhoy sa iya kaangtanan sa iya Manunuga? (Jos. 7:7-9; Sal. 119:145; 1 Juan 5:14)

    Ano ang ginapakita sang halimbawa ni Acan, kag paano ini isa ka paandam sa aton? (Jos. 7:11, 14, 15; Hulu. 15:3; 1 Tim. 5:24; Heb. 4:13)

  • Basaha ang Josue 8:1-29.

    Ano ang aton personal nga salabton sa Cristianong kongregasyon karon? (Jos. 7:13; Lev. 5:1; Hulu. 28:13)