Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 45: Pagtabok sa Suba sang Jordan

Sugilanon 45: Pagtabok sa Suba sang Jordan

TOLOKA! Nagatabok sa Suba sang Jordan ang mga Israelinhon! Apang diin ang tubig? Pila pa lang ka minuto puno pa ang suba. Apang karon wala na sing tubig! Ano ang natabu? Tan-awon ta.

Mga Israelinhon nga nagatabok sa Suba sang Jordan

Sang mag-abot na ang tion nga magtabok ang mga Israelinhon sa Suba sang Jordan ginpasiling ni Jehova si Josue sa kataohan: ‘Ang mga saserdote ang dapat magdala sing kaban sang katipan kag magauna sa aton. Kon magtapak sila sa suba, magahunong ang tubig.’

Gani ginhakwat sang mga saserdote ang kaban sang katipan, ginpas-an nga una sa kataohan kag naglakat sa suba. Tuman kasulog ini kag madalom. Apang sang makatapak ang ila mga tiil sa tubig, naghunong ang tubig! Milagro yadto. Wala madugay, wala na sing tubig sa suba!

Ang mga saserdote nga nagapas-an sing kaban sang katipan nagtindog sa tunga sang suba samtang nagatabok ang mga Israelinhon sa mamala nga duta! Makita mo bala sila sa laragway?

Sang makatabok na ang tanan, ginsugo ni Jehova si Josue nga silingan ang 12 ka mabaskog nga tao nga magkuha sing 12 ka bato sa ginatindogan sang mga saserdote sa suba. Ining mga bato ibutang sa dulogan sang mga Israelinhon. Magapahanumdom ini sa ila sang milagro. Nagbutang man si Josue sing 12 ka bato sa gintindogan sang mga saserdote sa suba.

Si Josue

Sa katapusan ginsilingan ni Josue ang mga saserdote nga nagapas-an sing kaban sang katipan: ‘Takas kamo gikan sa Jordan.’ Kag sang makatakas sila, nag-ilig liwat ang suba.

Josue 3:1-17; 4:1-18.



Mga Pamangkot:

  • Ano nga milagro ang ginhimu ni Jehova agod makatabok ang mga Israelinhon sa Suba sang Jordan?
  • Ano nga buhat sang pagtuo ang dapat himuon sang mga Israelinhon agod makatabok sila sa Suba sang Jordan?
  • Ngaa ginsugo ni Jehova si Josue nga magpakuha sing 12 ka bato gikan sa suba?
  • Ano ang natabu sa gilayon nga magtakas ang mga saserdote sa Jordan?

Dugang pa nga mga pamangkot

  • Basaha ang Josue 3:1-17.

    Subong sang ginapakita sini nga rekord, ano ang dapat naton himuon agod mabaton naton ang bulig kag pagpakamaayo ni Jehova? (Jos. 3:13, 15; Hulu. 3:5; Sant. 2:22, 26)

    Ano ang kahimtangan sang Suba sang Jordan sang magtabok ang mga Israelinhon padulong sa Ginsaad nga Duta, kag paano ini nagpakadaku sa ngalan ni Jehova? (Jos. 3:15; 4:18; Sal. 66:5-7)

  • Basaha ang Josue 4:1-18.

    Ano ang katuyuan sang 12 ka bato nga ginkuha sa Jordan kag ginbutang sa Gilgal? (Jos. 4:4-7)