Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 34: Bag-ong Sahi sang Pagkaon

Sugilanon 34: Bag-ong Sahi sang Pagkaon

MASUGID mo bala kon ano ang ginapulot sang mga tao sa duta? Maputi ini, manipis kag nagakapugday sa manipis nga kinihad. Ano ini? Butang ini nga makaon.

Mga Israelinhon nga nagapamulot sing mana

Ang mga Israelinhon naghalin sa Egipto sa mga isa ka bulan na. Yadto sila sa kahanayakan. Diutay lang nga pagkaon ang ginapatubas diri, kag ang mga tao nagayamo.

Gani si Jehova nagsiling: ‘Mapaulan ako sing pagkaon gikan sa langit.’ Kag amo sini ang natabu. Pagkaaga, sang makita sang mga Israelinhon ining maputi nga butang nga nahulog, namangkot sila: ‘Ano ini?’

Si Moises nagsiling: ‘Amo ini ang pagkaon nga ginhatag sa inyo ni Jehova.’ Gintawag ini sang mga tao nga MANA. Ang lalim sini subong sang tinapay nga manipis nga may dugos.

‘Mamulot kamo tubtob sa makaon lang sang kada tao,’ siling ni Moises. Gani kada aga amo sini ang ila ginahimu. Nian, kon mag-init ang adlaw, ang mana nga mabilin sa duta nagakatunaw.

Ginsilingan man sila ni Moises nga indi magtigana sing mana tubtob sa masunod nga adlaw. Apang ang iban sa ila nagtigana. Pagkaaga, ang mana nga gintagu nila puno sing ulod kag mabahu!

Apang sa ikan-um nga adlaw sang semana, si Jehova nagsiling sa mga tao nga magtipon sing mana nga doble sa masarangan nila. Nagsiling sia nga wala sing mana nga mahulog sa ikapito nga adlaw. Kon magtigana sila sing mana tubtob sa ikapito nga adlaw, wala ini ginaulod kag wala nagabahu. Isa pa ini ka milagro.

Sa tanan nga tinuig nga ang mga Israelinhon didto sa kahanayakan, ginpakaon sila ni Jehova sing mana.

Exodo 16:1-36; Numeros 11:7-9; Josue 5:10-12.



Mga Pamangkot:

  • Sa laragway, ano ang ginapulot sang mga tao sa duta, kag ano ang gintawag sa sini?
  • Ano ang ginsiling ni Moises sa kataohan tuhoy sa pagpulot sing mana?
  • Ano ang ginpahimu ni Jehova sa kataohan sa ikan-um nga adlaw, kag ngaa?
  • Ano nga milagro ang ginhimu ni Jehova kon taguon ang mana tubtob sa ikapito nga adlaw?
  • Daw ano ka dugay nga ginpakaon ni Jehova ang iya kataohan sing mana?

Dugang pa nga mga pamangkot

  • Basaha ang Exodo 16:1-36 kag Numeros 11:7-9.

    Suno sa Exodo 16:8, ngaa dapat naton tahuron ang gintangdu sang Dios nga mga utod sa sulod sang Cristianong kongregasyon? (Heb. 13:17)

    Sa kahanayakan, paano ginpahanumdom ang mga Israelinhon sa adlaw-adlaw nga kinahanglan nila si Jehova? (Ex. 16:14-16, 35; Deut. 8:2, 3)

    Anong simbuliko nga kahulogan ang ginhatag ni Jesus sa mana, kag paano kita nagabenepisyo gikan sa sining “tinapay gikan sa langit”? (Juan 6:31-35, 40)

  • Basaha ang Josue 5:10-12.

    Pila ka tuig nga nagkaon sing mana ang mga Israelinhon, paano ini nagtilaw sa ila, kag ano ang maton-an naton gikan sa sini nga hitabu? (Ex. 16:35; Num. 11:4-6; 1 Cor. 10:10, 11)