Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 23: Ang mga Damgo ni Paraon

Sugilanon 23: Ang mga Damgo ni Paraon

NAGLIGAD ang duha ka tuig, kag si Jose sa bilangguan gihapon. Ang manugtagay wala makadumdom sa iya. Nian isa ka gab-i si Paraon may duha ka pinasahi nga damgo kag nagpalibog sang kahulogan sini. Makita mo bala sia nga nagakatulog diri? Pagkaaga, wala sing makasugid sang kahulogan sang iya mga damgo.

Sa katapusan nadumdoman sang manugtagay si Jose. Ginsugid niya ini kay Paraon kag sa gilayon ginpagua ni Paraon si Jose.

Ginsugid ni Paraon ang iya mga damgo kay Jose: ‘Nakita ko ang pito ka matambok, matahom nga baka. Nian nakita ko ang pito ka maniwang gid nga baka. Kag ginkaon sang mga maniwang ang mga matambok.

Si Paraon nga nagadamgo

‘Sa akon ikaduha nga damgo nakita ko ang pito ka uhay nga matimsog kag gulang nga nagatubo sa isa ka dagami. Nian nakita ko ang pito ka uhay nga kupos kag laya. Nian ang kupos nga mga uhay naghalunhon sang pito ka uhay nga maayo.’

Si Jose nagsiling kay Paraon: ‘Isa ang kahulogan sang damgo. May pito ka tuig nga pagbugana sing pagkaon sa Egipto. Nian may pito ka tuig nga pagkaiwat sing pagkaon.’

Gani nagsiling si Jose kay Paraon: ‘Magpili sing maalam nga tao kag tulini sia sa pagtipon sing pagkaon sa sulod sang pito ka maayo nga tuig. Nian indi paggutomon ang mga tao sa slulod sang pito ka malin nga tuig.’

Naluyagan ni Paraon ang ideya. Kag ginpili niya si Jose sa pagtipon sing pagkaon kag sa pagtagu sini. Masunod kay Paraon, si Jose nangin labing importante nga tao sa Egipto.

Walo ka tuig sang ulihi, sang tiggulotom, nakita ni Jose ang iya 10 ka utod. Ginpadala sila sang ila amay nga si Jacob sa Egipto, bangod naubosan sila sing pagkaon sa Canaan. Ang mga utod ni Jose wala makakilala sa iya bangod nagdaku na sia kag tuhay ang panapot.

Nadumdoman ni Jose nga sang bata pa sia nagdamgo sia nga ang iya mga utod nagyaub sa iya. Nadumdoman mo bala ina? Gani nahangpan ni Jose nga ang Dios ang nagpadala sa iya sa Egipto, kag may maayong rason. Ano sa hunahona mo ang himuon ni Jose? Tan-awon ta.

Genesis 41:1-57; 42:1-8; 50:20.



Mga Pamangkot:

  • Ano ang natabu kay Paraon isa ka gab-i?
  • Ngaa nadumduman sang manugtagay si Jose?
  • Subong sang ginapakita sa laragway, ano ang duha ka damgo ni Paraon?
  • Ano ang kahulogan sang mga damgo suno kay Jose?
  • Paano si Jose nangin labing importante nga tao sa Egipto masunod kay Paraon?
  • Ngaa nagkadto sa Egipto ang mga utod ni Jose, kag ngaa wala nila makilala sia?
  • Ano nga damgo ang nadumduman ni Jose, kag ano ang nahangpan ni Jose bangod sini?

Dugang pa nga mga pamangkot

  • Basaha ang Genesis 41:1-57.

    Paano ginpatuhoy ni Jose ang igtalupangod kay Jehova, kag paano mailog sang mga Cristiano karon ang iya halimbawa? (Gen. 41:16, 25, 28; Mat. 5:16; 1 Ped. 2:12)

    Paano ang mga tuig sang kabuganaan sa Egipto nga ginsundan sang mga tuig sang tiggulutom sibu nga nagapatuhay sang espiritual nga kahimtangan sang kataohan ni Jehova karon kag sang Cristiandad? (Gen. 41:29, 30; Amos 8:11, 12)

  • Basaha ang Genesis 42:1-8 kag 50:20.

    Sayop bala kon magduko ang mga sumilimba ni Jehova sa atubangan sang isa ka tao bilang pagpadungog kag pagtahod sa iya posisyon kon kustombre ina sang pungsod? (Gen. 42:6)

Magtuon sing Dugang Pa

Ginluwas ni Jose ang mga Tawo

I-download ini nga komiks kag basaha ang parte kay Jose, nga gingamit sang Dios para luwason ang bilog nga pungsod.