Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 21: Ang mga Utod ni Jose Nagdumot sa Iya

Sugilanon 21: Ang mga Utod ni Jose Nagdumot sa Iya

TAN-AWA masubo gid ang bata nga lalaki. Ini si Jose. Ginbaligya sia sang iya mga utod sa sining mga tao nga magadala sa iya sa Egipto agod uliponon sia. Ngaa ginhimu sang mga utod sa amay ni Jose ining malain nga butang? Bangod nahisa sila sa iya.

Ginbaligya si Jose sang iya mga utod

Palangga gid sang ila amay nga si Jacob si Jose. Ginpahimoan sia sing matahom malaba nga bayo. Gani nahisa ang iya 10 ka magulang kag gindumtan sia.

Subong man, may duha ka damgo si Jose. Sa duha ka damgo, ang iya mga utod nagyaub kay Jose. Sang ginsugid ni Jose sa iya mga utod ang damgo, nagdugang pa gid ang ila dumot sa iya.

Isa ka adlaw sang ang mga magulang ni Jose nagatatap sang mga karnero sang ila amay, ginpakadto ni Jacob si Jose agod tan-awon sila. Sang makita nila nga nagapadulong si Jose, luyag nila nga patyon sia. Apang si Ruben, nga kamagulangan, nagsiling: ‘Dili, dili paghimua ina!’ Sa baylo gihulog nila si Jose sa mamala nga buho. Nian namat-od sang ila himuon.

Sining tinion nagapakari ang pila ka Ismaelnon. Gani ginbaligya nila si Jose sa mga Ismaelnon sa 20 ka bilog nga pilak. Daw ano kapintas kag walay kaluoy yadto!

Nian nagpatay sila sing kanding kag gintum-oy ang matahom nga bayo ni Jose sa dugo sini. Gindala nila ang bayo kay Jacob kag nagsiling: ‘Nakita namon ini. Indi bala kay Jose ini?’

Nakilal-an yadto ni Jacob. ‘Ginpatay si Jose sang sapat nga talonon,’ hibi niya. Amo gid ini ang luyag nila nga hunahonaon sang ila amay. Masubo gid si Jacob. Naghaya sia sa madamung adlaw. Apang si Jose indi patay. Tan-awon ta kon ano ang natabu sa iya.

Genesis 37:1-35.



Mga Pamangkot:

  • Ngaa nahisa kay Jose ang iya mga utod, kag ano ang ila ginhimu?
  • Ano ang luyag himuon sang mga utod ni Jose sa iya, apang ano ang ginsiling ni Ruben?
  • Ano ang natabu sang nag-agi ang Ismaelnon nga mga negosyante?
  • Ano ang ginhimu sang mga utod ni Jose agod magpati ang ila amay nga patay na si Jose?

Dugang pa nga mga pamangkot

  • Basaha ang Genesis 37:1-35.

    Paano mailog sang mga Cristiano ang halimbawa ni Jose paagi sa pagreport kon may makasala sa sulod sang kongregasyon? (Gen. 37:2; Lev. 5:1; 1 Cor. 1:11)

    Ngaa nagtraidor ang mga utod ni Jose sa iya? (Gen. 37:11, 18; Hulu. 27:4; Sant. 3:14-16)

    Ano ang nangin reaksion ni Jacob nga normal lamang sa isa ka tao nga nagakalisod? (Gen. 37:35)