Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 20: Si Dina Nahulog sa Gamo

Sugilanon 20: Si Dina Nahulog sa Gamo

MAKITA mo bala kon sin-o ang duawon ni Dina? Duawon niya ang pila ka babae nga nagapuyo sa Canaan. Malipay ayhan sa sini ang iya amay nga si Jacob?

Ginduaw ni Dina ang taga-Canaan nga mga babayi

Bueno, indi luyag ni Abraham nga mangasawa si Isaac sing babae gikan sa Canaan, indi bala? Indi man luyag ni Isaac nga magpangasawa ang iya anak nga si Jacob sing taga-Canaan nga babae. Nahibaloan mo bala kon ngaa?

Bangod ining mga tao sa Canaan nagasimba sa butig nga mga dios. Indi sila maayo pakaslan, ukon abyanon sing suod. Gani indi mahamuot si Jacob nga ang iya anak nga babae nagapakig-abyan sa taga-Canaan nga mga babae.

Sing pat-od gid, si Dina nahulog sa gamo. Makita mo bala inang taga-Canaan nga lalaki sa laragway? Sia si Siquem. Isa ka adlaw, ginkuha ni Siquem si Dina kag ginpilit sia nga maghulid sa iya. Malain, ini, kay mag-asawa lamang ang dapat maghuliray.

Naakig gid sing tuman ang mga utod nga lalaki ni Dina sa sini. Ang duha sa ila, si Simeon kag si Levi nagkadto sa siudad kag ginkibot ang mga lalaki. Sila kag ang ila mga utod nga lalaki nagpatay kay Siquem kag sa tanan nga lalaki. Naakig gid si Jacob sa ginhimu sang iya mga anak.

Paano nag-umpisa ining kagamo? Bangod si Dina nakig-abyan sa mga tao nga wala nagatuman sang mga sugo sang Dios. Indi naton luyag makig-abyan sing subong, indi bala?

Genesis 34:1-31.



Mga Pamangkot:

  • Ngaa indi luyag ni Abraham kag ni Isaac nga makapangasawa ang ila mga anak sing taga-Canaan?
  • Nahamuot bala si Jacob sa pagpakig-abyan sang iya anak nga babae sa mga taga-Canaan nga mga babae?
  • Sin-o ang lalaki nga nagatulok kay Dina sa laragway, kag ano ang malain nga ginhimu niya?
  • Ano ang ginhimu sang mga utod ni Dina nga sanday Simeon kag Levi sang mabalitaan nila ang natabu?
  • Nag-ugyon bala si Jacob sa ginhimu nanday Simeon kag Levi?
  • Paano nag-umpisa ang tanan nga kagamo sa pamilya?

Dugang pa nga mga pamangkot

  • Basaha ang Genesis 34:1-31.

    Kis-a lang bala nakig-upod si Dina sa taga-Canaan nga mga babae? Ipaathag. (Gen. 34:1)

    Ngaa balasulon man si Dina sa pagkadula sang iya pagkaulay? (Gal. 6:7)

    Paano mapakita sang mga pamatan-on karon nga nanuto sila gikan sa nagapaandam nga halimbawa ni Dina? (Hulu. 13:20; 1 Cor. 15:33; 1 Juan 5:19)