Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 18: Nagpa-Haran si Jacob

Sugilanon 18: Nagpa-Haran si Jacob

KILALA mo bala ining mga tao nga kahambal ni Jacob? Sa tapos sang madamung adlaw nga paglakbay, nasugata sila ni Jacob sa bubon. Sia namangkot: ‘Tagadiin kamo?’

‘Taga-Haran,’ siling nila.

‘Kilala bala ninyo si Laban?’ pamangkot ni Jacob.

‘Huo,’ sabat nila. ‘Toloka, nagapakari ang iya anak nga si Raquel, upod ang iya mga karnero.’ Makita mo bala sia sa laragway?

Nagkitaay si Jacob kag si Raquel

Ginpaligid ni Jacob ang bato gikan sa bubon agod makainum ang mga karnero ni Laban. Nian ginhalokan niya si Raquel kag nagpakilala sia. Nalipay sia, kag naglakat kag ginsugiran ang iya amay nga si Laban.

Ginpaistar ni Laban si Jacob sa iya. Kag gintugotan si Jacob nga pangasaw-on si Raquel. Apang, ginpangabay niya si Jacob nga magtrabaho sa iya latagon sa pito ka tuig para kay Raquel. Apang sang mag-abot ang tion sa pag-asawahay, nahibaloan mo bala kon ano ang natabu?

Ginhatag ni Laban ang iya magulang nga anak nga si Lea kay Jacob subong asawa! Si Jacob nagtrabaho sing pito ka tuig pa, kag nian ginhatag man sa iya ni Laban si Raquel. Sadtong mga adlaw gintugotan sang Dios ang mga tao nga magpangasawa sing kapin sa isa. Karon dapat isa lang ang asawa sang lalaki.

Genesis 29:1-30.



Mga Pamangkot:

  • Sin-o ang lin-ay sa laragway, kag ano ang ginhimu ni Jacob para sa iya?
  • Agod mapangasawa si Raquel, handa si Jacob nga himuon ang ano?
  • Ano ang ginhimu ni Laban sang mag-abot ang tion nga mapangasawa na ni Jacob si Raquel?
  • Agod mapangasawa si Raquel, nag-ugyon si Jacob nga himuon ang ano?

Dugang pa nga mga pamangkot

  • Basaha ang Genesis 29:1-30.

    Bisan pa gindayaan sia ni Laban, paano ginpakita ni Jacob nga dungganon sia, kag ano ang matun-an naton gikan sa sini? (Gen. 25:27; 29:26-28; Mat. 5:37)

    Sa halimbawa ni Jacob, paano makita nga tuhay ang gugma gikan sa pagsalimuang lamang? (Gen. 29:18, 20, 30; Amb. ni Sol. 8:6)

    Sin-o ang apat ka babae nga nangin bahin sang panimalay ni Jacob kag sang ulihi nag-anak sa iya sing mga anak nga lalaki? (Gen. 29:23, 24, 28, 29)