Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 17: Ang Kapid nga Magkatuhay

Sugilanon 17: Ang Kapid nga Magkatuhay
Si Esau

ANG duha ka bata nga lalaki magkatuhay gid, indi bala? Kilala mo bala sila? Ang mangangayam si Esau, kag ang bata mga lalaki nga nagatatap sing karnero si Jacob. Si Esau kag si Jacob kapid nga mga anak ni Isaac kag ni Rebeca. Luyag gid ni Isaac si Esau, bangod ginadalhan niya sing kalan-on ang pamilya. Apang ginhigugma gid ni Rebeca si Jacob, bangod mahipos sia kag mahidaiton nga bata.

Mahanduraw naton nga luyag gid mamati ni Jacob sa iya lolo nga si Abraham nga naga-istorya tuhoy kay Jehova. Si Abraham napatay sa edad nga 175 ka tuig, sang ang kapid 15 ka tuig.

Sang si Esau 40 ka tuig, ginpangasawa niya ang duha ka babae gikan sa Canaan nga wala nagasimba kay Jehova. Naakig gid sa sini si Isaac kag si Rebeca.

Ang tion nag-abot nga pakamaayuhon ni Isaac ang iya magulang nga anak. Si Esau ang magulang. Apang ginbaligya na ni Esau ang kinamatarong sa pagbaton sing pagpakamaayo kay Jacob. Ang Dios nagsiling man nga si Jacob ang magabaton sing pagpakamaayo.

Kag amo ini ang natabu. Ginhatag ni Isaac ang pagpakamaayo sa iya anak nga si Jacob.

Si Jacob

Naakig si Esau sang mahibal-an niya ini. Nagsiling sia nga patyon niya si Jacob! Sang mabatian ini ni Rebeca nabalaka sia. Gani nagsiling sia kay Isaac: ‘Indi maayo kon mapangasawa man ni Jacob ang isa sang mga babae sang Canaan.’

Gani gintawag ni Isaac si Jacob kag nagsiling: ‘Kadto ka sa imo lolo nga si Betuel sa Haran. Pangasaw-a ang isa sang mga anak nga babae sang iya anak nga si Laban.’

Sa gilayon ginsugdan ni Jacob ang iya malawig nga paglakbay pa Haran.

Genesis 25:5-11, 20-34; 26:34, 35; 27:1-46; 28:1-5; Hebreo 12:16, 17.



Mga Pamangkot:

  • Sin-o si Esau kag si Jacob, kag ano ang ila pagkatuhay?
  • Pila ang edad ni Esau kag ni Jacob sang napatay ang ila lolo nga si Abraham?
  • Ano ang ginhimu ni Esau nga nagpasubo gid sa iya iloy kag amay?
  • Ngaa naakig gid si Esau sa iya utod nga si Jacob?
  • Ano ang ginsiling ni Isaac sa iya anak nga si Jacob?

Dugang pa nga mga pamangkot

  • Basaha ang Genesis 25:5-11, 20-34.

    Ano ang gintagna ni Jehova tuhoy sa duha ka anak nga lalaki ni Rebeca? (Gen. 25:23)

    Ano ang magkatuhay nga panimuot ni Jacob kag ni Esau sa kinamatarong sa pagkapanganay? (Gen. 25:31-34)

  • Basaha ang Genesis 26:34, 35; 27:1-46; kag 28:1-5.

    Paano nangin dayag ang kakulang sing apresasyon ni Esau para sa espiritual nga mga butang? (Gen. 26:34, 35; 27:46)

    Agod makabaton si Jacob sing pagpakamaayo sang Dios, ano ang ginsiling ni Isaac sa iya? (Gen. 28:1-4)

  • Basaha ang Hebreo 12:16, 17.

    Sa halimbawa ni Esau, ano ang mangin resulta kon tamayon ang balaan nga mga butang?

Magtuon sing Dugang Pa

Si Jacob, si Esau, kag ang Linaga

Kilalaha sanday Jacob kag Esau! I-download kag i-print ini nga piktyur, dayon kolori ini.