Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 15: Nagbalikid ang Asawa ni Lot

Sugilanon 15: Nagbalikid ang Asawa ni Lot

Si Lot kag ang iya pamilya nagpuyo upod kay Abraham sa Canaan. Isa ka adlaw si Abraham nagsiling kay Lot: ‘Kulang ang duta diri para sa aton tanan nga sapat. Palihug magbulag kita.’

Nakita ni Lot ang matahom nga bahin sang pungsod nga may tubig kag madamu nga hilamon para sa iya mga sapat. Amo yadto ang Distrito sang Jordan. Gani ginsaylo ni Lot ang iya pamilya kag mga sapat didto. Sang ulihi nagpatindog sila sing balay sa siudad sang Sodoma.

Ang kataohan sang Sodoma malaut gid. Naakig si Lot sa sini, kay maayo sia nga tao. Naakig man ang Dios. Sang ulihi, nagpadala ang Dios sing duha ka anghel agod paandaman si Lot nga laglagon niya ang Sodoma kag ang kaiping nga siudad sang Gomorra bangod sang ila kalautan.

Ang mga anghel nagsiling kay Lot: ‘Dali! Upda ang imo asawa kag duha ka anak nga babae kag maggua diri!’ Nian gindapit sila sang mga anghel kag gintuytoyan pagua sa siudad. Ang isa sa mga anghel nagsiling: ‘Dalagan sing madasig! Dili magbalikid.’

Gani si Lot kag iya mga anak nagdalagan. Wala sila magbalikid. Apang ang asawa ni Lot naglalis. Nagdulog sia kag nagbalikid sa Sodoma. Nian ang asawa ni Lot nangin haligi nga asin. Makita mo bala sia sa laragway?

Ginapakita sini sa aton nga ginaluas sang Dios ang nagatuman sa iya, apang ang wala nagatuman sa iya malaglag.

Genesis 13:5-13; 18:20-33; 19:1-29; Lucas 17:28-32; 2 Pedro 2:6-8.

Nagapalagyo si Lot sa Sodoma


Mga Pamangkot:

  • Ngaa nagbulagay si Abraham kag si Lot?
  • Ngaa ginpili ni Lot nga magpuyo sa Sodoma?
  • Ano nga sahi sang kataohan ang mga taga-Sodoma?
  • Ano nga paandam ang ginhatag sang duha ka anghel kay Lot?
  • Ngaa ang asawa ni Lot nangin haligi nga asin?
  • Ano nga leksion ang matun-an naton gikan sa asawa ni Lot?

Dugang pa nga mga pamangkot

  • Basaha ang Genesis 13:5-13.

    Tuhoy sa paghusay sa mga problema sa ulot sang mga indibidual, ano nga leksion ang maton-an naton gikan kay Abraham? (Gen. 13:8, 9; Roma 12:10; Fil. 2:3, 4)

  • Basaha ang Genesis 18:20-33.

    Paano ang pagpakig-angot ni Jehova kay Abraham nagapasalig sa aton nga si Jehova kag si Jesus magahukom sing matarong? (Gen. 18:25, 26; Mat. 25:31-33)

  • Basaha ang Genesis 19:1-29.

    Suno sa rekord sang Biblia, ano ang pagtamod sang Dios sa homoseksualidad? (Gen. 19:5, 13; Lev. 20:13)

    Sa pagsunod sa sugo sang Dios, paano si Lot tuhay kay Abraham, kag ano ang matun-an naton gikan sa sini? (Gen. 19:15, 16, 19, 20; 22:3)

  • Basaha ang Lucas 17:28-32.

    Ano ang panimuot sang tagipusuon sang asawa ni Lot sa materyal nga mga butang, kag paano ini isa ka paandam sa aton? (Luc. 12:15; 17:31, 32; Mat. 6:19-21, 25)

  • Basaha ang 2 Pedro 2:6-8.

    Sa pag-ilog kay Lot, paano naton dapat tamdon ang di-diosnon nga kalibutan sa palibot naton? (Ezeq. 9:4; 1 Juan 2:15-17)

Magtuon sing Dugang Pa

Ang Asawa ni Lot Nangin Haligi nga Asin

Basaha ang istorya sa Biblia kag isugpon ang mga pintok. Ano nga leksion ang matun-an mo sa asawa ni Lot?

Si Lot kag ang Iya Pamilya—Istorya nga May Piktyur

I-download ini, kag hibalua kon ano ang imo matun-an kay Lot kag sa iya pamilya.