Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 13: Abraham—Abyan sang Dios

Sugilanon 13: Abraham—Abyan sang Dios

ANG isa sang mga lugar nga ginpuy-an sang mga tao sa tapos sang Anaw amo ang Ur. Nangin importante ini nga siudad, apang ang mga tao didto nagasimba sa butig nga mga dios. Indi sila kaangay ni Noe kag sang iya anak nga si Sem, nga nag-alagad kay Jehova.

Sang ulihi, 350 ka tuig sa tapos sang anaw, ang matutom nga si Noe napatay. Duha ka tuig sang ulihi ang tao nga makita mo sa laragway natao. Pinasahi gid sia nga tao sa Dios. Sia si Abraham, kag nagpuyo sia upod sa iya pamilya sa siudad sang Ur.

Nagatan-aw si Abraham sa mga bituon

Isa ka adlaw si Jehova nagsiling kay Abraham: ‘Bayai ang Ur kag ang imo kahimataan, kag kadto ka sa pungsod nga ipakita ko sa imo.’ Gintuman bala ni Abraham ang Dios? Huo. Pirme gintuman ni Abraham ang Dios. Busa nakilal-an sia nga abyan sang Dios.

Ang amay ni Abraham nga si Tera nag-upod sa iya sang maghalin sia sa Ur. Amo man ang iya hinablos nga si Lot, kag, ang iya asawa nga si Sara. Nag-abot sila sa Haran, diin napatay si Tera.

Wala magdugay, si Abraham kag ang iya panimalay naghalin sa Haran kag nagsaylo sa Canaan. Didto si Jehova nagsiling: ‘Amo ini ang duta nga ihatag ko sa imo mga anak.’

Ginbuligan sang Dios si Abraham amo kon ngaa nagdamu ang iya mga karnero kag ginatos ang iya suloguon. Apang sia kag si Sara wala sing anak.

Sang 99 ka tuig si Abraham, si Jehova nagsiling: ‘Nagasaad ako nga mangin amay ka sang madamung pungsod sang mga tao.’ Apang paano ini matabu, bangod si Abraham kag si Sara tigulang na agod manganak?

Genesis 11:27-32; 12:1-7; 17:1-8, 15-17; 18:9-19.



Mga Pamangkot:

  • Ano nga sahi sang mga tao ang nagpuyo sa siudad sang Ur?
  • Sin-o ang tao nga yara sa laragway, san-o sia natao, kag diin sia nagpuyo?
  • Ano ang ginsugo ni Jehova kay Abraham?
  • Ngaa gintawag si Abraham nga abyan sang Dios?
  • Sin-o ang nag-upod kay Abraham sang maghalin sia sa Ur?
  • Ano ang ginsiling ni Jehova kay Abraham sang nakadangat sia sa duta sang Canaan?
  • Ano ang ginsaad ni Jehova kay Abraham sang 99 anyos sia?

Dugang pa nga mga pamangkot

  • Basaha ang Genesis 11:27-32.

    Ano ang relasyon ni Abraham kay Lot? (Gen. 11:27)

    Bisan pa si Tera ang ginpadunggan nga nagsaylo sang iya pamilya sa Canaan, paano naton nahibaloan nga si Abraham ang aktual nga naghimu sini, kag ngaa ginhimu niya ini? (Gen. 11:31; Bin. 7:2-4)

  • Basaha ang Genesis 12:1-7.

    Ano nga pagpasangkad sa Abrahamiko nga katipan ang ginhimu ni Jehova sang nakalab-ot si Abraham sa duta sang Canaan? (Gen. 12:7)

  • Basaha ang Genesis 17:1-8, 15-17.

    Ano ang gin-ilis sa ngalan ni Abram sang 99 anyos sia, kag ngaa? (Gen. 17:5)

    Ano nga pagpakamaayo sa palaabuton ang ginsaad ni Jehova kay Sara? (Gen. 17:15, 16)

  • Basaha ang Genesis 18:9-19.

    Sa Genesis 18:19, ano nga mga responsibilidad ang ginapatuman para sa mga amay? (Deut. 6:6, 7; Efe. 6:4)

    Ano nga eksperiensia ni Sara ang nagapakita nga wala kita sing matago gikan kay Jehova? (Gen. 18:12, 15; Sal. 44:21)

Magtuon sing Dugang Pa

Ano ang Matun-an Naton kay Abraham?

Paano ginpakita ni Abraham ang kaayo sa iban? Hibalua paagi sa pag-download sini kag pagbasa sini nga istorya sa Biblia.