Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 12: Ang mga Tao Nagpatindog sing Daku nga Torre

Sugilanon 12: Ang mga Tao Nagpatindog sing Daku nga Torre

NAGLIGAD ang madamung tinuig. Ang mga anak ni Noe may madamung anak, kag wala magdugay madamu na sing tao sa duta.

Ang isa sini amo ang apo sa tuhod ni Noe nga si Nimrod. Malain sia nga tao nga nagapangayam kag nagapamatay sing sapat kag tao. Ginhimu niya ang iya kaugalingon nga hari. Wala maluyagi sang Dios si Nimrod.

Ang tanan nga tao sadto nagahambal sing isa ka pamulong. Luyag ni Nimrod nga magtipon sila agod makagahom sia sa ila. Gani ginsugiran niya ang mga tao nga magpatindog sing siudad kag sing daku nga torre sa sini. Tan-awa sila sa laragway nga nagapanghimu sing tisa.

Wala nahamuot si Jehova nga Dios sa sini. Apang ang mga tao nagsiling: ‘Magpatindog kita sing siudad kag mataas nga torre nga lab-ot sa langit. Nian mangin bantog kita!’ Luyag nila padunggan ang ila kaugalingon, indi ang Dios.

Nahibaloan mo bala kon paano ginpauntat sang Dios ang pagpatindog sing torre sang mga tao? Sa hinali ginpahambal siya sila sing lainlain nga pamulong. Gani wala sila maghangpanay. Amo kon ngaa gintawag ang ila siudad Babel, ukon Babilonia, nga nagakahulogan “kagumon.”

Ang mga tao naghalin karon sa Babel. Ang mga grupo sang mga tao nga may isa ka pamulong nagkabuhi sing tingob sa iban nga mga bahin sang duta.

Genesis 10:1, 8-10; 11:1-9.

Mga trabahador nga nagapatindog sang daku nga torre


Mga Pamangkot:

  • Sin-o si Nimrod, kag paano sia gintamod sang Dios?
  • Sa laragway, ngaa nagapanghimu sing tisa ang mga tao?
  • Ngaa wala mahamuot si Jehova sa pagpatindog nga ginahimu sang mga tao?
  • Paano ginpauntat sang Dios ang pagpatindog sing torre?
  • Ano ang gintawag sa siudad, kag ano ang kahulugan sina nga ngalan?
  • Ano ang natabu sa mga tao sang gingumon sang Dios ang ila mga pamulong?

Dugang pa nga mga pamangkot

  • Basaha ang Genesis 10:1, 8-10.

    Ano ang mga kinaiya ni Nimrod, kag ano nga paandam ang ginahatag sini sa aton? (Hulu. 3:31)

  • Basaha ang Genesis 11:1-9.

    Ano ang motibo sa pagpatindog sing torre, kag ngaa wala matapos ini nga proyekto? (Gen. 11:4; Hulu. 16:18; Juan 5:44)