Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 11: Ang Nahaunang Balangaw

Sugilanon 11: Ang Nahaunang Balangaw

NAHIBALOAN mo bala ang nahauna nga ginhimu ni Noe sang sia kag ang iya pamilya naggua sa arka? Naghalad sia sing dulot sa Dios. Makita mo bala sa laragway ang iya paghimu sini? Ginhalad ni Noe ining mga sapat agod pasalamatan ang Dios sa pagluas sang iya pamilya gikan sa anaw

Ang arka kag ang balangaw

Sa banta mo bala nahamuot si Jehova sa dulot? Huo, nahamuot sia. Kag nanaad sia kay Noe nga indi na niya laglagon liwat ang kalibutan paagi sa anaw.

Wala madugay si Noe kag ang iya pamilya nangabuhi sing panibag-o sa gua sang arka. Ginpakamaayo sila sang Dios kag ginsilingan: ‘Dapat mag-anak kamo sing madamu. Dapat magdamu kamo tubtob maglapnag ang kataohan sa duta.’

Si Noe kag ang iya pamilya

Apang sang ulihi, ang mga tao mahimu nahadlok nga ang anaw kaangay sadto matabu liwat. Gani sa pagpahanumdom sa mga tao sang iya saad nga indi na pag-anawon liwat ang bug-os nga duta may ginhatag ang Dios. Nahibaloan mo bala kon ano ini? Isa ka balangaw. Nakakita ka na bala sing balangaw? Makita mo bala ini sa laragway?

Ang Dios nagsaad: ‘Dili na liwat paglaglagon sing anaw ang tanan nga tao kag sapat. Ginabutang ko ang akon balangaw sa mga panganod. Kag kon maggua ang balangaw, makita ko ini kag dumdomon ang akon saad.’

Gani kon makakita ikaw sing balangaw, ano ang madumdoman mo? Huo, ang saad sang Dios nga indi na niya paglaglagon liwat ang kalibutan paagi sa anaw.

Genesis 8:18-22; 9:9-17.



Mga Pamangkot:

  • Subong sang ginapakita sa laragway, ano ang nahauna nga ginhimu ni Noe paggua niya sa arka?
  • Ano nga sugo ang ginhatag sang Dios kay Noe kag sa iya pamilya pagkatapos sang Anaw?
  • Ano ang ginsaad sang Dios?
  • Kon makakita kita sing balangaw, ano ang madumduman naton?

Dugang pa nga mga pamangkot

  • Basaha ang Genesis 8:18-22.

    Paano kita sa karon makahatag sing “kaamyon” kay Jehova? (Gen. 8:21; Heb. 13:15, 16)

    Ano ang ginsiling ni Jehova tuhoy sa tagipusuon sang tao, kag gani, ano nga paghalong ang dapat himuon naton? (Gen. 8:21; Mat. 15:18, 19)

  • Basaha ang Genesis 9:9-17.

    Ano nga katipan ang ginhimu ni Jehova upod sa tanan nga mga tinuga sa duta? (Gen. 9:10, 11)

    Tubtob san-o magapabilin ang katipan may kaangtanan sa balangaw? (Gen. 9:16)

Magtuon sing Dugang Pa

Naluwas si Noe “Kaupod sang Pito Pa”

Paano naluwas si Noe kag ang iya pamilya sa pinakamabudlay sa tion sang kasaysayan sang tawo?