Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 9: Si Noe Nagtukod sing Arka

Sugilanon 9: Si Noe Nagtukod sing Arka
Ginakadlawan sang mga tawo si Noe

SI Noe may asawa kag tatlo ka anak nga lalaki. Ang iya mga anak amo sanday Sem, Ham kag Japet. Kag ang kada isa sining mga anak may asawa. Gani may walo ka tao sa pamilya ni Noe.

Ang Dios nagsiling karon kay Noe nga magtukod sing daku nga arka. Ining arka daku kaangay sang barko, apang ang hitsura sini subong sang isa ka daku, malaba nga kahon. May tatlo ka panalgan ini. May mga hulot ini para kay Noe kag sa iya pamilya, sa mga sapat, kag sa pagkaon nga ila kinahanglanon.

Ang Dios nagsiling kay Noe: ‘Magapadala ako sing anaw sang mga tubig kag laglagon ang bug-os nga kalibutan. Ang tanan nga wala sa arka mapatay.’

Si Noe kag ang iya mga anak nagtuman kay Jehova kag nagsugod sa pagtukod. Apang ang iban nga mga tao nagkadlaw lamang. Wala sing may nagpati sang ginsiling ni Noe ang himuon sang Dios.

Ginpasulod nanday Noe ang mga sapat kag mga pagkaon sa arka

Pagligad sang madamu nga tuig, nahuman ang arka. Karon ginsilingan sang Dios si Noe nga pasudlon sa arka ang mga sapat kag mga pispis. Ang Dios nagsiling nga pasudlon ang duha sa pila ka sahi sang mga sapat, lalaki kag babae. Apang sa iban nga sahi sang mga sapat, ang Dios nagsiling kay Noe nga magpasulod sing pito. Ginhimu gid ni Noe ang ginsiling sang Dios.

Pagkatapos, si Noe kag ang iya pamilya nagsulod man sa arka. Nian ginsira sang Dios ang ganhaan. Hunahonaa lamang nga ikaw didto sa arka upod nila, nga nagahulat. Magaanaw gid bala?

Genesis 6:9-22; 7:1-9.



Mga Pamangkot:

  • Pila ang katapo sang pamilya ni Noe, kag sin-o ang iya tatlo ka anak nga lalaki?
  • Ano ang ginpahimu sang Dios kay Noe, kag ngaa?
  • Ano ang reaksion sang mga isigkatao ni Noe sang ginsugiran niya sila tuhoy sa arka?
  • Ano ang ginsiling sang Dios nga himuon ni Noe sa mga sapat?
  • Sa tapos masira sang Dios ang ganhaan sang arka, ano ang dapat himuon ni Noe kag sang iya pamilya?

Dugang pa nga mga pamangkot

  • Basaha ang Genesis 6:9-22.

    Ngaa si Noe nangin isa ka talalupangdon nga sumilimba sang matuod nga Dios? (Gen. 6:9, 22)

    Ano ang pagtamod ni Jehova sa kasingki, kag ano ang epekto sini sa aton pagpili sing kalingawan? (Gen. 6:11, 12; Sal. 11:5)

    Paano naton mailog si Noe kon makabaton kita sing instruksion paagi sa organisasyon ni Jehova? (Gen. 6:22; 1 Juan 5:3)

  • Basaha ang Genesis 7:1-9.

    Bisan pa si Noe di-himpit, paano sia gintamod ni Jehova, kag paano ini nagapalig-on sa aton karon? (Gen. 7:1; Hulu. 10:16; Isa. 26:7)