Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 7: Ang Maisog nga Tao

Sugilanon 7: Ang Maisog nga Tao
Si Enoc

SAMTANG nagadamu ang tao sa duta, kalabanan sa ila naghimu sing malain kaangay ni Cain. Apang ang isa ka tao tuhay. Ining tao amo si Enoc. Si Enoc isa ka maisog nga tao. Nag-alagad sia sa Dios.

Nahibaloan mo bala kon ngaa ang mga tao sadto naghimu sing madamu gid nga kalainan? Ti, hunahonaa, Sin-o ang nagpalalis kanday Adan kag Eva sa Dios? Huo, isa yadto ka malain nga anghel. Ang Biblia nagatawag sa iya nga Satanas. Luyag niya nga ang tanan maglain.

Ginkawatan kag ginpatay

Isa ka adlaw ginsugo ni Jehova nga Dios si Enoc nga isugid sa mga tao ang indi nila luyag mabatian. Amo ini: ‘Sa pila ka adlaw laglagon sang Dios ang tanan nga malain.’ Ayhan naakig gid ang mga tao sa pagpamati sini. Gani dapat magmaisog gid si Enoc.

Wala ginpalawig sang Dios ang kabuhi ni Enoc sa tunga sadtong malain nga kataohan. Si Enoc nagkabuhi sing 365 ka tuig lamang. Sa pagkamatuod, mas malaba ang kabuhi sang mga tao sadto sang sa karon. Ti, ang anak nga lalaki ni Enoc nga si Metusela nagkabuhi sing 969 ka tuig!

Mga tawo nga nagahimo sang kalautan

Bueno, sang mapatay si Enoc, naglain pa gid ang kataohan. Ang Biblia nagasiling nga ‘ang duta napuno sing kasingki.’

Nahibaloan mo bala ang isa sa mga rason kon ngaa may tuman nga kagamo sadtong mga adlaw? Bangod si Satanas may bag-ong paagi sa paghaylo sa mga tao nga maghimu sing malain. Maton-an naton ini sa masunod.

Genesis 5:21-24, 27; 6:5; Hebreo 11:5; Judas 14, 15.



Mga Pamangkot:

  • Paano si Enoc tuhay?
  • Ngaa ang mga tao sang adlaw ni Enoc naghimu sing madamu gid nga kalainan?
  • Ano nga mga kalainan ang ginhimu sang mga tao sadto? (Tan-awa ang laragway.)
  • Ngaa dapat magmaisog si Enoc?
  • Daw ano kalawig ang kabuhi sang mga tao sadto, apang daw ano kalawig nagkabuhi si Enoc?
  • Ano ang natabu sang mapatay si Enoc?

Dugang pa nga mga pamangkot

  • Basaha ang Genesis 5:21-24, 27.

    Daw ano ka suod ang kaangtanan ni Enoc kay Jehova? (Gen. 5:24)

    Suno sa Biblia, sin-o ang pinakatigulang nga tao nga nabuhi, kag pila ang edad niya sang napatay sia? (Gen. 5:27)

  • Basaha ang Genesis 6:5.

    Daw ano kalain ang kahimtangan sa duta sa tapos mapatay si Enoc, kag kamusta ini kon ipaanggid sa aton adlaw? (2 Tim. 3:13)

  • Basaha ang Hebreo 11:5.

    Ano nga kinaiya ni Enoc ang “nakapahamuot sa Dios,” kag ano ang resulta? (Gen. 5:22)

  • Basaha ang Judas 14, 15.

    Paano mailog sang mga Cristiano karon ang kaisog ni Enoc kon nagapaandam sa mga tao tuhoy sa nagapakari nga inaway sang Armagedon? (2 Tim. 4:2; Heb. 13:6)