Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 5: Nagbudlay ang Pangabuhi

Sugilanon 5: Nagbudlay ang Pangabuhi

SA GUA sang katamnan sang Eden, sanday Adan kag Eva dapat magpangabudlay sing lakas agod makakaon. Sa baylo sang matahom hamungang mga kahoy, madamu nga sapinit kag ragiwriw ang ila nakita. Amo sini bangod ginlalis nanday Adan kag Eva ang Dios kag indi na mga abyan sang Dios.

Si Adan nga nagapangabudlay sing lakas upod sa iya anak nga lalaki

Apang malain pa, sanday Adan kag Eva mapatay na. Dumdoma ang ginsiling sang Dios nga mapatay sila kon kaunon nila ang prutas sang isa ka kahoy. Ti, sang adlaw nga nagkaon sila nagsugod sila nga mapatay.

Ang mga anak nanday Adan kag Eva natao tanan sa tapos ginpagua sang Dios ang ila mga ginikanan sa katamnan sang Eden. Buot silingon magatigulang man kag mapatay ang mga anak.

Kon gintuman lamang nanday Adan kag Eva si Jehova, makalilipay tani ang kabuhi para sa ila kag sa ila mga anak. Wala kuntani sing magtigulang, magmasakit kag mapatay.

Luyag sang Dios nga mabuhi ang mga tao sa walay katubtoban sa kalipay, kag ginsaad niya ini sa pila ka adlaw. Ang tanan mangin abyan sang Dios. Kag ang bug-os nga duta magmatahom.

Si Eva kag ang iya mga bata

Apang si Eva indi na abyan sang Dios. Gani ginsakitan sia sang manganak sia. Ang paglalis kay Jehova nagdala sing daku nga kasubu, indi bala?

Sanday Adan kag Eva may madamu nga anak. Ang ngalan sang ila una nga anak amo si Cain. Kag ang ngalan sang ila ikaduha nga anak amo si Abel. Nakahibalo ka bala kon ano ang natabu sa ila?

Genesis 3:16-23; 4:1, 2; Bugna 21:3, 4.



Mga Pamangkot:

  • Ano ang kahimtangan sang kabuhi ni Adan kag ni Eva sa gua sang katamnan sang Eden?
  • Ano na ang natabu kay Adan kag kay Eva, kag ngaa?
  • Ngaa magatigulang kag mapatay ang mga anak ni Adan kag ni Eva?
  • Kon gintuman lamang ni Adan kag ni Eva si Jehova, ano kuntani ang kabuhi para sa ila kag sa ila mga anak?
  • Paano ang paglalis ni Eva naghatag sa iya sing kasakit?
  • Sin-o ang una nga duha ka anak nga lalaki ni Adan kag ni Eva?
  • Sin-o ang iban pa nga mga anak sa laragway?

Dugang pa nga mga pamangkot

  • Basaha ang Genesis 3:16-23 kag 4:1, 2.

    Paano ang kabuhi ni Adan naapektuhan sang pagpakamalaut sa duta? (Gen. 3:17-19; Roma 8:20, 22)

    Ngaa ang ngalan ni Eva, nga nagakahulugan sing “Isa nga Nagakabuhi,” nagakaigo? (Gen. 3:20)

    Paano si Jehova nagpakita sing konsiderasyon kay Adan kag kay Eva bisan pa sang nakasala na sila? (Gen. 3:7, 21)

  • Basaha ang Bugna 21:3, 4.

    Anong “nahaunang mga butang” ang ginapaabot mo nga dulaon?