Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 2: Matahom nga Katamnan

Sugilanon 2: Matahom nga Katamnan

TAN-AWA diri ang duta! Daw ano katahom ang tanan! Makita mo bala ang kakahoyan, kabulakan kag tanan nga sapat? Diin naghalin ining matahom nga katamnan? Ti, ginhimu ini sang Dios.

Mga sapat sa katamnan sang Eden

Una, ginhimu sang Dios ang lunhaw nga kahilamnan sa pagtabon sang duta. Nian ginhimu niya ang tanan nga sahi sang diutay nga mga tanum kag kakahoyan. Nagpatahom ini sang duta, kag ang iban sini nagahatag sa aton sing pagkaon nga tuman kanamit.

Nian ginhimu sang Dios ang isda sa paglangoy sa tubig, kag ang pispis sa paglupad sa langit. Naghimu sia sing dalagku kag diutay nga sapat. Ano nga sapat ang nagakabuhi malapit sa inyo balay?

Sang ulihi naghimu ang Dios sing duog nga gintawag katamnan sang Eden. Pinasahi gid yadto nga duog. Ang tanan matahom didto, kag luyag sang Dios nga ang bug-os nga duta mangin kaangay sining matahom nga katamnan.

Apang tan-awa liwat ang laragway sang katamnan. Nakahibalo ka bala kon ano ang kulang? Tan-awon ta.

Genesis 1:11-25; 2:8, 9.



Mga Pamangkot:

  • Paano ginhanda sang Dios ang duta agod mangin puloy-an naton?
  • Ilaragway ang nanuhaytuhay nga mga sapat nga ginhimu sang Dios. (Tan-awa ang laragway.)
  • Ngaa pinasahi gid ang katamnan sang Eden?
  • Luyag sang Dios nga mangin kaangay sang ano ang bug-os nga duta?

Dugang pa nga mga pamangkot

  • Basaha ang Genesis 1:11-25.

    Ano ang gintuga sang Dios sa ikatlo nga adlaw sang pagpanuga? (Gen. 1:12)

    Ano ang natabu sa ikap-at nga adlaw sang pagpanuga? (Gen. 1:16)

    Ano nga mga sapat ang ginhimu sang Dios sa ikalima kag ikan-um nga adlaw? (Gen. 1:20, 21, 25)

  • Basaha ang Genesis 2:8, 9.

    Anong duha ka pinasahi nga kahoy ang ginbutang sang Dios sa katamnan, kag ano ang ginsimbulo sini?