PADAYON nga nagalala ang kahimtangan sa kalibutan ni Satanas. Sa pihak nga bahin, padayon nga ‘madamo sing ginahimo sa hilikuton sang Ginuo’ ang matuod nga mga sumilimba ni Jehova. (1 Cor. 15:58) Ginapakita sang masunod nga mga report nga ginatinguhaan gid sang mga Saksi ni Jehova sa bilog nga kalibutan nga ipakita ang ‘pagsalig kay Jehova . . . , paghimo sing maayo . . . , kag katutom.’—Sal. 37:3.

Pagsaylo sang Ulong Talatapan kag Sanga Talatapan

Sang Pebrero 1, 2016, natapos ang ginpasangkad nga pasilidad sa Wallkill, New York, amo nga nagsaylo diri ang Komite sang Sanga, Service Department, kag iban pa nga departamento sang sanga sang United States. Kag bangod manugtapos naman ang bag-o nga ulong talatapan sa Warwick, ang pamilya Bethel sa Brooklyn nag-amat-amat na sa ila daku nga pagsaylo halin sa New York City pakadto sa bag-o nga ulong talatapan.

 Sa Lunes, Abril 3, 2017, buksan sa ulong talatapan sa Warwick ang tatlo ka eksibit nga puede mo malibot nga ikaw lang kag isa ka tour upod sa tour guide.

  1. “The Bible and the Divine Name.” Makita sa sini nga eksibit ang malaka lang makita nga mga Biblia kag ginapadaku sini nga ang ngalan sang Dios mabasa sa Kasulatan.

  2. “A People for Jehovah’s Name.” Makita diri ang kasaysayan sang espirituwal nga palanublion sang mga Saksi ni Jehova, kon paano amat-amat nga gingiyahan, gintudluan, kag gin-organisar ni Jehova ang iya katawhan sa paghimo sang iya kabubut-on.

  3. “World Headquarters—Faith in Action.” Sa sini nga eksibit puede makapakigbahin ang ga-tour. Ginapaathag sa sini nga eksibit kon paano ginabuligan sang mga komite sang Nagadumala nga Hubon ang katawhan ni Jehova agod magtipon sing tingob, maghimo sing disipulo, magtigayon sang espirituwal nga pagkaon, kag magpakita sang gugma sa isa kag isa.

Ini nga mga eksibit nga puede mo malibot nga ikaw lang bukas kon Lunes asta Biernes halin 8:00 a.m. asta 4:00 p.m. Ang mga bisita mahimo man makalibot sa sulod sang 20 minutos upod sa tour guide sa pila ka bahin sang Mga Opisina/Services Building kag sa palibot sang Bethel. Ining malip-ot nga tour upod sa tour guide bukas kon Lunes asta Biernes halin 8:00 a.m. asta 11:00 a.m. kag halin 1:00 p.m asta 4:00 p.m.

Antes magbisita, palihug kadtui ang jw.org/hil kag tan-awa ang PARTE SA AMON > OPISINA KAG TOUR > United States.