Si Genadi Gudadze, isa ka manugtatap sang sirkito sang maaga nga bahin sang dekada 90

 SANG 1991, nabungkag ang Soviet Union kag nangin independiente ang Georgia. Pero madasig nga nagbudlay ang kahimtangan sa pagkabuhi bangod sa pagbag-o sa pulitika kag kinagamo. Nadumduman pa ni Genadi Gudadze, isa ka manugtatap sang sirkito sadto nga tion, nga halos bilog nga adlaw nagalinya ang mga tawo para makabakal sing tinapay.

Sa sini nga tion, kinaandan na sa mga Saksi nga ipaambit ang mensahe sang Biblia sa mga grupo sang tawo nga nagalinya. Nagsiling si Genadi: “Sadtong mabudlay nga tinuig, halos tanan nagabaton sang kamatuoran. Nakabaton kami sang ginatos ka adres sang mga luyag magtuon sa Biblia.”

 Kada tapos sang miting, ginabasa sang responsable nga mga brother ang listahan sang ngalan kag adres sang mga nagpangabay nga bisitahan. Dayon, nagaboluntaryo ang mga manugbantala nga bisitahan sila.

Pagbantala sa mga nagalinya para makabakal sing tinapay sang dekada 90

Nadumduman ni Levani Sabashvili, isa ka gulang sa Tbilisi sadto nga tion, ang mag-asawa nga nagpangabay nga bisitahan. “May nagboluntaryo na nga mga manugbantala sa tanan nga adres luwas lang sa sini nga mag-asawa,” siling niya. “Malayo ang ila balay kag kalabanan sa amon may mga ginatun-an na sa Biblia.”

Pila ka bulan sang ulihi, nagpangabay naman ang mag-asawa nga tani bisitahan na sila. Dayon, nagpangabay sila sa ikatlo nga tion pero may upod na nga mensahe nga nagapakitluoy sa mga Saksi nga magpabilin sila nga hilway sa salabton sa dugo. (Binu. 20:26, 27) “Panahon sadto sang Bag-ong Tuig kag wala kami anay nagabisita sa mga tawo sa sina nga tion. Pero nagabatyag kami nga dapat na gid namon sila kadtuan,” hinumdom ni Levani.

Isa ka aga, indi gid makapati ining uhaw sa espirituwal nga mag-asawa nga sanday Roini kag Nana Grigalashvili nga bisan tuman ka tugnaw, nagkadto sa ila balay si Levani kag ang isa ka brother. Gilayon nga nasugdan ang pagtuon sa Biblia. Subong, nagapayunir sanday Roini kag Nana upod sa ila kabataan.

Mga Panikasog Para Malab-ot ang mga Interesado

Daku gid ang pagpasalamat sang mga nagbaton sang kamatuoran amo nga masinakripisyuhon nila nga ginhatag ang ila tion, kusog, kag pagkabutang para ipaambit ang maayong balita sa iban. Lakip sa ila amo sanday Badri kag Marina Kopaliani nga bisan pa sang mga responsibilidad sa pamilya, mapisan nga nagbiyahe sa malayo nga mga baryo para buligan ang mga sinsero.

 Kon Sabado kag Domingo, nagabiyahe sanday Badri kag Marina upod sa ila duha ka tin-edyer nga bata nga lalaki nga sanday Gocha kag Levani sa rehiyon sang Dusheti nga isa ka matahom nga kabukiran sa naaminhan sang Tbilisi. Kon kaisa, nagabiyahe sila sing mga 150 kilometros sa likuon nga mga dalan para malab-ot ang malayo nga mga baryo.

Isa ka adlaw, gin-agda si Badri kag ang iya asawa sang isa ka babayi sa iya ulubrahan. Nagsiling si Badri: “Nagsulod kami sa isa ka daku nga kuarto kag nagahulat sa amon ang mga 50 ka tawo! Nakibot gid ako, pero nangamuyo ako kay Jehova kag dayon ginbinagbinag ko sa ila ang mga bersikulo sa Mateo 24 parte sa mga tanda sang katapusan nga mga adlaw. Nakibot gid ang isa ka tawo amo nga namangkot sia, ‘Ngaa wala ini gintudlo sang mga pari sa amon?’”

Nakakuha sang Atension ang Memoryal

Ang Memoryal sang kamatayon ni Jesus naghatag sang dugang nga kahigayunan sa mga sinsero nga taga-Georgia  nga mabatian ang kamatuoran. Halimbawa, sang ginhiwat ang Memoryal sa puluy-an ni Sister Ia Badridze sa Tbilisi sang 1990, nakuha sini ang atension sang iya mga kaingod.

Si Ia Badridze nag-akumodar sang 200 nga nagtambong sa Memoryal sa iya apartment

Gintanyag ni Sister Badridze ang iya apartment para hiwatan sang Memoryal. Gani, ginhawanan nila sang iya kabataan ang salas. Pero, diin sia makakuha sang bastante nga pulungkuan para sa mga bisita? Kinabatasan na sang mga pamilya sa Georgia nga mag-arkila sang mga lamesa kag pulungkuan para sa dalagku nga pagtililipon. Bangod pulungkuan lang ang iya ginaarkilahan, pirme sia ginapamangkot sang mga tag-iya: “Indi mo kinahanglan ang lamesa? Diin kamo makaon?”

Ang apartment ni Sister Badridze yara sa ika-13 nga panalgan kag naakumodar sini ang tanan nga nagkadto agod dumdumon ang kamatayon ni Jesus. Daw indi mapatihan nga 200 ang nagtambong! Amo nga madamo sa iya kaingod ang nagpamangkot parte sa mga Saksi ni Jehova.

Indi Malipatan nga Memoryal

Sang 1992, gin-arkilahan ang dalagku nga mga awditoryum para hiwatan sang Memoryal sa lainlain nga bahin sang pungsod. Nadumduman ni Davit Samkharadze nga  nagaistar sa Gori sang namangkot ang nagalakbay nga manugtatap parte sa ila plano sa Memoryal.

Sang nahibaluan niya nga plano sang mga manugbantala nga magtipon sa isa ka puluy-an, namangkot sia: “May daku bala nga awditoryum sa siudad? Ngaa abi indi ninyo ini pag-arkilahan?” Pero, bangod sobra 1,000 ang kapasidad sang awditoryum kag sobra 100 lang ang manugbantala, pamatyag nila indi ini praktikal.

Dayon, nagpanugda ang manugtatap: “Kon ang kada manugbantala makapatambong sang napulo ka tawo, mapuno ini.” Bisan pa sa una daw indi ini realistiko, nanikasog gid ang mga manugbantala nga sundon ini. Tuman gid ang ila kalipay kay daw indi mapatihan nga 1,036 ang nagtambong sa Memoryal! *

Nabantalaan ang Iban Pa nga Lugar

Sang 1992, may mga lugar pa sa Georgia nga wala mabantalaan sang mensahe sang Biblia. Paano ayhan malab-ot ini nga mga lugar kay ang pungsod tuman ka pigado?

Si Tamazi Biblaia nga sa sina nga tion nagaistar sa nakatundan sang Georgia, naghinumdom: “Gin-istorya sang nagalakbay nga manugtatap ang pila sa amon kon ano ang puede himuon. Bisan diutay lang ang amon nahibaluan parte sa kahimusan sang pag-espesyal payunir, nakahibalo kami nga kinahanglan gid ibantala ang maayong balita.” (2 Tim. 4:2) Gani, nagpili sila sang 16 ka payunir kag gin-asayn sa lainlain nga lugar sa bug-os nga pungsod.—Tan-awa ang mapa.

Mga lugar nga gin-asaynan sa mga payunir sa sulod sang lima ka bulan

Sang Mayo 1992, may tatlo ka oras nga miting nga ginhiwat sa Tbilisi para palig-unon ang mga payunir nga naasayn sing lima ka bulan sa sadto nga mga lugar. Kada bulan, ginaduaw sila sang mga gulang agod palig-unon, kag kon kinahanglanon ginabuligan man sila sa materyal.

 Ang duha ka sister nga payunir nga sanday Manea Aduashvili kag Nazy Zhvania naasayn sa banwa sang Ozurgeti. Si Manea nga 60 anyos sadto, naghinumdom: “Nakahibalo kami nga may interesado nga babayi nga nagaistar malapit sa Ozurgeti. Gani pag-abot gid namon, ginpahibalo namon sia nga makigkita kami sa iya. Pag-abot namon sa iya balay, nagahulat sia kag ang mga 30 pa nga ginpang-agda niya. Sa sina nga adlaw, madamo kami sang nasugdan nga pagtuon sa Biblia.”

Madamo man ang nasugdan nga pagtuon sa masunod nga binulan. Pagligad lang sang lima ka bulan, 12 na ang balawtismuhan!

Ginpadyaan ang Ila Pagsakripisyo

Ang duha ka brother nga payunir nga sanday Pavle Abdushelishvili kag Paata Morbedadze ginpadala sa Tsageri. Yari ini sa rehiyon nga ang mga tawo debotado sa dumaan nga mga tradisyon nga nasimbugan sang mga panudlo sang Cristiandad.

Ang palibot sang Tsageri

 Sang manug-abot na ang grabe nga tigtulugnaw, manugtapos naman ang lima ka bulan nga asaynment sang mga payunir, kag si Paata gin-agda sa pagbulig sa translation sa iban nga lugar. Gani kinahanglan nga magdesisyon si Pavle. Nagsiling sia: “Nakahibalo ako nga mabudlay gid kon tigtulugnaw sa Tsageri. Pero bangod nagakinahanglan pa sing dugang nga bulig ang amon mga ginatun-an sa Biblia, nagpabilin ako.”

“Nag-istar ako sa isa ka pamilya,” hinumdom ni Pavle. “Nagabantala ako kon adlaw. Kag kon gab-i, sa ila salas sa una nga panalgan, nagaupod ako sa sini nga pamilya agod magpainit-init sa palibot sang stove nga may gatong nga kahoy. Pero kon magsaka na ako sa akon kuarto, nagasuksok ako sang kalo kag nagapangurumbot sang madamol nga habol.”

Sang naduaw sang mga gulang si Pavle sang tigpamulak, 11 na ang kalipikado nga mangin di-bawtismado nga manugbantala. Sang ulihi, tanan sila nabawtismuhan.

^ par. 20 Sang 1992, may 1,869 ka makugi nga manugbantala sa Georgia kag 10,332 ang nagtambong sa Memoryal.