Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

2016 Tuigan nga Libro sang mga Saksi ni Jehova

 TALALUPANGDON NGA MGA HITABO SANG NAGLIGAD NGA TUIG

“Nanamian Gid Kami sa JW Broadcasting!”

“Nanamian Gid Kami sa JW Broadcasting!”

SANG Oktubre 6, 2014, ginsugdan ang Ingles nga estasyunan sang TV sa Internet nga ginatawag JW Broadcasting. * Sugod sang Agosto 2015, ang mga programa ginbadbad sa sobra 70 ka lenguahe agod mas madamo nga kauturan ang makabenepisyo sining makapabakod sa espirituwal nga programa. Madamo nga tumalan-aw sa bilog nga kalibutan ang nagapasalamat sa sining makakulunyag nga bag-o nga aman. Pero ano ang nadalahig agod maplastar ang JW Broadcasting?

 Kinahanglan ang nagakaigo nga hulot. Sa ulong talatapan sang mga Saksi ni Jehova sa Brooklyn, New York, napili ang pinakamaayo nga lokasyon sa bilding sa 30 Columbia Heights. Sa isa lang ka semana, nahawanan ini nga hulot, kag ginsugdan sang Maintenance Department ang pagpreparar sang hulot para sa produksion sang telebisyon samtang may grupo naman nga nagdesinyo sing pormal pero moderno nga estudyo. Madamo nga kauturan sa bilog nga Estados Unidos ang nangabudlay sing madamo nga oras kada adlaw sa pagdesinyo sang estudyo kag pagplano kon paano ini mahimo sing madasig. Ang pagpanalawsaw nga sa masami matapos sing binulan nahimo sa pila lang ka adlaw, kag maabtik nga nagpang-order ang Purchasing Department sing ginatos ka materyales.

Kinilometro nga kable ang gin-instalar, kag ginpat-od nila nga nagapanghikot sing maayo ang tanan nga kagamitan. Sa sina man nga tion, ang aton orkestra nagarekord sang musika sa mga estudyo sang aton audio/video sa Patterson sa bulig sang mga kauturan halin sa madamo nga pungsod nga nagkadto diri sa pagrekord. Ginsulat ang mga iskrip, ginhimo ang mga pag-akto liwat, kag ang mga utod sa audio/video sa Brooklyn, Patterson, kag Wallkill kag sa mga pungsod sa bilog nga duta nangabudlay gid para sa paghimo sing video. Sang natapos ang estudyo, kag natakod ang mga kagamitan, nagsugod ang paghanda sang mga ipasalida para sa unang pila ka bulan nga programa.

Ang rekording estudyo sang JW Broadcasting sa Brooklyn, New York

Sang ginpamangkot namon ang propesyonal sa sini kon daw ano kadugay mahimo ang isa ka estudyo nga amo sini kadaku, nagsiling sia nga kinaandan na nga  mga isa ka tuig kag tunga. Natapos ini sang aton mapisan nga mga kauturan sa duha lang ka bulan!

Makalilipay gid ang mga resulta! Ang bulanan nga programa, nga ginapagua sa una nga Lunes sang bulan, natan-aw sang sobra duha ka milyon ka beses sa sina nga bulan. Lakip sa iban nga video, natan-aw ini sing sobra napulo ka milyon ka beses kada bulan.

“Ang programa nagpasuod sa akon sa organisasyon ni Jehova kag sa Nagadumala nga Hubon. Kumbinsido ako nga bahin ako sang pamilya nga nagahigugmaanay gid.”—Kenya

Ano ang ginbatyag sang katawhan ni Jehova sa sining bag-o nga espirituwal nga aman? Yari ang pila sa mga pagpasalamat:

  • “Isa ini sa pinakamalipayon nga gab-i sa akon kabuhi! Sa sini nga gab-i, gintan-aw namon nga mag-asawa ang programa sa Mayo 2015 sa JW Broadcasting, kag indi malaragway ang akon kalipay. Isa ini sa labing hamili nga regalo nga akon nabaton halin kay Jehova. Nagapasalamat gid kami sa Nagadumala nga Hubon kag sa tanan nga kauturan nga nangabudlay sa sining dalayawon nga espirituwal nga aman.”—Indonesia.

  • “Sadto, madamo nga kauturan ang wala pa makabati sa pamulongpulong sang miembro sang Nagadumala nga Hubon. Sa karon, indi lamang namon sila mabatian kundi makita pa. Subong lang namon nabatyagan nga nahiusa gid kami sa Nagadumala nga Hubon kag sa mga kauturan sa bilog nga duta.”—Kenya.

  •  “Bangod indi Saksi ang akon bana, mabudlay gid himuon ang pangpamilya nga pagsimba upod sa akon duha ka bata nga tin-edyer. Gani para sa akon, nakabulig gid ang broadcasting. Nagapabatyag ini sa akon nga bahin ako sang organisasyon, kag nagapalig-on gid ini sa akon kag sa akon mga kabataan. Pagpakamaayo gid ini halin kay Jehova.”—Britanya.

  • “Nanamian gid kami sa JW Broadcasting! Kag ginsabat gid ang amon mga pangamuyo sang matigayon man sa iban nga lenguahe ang programa. Napalig-on gid ninyo kami mga kauturan samtang ginatan-aw namon ang inyo kasadya, kaayo, kag kalipay sa pagsimba kay Jehova. Sang ginsugdan ang aton programa sa TV, nabatyagan gid namon subong nga bahin kami sang matahom kag dalayawon nga organisasyon ni Jehova.”—Czech Republic.

  • “Ang pagpamati sa mga miembro sang Nagadumala nga Hubon sa amon lenguahe nagpasuod pa gid sa akon kay Jehova.”—Brazil.

  • “Nagaalagad ako kay Jehova sing 16 na ka tuig, pero ang nabatyagan ko karon nga kalipay mapaanggid sang ginbawtismuhan ako. Salamat sa inyo palangga nga mga utod, sa pag-aman sang JW Broadcasting.”—Brazil.

Sa bulig ni Jehova, nagasalig kita nga ang JW Broadcasting padayon nga mangin pagpakamaayo sa espirituwal para sa mga kauturan sa bilog nga kalibutan kag magadayaw kag magahimaya pa gid kay Jehova.