Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2016 Tuigan nga Libro sang mga Saksi ni Jehova

Rusya: Pagpaambit sang maayong balita sa Moscow

 TALALUPANGDON NGA MGA HITABO SANG NAGLIGAD NGA TUIG

Legal nga Pagpakigbato

Legal nga Pagpakigbato

Legal nga Pagparehistro

Ang legal nga pagparehistro indi kinahanglan sang mga Saksi ni Jehova agod mahimo nila ang ila relihioso nga hilikuton. Apang, ang pagparehistro magatugot sa ila nga magpanag-iya ukon mag-arkila sing propiedad para sa mga miting kag sa pagpasulod sang aton relihioso nga mga literatura sa pungsod.

  • Sang 2004, wala na ginkilala nga legal sang mga korte sa Rusya ang organisasyon nga gingamit sang mga Saksi ni Jehova sa Moscow. Subong resulta, naggrabe pa gid ang pagpamintas sa aton mga kauturan sa Moscow. Gingamo sila sang mga pulis, ginsakit ang pila sa ila sang mga tawo sa ila publiko nga pagministeryo, kag ginkanselar sang mga tag-iya sang mga tilipunan ang kontrata sa pag-arkila, amo nga wala na sing tilipunan ang mga kauturan sa ila pagsimba. Ang desisyon sang European Court of Human Rights (ECHR) sang 2010 nagkompirmar nga ginlapas sang Rusya ang mga kinamatarong sang mga Saksi  ni Jehova sa Moscow kag nagmando nga kilalahon liwat ang ila legal nga organisasyon. Nalipay kami sa pagpahibalo nga sang Mayo 27, 2015, ang Moscow Department of the Russian Federation Ministry of Justice nagrehistro sang bag-o nga Lokal nga Relihioso nga Organisasyon sang mga Saksi ni Jehova sa Moscow.

Pagbayad sing Buhis

Ang legal nga organisasyon nga gingamit sang mga Saksi ni Jehova sa bilog nga kalibutan kinaandan na nga wala ginapabayad sing buhis, pareho sa kalabanan nga relihioso kag nagabulig nga mga organisasyon. Apang kon kaisa, wala ginakilala sang mga gobierno nga hilway kita sa pagbayad sing buhis.

  • Sa Sweden, ang mga awtoridad nagainsister nga ang Bethel isa ka negosyo nga “nagapaobra” sa mga Bethelite kag indi relihioso nga establisimiento sang pinasahi nga bug-os tion nga mga ministro. Ang gobierno nagsuma sing linibo ka euro nga buhis nga bayaran sang Bethel kag indibiduwal nga mga Bethelite. Agod masolbar ini nga kaso, ang mga Saksi sa Sweden nagpasaka sing petisyon sa mga korte sa ila pungsod kag nagpadala sing anom ka magkatuhay nga petisyon sa ECHR.

Neutralidad kag Pagpangindi nga Magsoldado

Ginatuman gid sang katawhan ni Jehova ang sugo sang Biblia nga “salsalon nila ang ila mga espada nga mangin mga punta sang arado” kag indi “magtuon sa pagpakig-away.” (Isa. 2:4) Ginhuptan nila ang ila neutralidad bisan pa wala nagahatag ang pila ka gobierno sing alternatibo nga pagpangalagad subong sibilyan.

  • Ang kasuguan karon sa South Korea wala nagakilala sang kinamatarong sa pagpangindi nga magsoldado bangod sa konsiensia. Sang nagligad nga kapin sa 60 ka tuig, sobra 18,000 ka Saksi nga lalaki ang ginpriso sa pagpangindi nga magsoldado. Halos ang tanan nga Saksi sa pungsod may abyan ukon pamilya nga napriso. Sang 2004 kag 2011, ang Constitutional Court sang South Korea nagsiling nga nahisuno sa konstitusyon ina nga pagpriso. Apang, sang Hulyo 2015, naghiwat sing public hearing ang Korte agod mausisa liwat ini nga isyu. Ang mga Saksi ni Jehova sa bilog nga kalibutan nagapangamuyo nga masolbar na ining madugay na nga isyu agod ang aton pamatan-on nga mga kauturan  nga lalaki sa South Korea indi na pagprisuhon bangod sang ila pagtuo.

  • Tatlo ka Saksi ni Jehova sa Eritrea ang 22 ka tuig na nga napriso bangod sa pagpangindi nga magsoldado bangod sa konsiensia. Sanday Paulos Eyassu, Negede Teklemariam, kag Isaac Mogos wala napasakaan sing pormal nga kaso ukon nahatagan sing kahigayunan nga pangapinan ang ila kaugalingon sa korte. Upod sa sobra 50 ka utod nga lalaki kag babayi, padayon nila nga ginahuptan ang ila integridad bisan pa sa mapintas nga pagtratar sa ila kag mabudlay nga kahimtangan sa prisuhan. Nagasalig kita nga ‘pamatian ni Jehova ang pagpanghayhay’ sang mga napriso bangod sang ila pagtuo kag magahulag sia para sa ila.—Sal. 79:11.

  • Sa Ukraine, si Vitaliy Shalaiko ginpareport sang Agosto 2014 agod magsoldado bilang paghanda sa inaway. Bangod sang iya konsiensia, nangindi sia nga magsoldado pero nagpabutyag nga handa sia maghimo sing alternatibo nga pagpangalagad subong sibilyan. Ginkasuhan sang piskal si Utod Shalaiko nga hungod nga nagalikaw nga magsoldado, pero napamatud-an sa mga korte nga wala sia sing sala. Suno sa korte sang apelasyon wala sia sing sala kag nagsiling ini nga ang kabalaka sa seguridad sang Estado indi rason nga limitahan ang ginhatag nga mga  kinamatarong, kag “ang kinamatarong sa pagpangindi bangod sang konsiensia indi puede lapason bangod sa seguridad sang pungsod.” Nag-apelar liwat ang piskal. Sang Hunyo 23, 2015, ang High Specialized Court sang Ukraine para sa Sibil kag Kriminal nga mga Kaso nagsuporta sa mga desisyon sang manubo nga mga korte. Nagkompirmar ini nga ang kinamatarong sa pagpangindi bangod sang konsiensia kag ang alternatibo nga pagpangalagad maaplikar bisan sa tion sang mga emerhensia sang pungsod.

Ukraine: Si Vitaliy Shalaiko nalipay sa pagministeryo

Parte sa positibo nga resulta sang kaso ni Utod Shalaiko, nagsiling sia: “Napabakod ako sang Jeremias 1:19. Handa ako sa bisan ano nga resulta—ang pinakaimportante amo ang katutom kay Jehova. Nagasalig ako nga indi gid niya ako pagpabay-an kundi pabakuron ako nga magmatutom. Pero wala ko gid ginapaabot ang natabo. Napamatud-an nga wala ako sing sala sa tatlo ka korte. Kag sa tion sang tanan nga bista, nabatyagan ko ang bulig sang mga kauturan. Wala gid ako nagbatyag nga ginpabay-an.”

Neutralidad kag Patriotiko nga mga Seremonya

Isa man ka hangkat sa Cristianong neutralidad ang patriotiko nga mga seremonya. Ang mga pamatan-on ilabi na nga ginapilit nga magkompromiso sang ila integridad kay Jehova, bangod mahimo piliton sang tagdumalahan sang eskwelahan ang mga estudyante nga magkanta sing pungsudnon nga ambahanon ukon magsaludo sa bandera.

  • Sa Karongi District sang Rwanda, ginsumbong sang mga opisyal sang eskwelahan ang mga Saksi nga estudyante sing indi pagtahod sa pungsudnon nga ambahanon bangod wala sila nagakanta sini. Ginpahalin ang mga estudyante sa eskwelahan kag ginpriso pa gani. Sang Nobiembre 28, 2014, ang Intermediate Court sang Karongi nag-absuwelto sa mga estudyante kag nagdesisyon nga ang ila indi pagkanta sang pungsudnon nga ambahanon wala nagakahulugan nga wala sila sing pagtahod. Sa iban pa nga pungsod sa Aprika, pareho sang Cameroon, Democratic Republic of Congo, Equatorial Guinea, kag Malawi, ang pamatan-on nga mga Saksi nagaatubang man sing subong sini nga problema kag sa pila ka kahimtangan ginpahalin sila sa eskwelahan. Ang aton mga kauturan sa sini nga mga pungsod nagapanikasog  gid sa pagpahibalo sa mga opisyal sang gobierno kag sang eskwelahan parte sa neutral nga panindugan sang mga Saksi ni Jehova.

  • Honduras: Sanday Mirna Paz kag Bessy Serrano ginhatagan gid man sing mga diploma

    Sang Disiembre 2013, ang publiko nga eskwelahan sa Lepaera, Honduras, wala naghatag sing diploma sang hayskul sa duha ka Saksi nga estudyante bangod nangindi sila sa pagkanta sang pungsudnon nga ambahanon kag pagpanumpa sa bandera. Agod masolbar ini nga problema, nakig-istorya ang duha ka abogado nga Saksi ni Jehova sa representante sang Ministry of Education kag ginpakita sa iya ang legal nga basihan sang iban nga pungsod nga nagasakdag sa panindugan sang mga Saksi nga estudyante. Mabuot ang opisyal kag nagpasugot nga tugutan ang mga estudyante kag ang ila mga ginikanan nga isulat sa direktor sang mga abogado sang Secretariat of Education sa Honduras kon ano ang matuod nga rason. Sa tapos mausisa ang ila kaso, nagpagua sia sing mando sang Hulyo 29, 2014, nga nagasiling nga ang edukasyon “dapat matigayon sang [tanan sa] sosiedad nga wala sing bisan ano nga diskriminasyon” kag nagmando nga hatagan sing diploma ang mga Saksi nga estudyante.

Diskriminasyon sang Gobierno

Sa tagsa ka pungsod, subong mga Saksi ni Jehova, ginatuman naton ang sugo ni Jesus nga ipaambit ang maayong balita sang Ginharian sa aton mga isigkatawo, magtipon upod sa mga  masigkatumuluo agod magsimba, kag regular nga magtuon sa Pulong sang Dios. Ginatuman gid naton ang sugo sang Biblia nga ipatudok sa tagipusuon sang aton kabataan ang mga kasuguan ni Jehova kag “maglikaw . . . sa dugo.” (Binu. 15:20; Deut. 6:5-7) Kon kaisa, bangod sang pagtuman sa sini nga sugo, mahimo pamatukan kita sang mga opisyal sang gobierno nga wala makahangop sang aton panindugan.

  • Sa estado sang Florida, U.S.A., ang isa ka hukom nagdesisyon nga ang indi Saksi nga iloy amo lamang ang may kinamatarong sa pagtudlo parte sa relihion sa iya tatlo ka bata. Ang Saksi nga amay ginmanduan nga indi magtudlo sing bisan ano nga nagasumpakil sa Katoliko nga pagpati. Nag-apelar ang amay sa desisyon sang korte, kag sang Agosto 18, 2014, ginkuha sang korte sang apelasyon ang mga restriksion sang nauna nga korte. Base sa mga nadesisyunan nga mga kaso sang una, ang korte nagsulat: “Ang mga restriksion sa ginikanan, nga wala sa iya poder ang iya bata, nga itudlo ang iya relihioso nga mga pagpati pirme ginabaliskad kon wala ini sing maathag nga pamatuod nga ang relihioso nga mga buluhaton makahalit sa bata.”

    Ang desisyon naghatag sa mga bata sing kinamatarong nga makatuon sa mapuslanon nga instruksion kag panuytoy ni Jehova nga Dios. Nagauswag gid sila sa espirituwal samtang nagapakig-upod sila sa kongregasyon. Ang amay nagsiling: “Ang pagbatas sini nga sitwasyon nagpabakod gid sa akon. May pila ka pagtilaw sa akon pagtuo sining karon lang, pero ginbuligan ako ni Jehova nga makapanindugan! Nahibaluan ko nga ang paghingabot bahin na sang aton kabuhi sang nagdesisyon kita nga alagaron si Jehova.”

  • Namibia: Si Efigenia Semente upod sa iya tatlo ka bata

    Natilawan ang integridad ni Utod Efigenia Semente, iloy sang tatlo ka bata sa Namibia. Sang nagbata sia sa ospital sa iya ikatlo nga bata, nagkuha sing mando sa korte ang pila ka doktor kag ang iya indi Saksi nga pamilya agod piliton sia nga magpatughong sing dugo bangod sa komplikasyon. Namatok gid si Utod Semente nga magpatughong sing dugo kag ginpakigbato niya ini sa korte agod pangapinan ang iya kinamatarong sa pagdesisyon kon paano sia bulngon. Sang Hunyo 24, 2015, ang Korte Suprema sang Namibia nagsakdag sa desisyon ni Utod Semente, nga nagasiling nga “ang kinamatarong sa pagdesisyon kon ano ang himuon  kag indi himuon sa lawas sang isa, ginikanan man sia ukon indi, isa ka tawhanon nga kinamatarong nga indi makuha sa iya.” Si Utod Semente nagsiling: “Nabatyagan gid namon subong ang bulig ni Jehova. Makalilipay gid nga mangin bahin sining paghiliutod. Nagaulikid gid si Jehova.”

  • Ang mga Saksi sa Switzerland nanamian magpanaksi sa publiko sa mga kalye sa dalagku nga mga siudad. Apang nagpagua sing mando ang siudad sang Geneva nga dumilian ang paggamit sing “mga estante nga direkta ukon indi direkta nga nagapalapnag sing relihioso nga impormasyon sa publiko nga mga lugar.” Nagpasaka sing reklamo sa korte ang mga Saksi, nga nagapatalupangod nga ang kabilugan nga pagdumili sa pagpalapnag sing relihioso nga impormasyon nga nagagamit sing estante “nagalapas gid sa kahilwayan sa relihion kag opinyon.” Nag-ugyon ang korte, kag nagkooperar ang mga Saksi sa lokal nga awtoridad kon sa diin kag kon san-o sila magpanaksi sa publiko nga nagagamit sing estante.

  • Ang mga opisyal sang gobierno sa Azerbaijan nagpabaskog sang ila mga panikasog nga punggan ang relihioso nga hilikuton sang mga Saksi ni Jehova. Pirme ginapatawag sang Ministry of National Security ang indibiduwal nga mga Saksi agod interogahon. Ini nga ahensia nagapangusisa man sa mga balay sang mga  Saksi agod mangita sing mga literatura nga ginadumilian sang Estado nga ipasulod sa pungsod. Ang iban nga pungsod nakibot gid sang ginpriso sang Ministry of National Security sang Pebrero 2015, ang duha ka Saksi nga sanday Irina Zakharchenko kag Valida Jabrayilova, bangod lang sa pagsugid sang ginatudlo sang Biblia sa ila mga kaingod. Bisan pa nasubuan kita sa sini nga pagmaltratar, nalipay kita nga nahuptan sang mga manugbantala sa Azerbaijan ang ila kakugi kag kaisog sa pagpaambit sang “maayong balita sang Ginharian” sa ila mga isigkatawo.—Mat. 24:14.

  • Ang mga Saksi ni Jehova sa Rusya padayon gid nga ginatublag sang gobierno sa ila relihioso nga hilikuton. Sa karon, 80 ka publikasyon sang mga Saksi ni Jehova ang gindeklarar sang Russian Federation nga “batok sa gobierno.” Nagakahulugan ini nga ilegal ang pagpanagtag ukon pagpanag-iya sang bisan ano nga “batok sa gobierno” nga publikasyon, pareho sang Ang Akon Libro sang mga Sugilanon sa Biblia. Isa pa, sang Disiembre 2014, ang Korte Suprema sang Russian Federation nagdeklarar nga “batok sa gobierno” ang aton website nga jw.org. Wala ginatugutan sang mga nagaaman sang serbisyo sa Internet sa bilog nga Rusya ang pagsulod sa jw.org, kag ginkabig nga ilegal ang pagpasanyog sini nga site. Sugod sang Marso 2015, wala ginatugutan sang mga opisyal sang customs ang bisan ano nga kargamento nga literatura sang mga Saksi nga makasulod sa pungsod, bisan ang mga Biblia kag ang mga literatura nga nausisa na sadto sang mga korte sa Rusya kag nadeklarar na nila nga indi batok sa gobierno.

Padayon gihapon ang kaso sa siudad sang Taganrog, diin ginkasuhan sang awtoridad ang 16 ka manugbantala sing “paglapas sa kasuguan” bangod sa pag-organisar kag pagtambong sa relihioso nga mga miting. Sa siudad sang Samara, nagkuha sing mando sa korte ang awtoridad agod pauntaton ang aton legal nga korporasyon bangod “batok” kuno ini sa gobierno. Bisan pa sa sining mga kabudlayan, determinado ang aton mga kauturan sa Rusya nga ihatag “sa Dios ang mga butang nga iya sang Dios,” kag indi magpadala sa sini nga pagtublag.—Mat. 22:21.