Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

2016 Tuigan nga Libro sang mga Saksi ni Jehova

Tanzania: Ang mga nagalabay nagapakita sing interes sa displey sang literatura sa Dar es Salaam

 TALALUPANGDON NGA MGA HITABO SANG NAGLIGAD NGA TUIG

Paglab-ot sa mga Indi Mabantalaan

Paglab-ot sa mga Indi Mabantalaan

ANG pagpamalaybalay amo gihapon ang panguna nga paagi sang mga Saksi ni Jehova sa pagpalapnag sang kamatuoran sa Biblia, apang ang paggamit sing matahom nga mga lamesa kag cart sang mga literatura nangin epektibo gid nga paagi sa pagbantala sang Ginharian sang Dios. (Mat. 24:14) Ang mga manugbantala sang Ginharian naggamit sang mga estante, lamesa, kag mga puesto agod malab-ot ang mga tawo sa publiko nga mga lugar. Dugang pa, ang mga kongregasyon sa bilog nga duta ginpadal-an sing mga 250,000 ka cart. Ano ang resulta?

Sa Dar es Salaam, Tanzania, halos 700 ka tawo ang nangabay sing pagtuon sa Biblia sang ginsugdan ang programa nga special metropolitan public witnessing diri sang 2014. Madamo nga interesado ang nagatambong sa  mga miting kag nagapakigsuod sa Dios. Sa isa lang ka tuig, sobra 250,000 ka kopya sang literatura ang ginkuha sa cart sang mga tawo nga halin sa mga pungsod sang Aprika kag sa iban nga pungsod.

Sa Solomon Islands, diin wala pa 2,000 ang manugbantala sa malapad nga teritoryo nga may sobra 300 ka ginaistaran nga isla, ang special metropolitan public witnessing nangin importante nga paagi sa pagpalapnag sang mga binhi sang kamatuoran. Sa kapital nga siudad sang Honiara, ang mga kauturan nakapanagtag sing sobra 104,000 ka magasin kag sobra 23,600 ka brosyur sa mga tawo nga ang kalabanan sa ila naghalin sa mga isla kag naligwin nga mga lugar nga wala sing Saksi. Sa isa lang ka hapon, nakapahamtang sila sing 400 ka kopya sang Ano Gid ang Ginatudlo sang Biblia? kag 60 ka tawo ang nangabay sing pagtuon sa Biblia.

Isa ka aga, ang mga regular payunir nga sanday Michael kag Linda temprano pa nagbutang sang estante sang literatura sa baybay sa Margarita Island, Venezuela. Si Aníbal nagpalapit sa estante kag nagbaton sang Ginatudlo sang Biblia nga libro. Ginsilingan niya sila nga napatay ang iya tatay sa sina nga baybay sang nagligad nga pito ka tuig kag sugod sadto, ang iya iloy nagbalatian sing depresyon. Pagkasunod nga semana, nagbalik si Aníbal kag ginsilingan sanday Michael kag Linda nga anibersaryo sina nga adlaw sang kamatayon sang iya tatay. Ginkuha niya ang iya cell phone kag gintawgan ang iya nanay, kag ginpangabay si Michael nga lugpayan ang iya nanay, nga ginhimo man ni Michael. Sugod sadto, pila na ka beses nga gintawgan sang nanay sanday Michael kag Linda, kag ginasugiran nila sia  sang makapaumpaw nga mga teksto. Sa isa ka text, nagsiling ang nanay ni Aníbal, “Mas maayo na ang pamatyag ko karon bangod ginlugpayan kag ginbuligan ninyo ako nga magbakod ang akon pagtuo.”

Ang special metropolitan public witnessing gin-organisar sa 127 ka lokasyon sa 14 ka siudad sa Estados Unidos. Sa una nga pito ka bulan sang 2015 nga tuig sang pag-alagad, 8,445 ka pagtuon sa Biblia ang nasugdan! Ini nga pamaagi sang pagpanaksi nakabulig man sa madamo nga nagapakig-upod sadto sa matuod nga pagsimba nga magbalik. Halimbawa, si Terry nagatan-aw sa isa sang aton displey sang literatura sa Los Angeles, California, gani ginpalapitan sia sang mag-asawa nga Saksi kag ginpamangkot kon nakabasa na sia sang aton mga literatura. Ginpaathag niya nga isa sia ka Saksi ni Jehova pero nagbugnaw sing mga apat ka tuig. Ginbasa sang mag-asawa kag ginbinagbinag sa iya ang Ezequiel 34:11, diin si Jehova nagsiling: “Ako mismo ang magapangita kag magaatipan sa akon mga karnero.” Ginsilingan nila sia parte sa aton website kag JW Broadcasting. Pagkaaga, nag-email si Terry sa utod nga lalaki, nga nagapaathag nga antes pa niya nakita ang lamesa sang literatura, nangayo sia sing patawad sa Dios sa pagbiya sa mga miting sang kongregasyon. Nangayo man sia sing bulig agod mangin suod kay Jehova. “Dayon mainit nga gintamyaw ninyo ako,” siling ni Terry. “Ginbasa ninyo ang makapalig-on nga teksto sa akon kag ginhatagan ako sing impormasyon nga kinahanglan ko agod makabalik sa organisasyon ni Jehova. Sabat gid ina sa akon pangamuyo.”

May apat ka lokasyon para sa special metropolitan public witnessing sa Addis Ababa, Ethiopia. Sa sulod sang tatlo ka bulan, ang mga kauturan nakapahamtang sing 37,275 ka publikasyon, kag 629 ang nangabay nga bisitahan sang  mga Saksi. Lakip sa madamo nga nagbaton sang Ginatudlo sang Biblia nga libro amo ang tigulang nga lalaki nga nagbasa gilayon sini. Sang una, nagsulod sia sa seminaryo, kag madamo sia sing pamangkot parte kay Jesus kag sa Ginharian sang Dios. Gani pagkasunod nga adlaw, nagbalik sia sa estante agod masabat ang iya mga pamangkot.  Pagkadason nga adlaw, nagpasugot sia nga magtuon sa Biblia, kag sa talipuspusan sina nga semana, nagtambong sia sa miting. Regular na sia karon nga nagatambong sa aton mga miting kag nagauswag sing maayo.

Ethiopia: Displey sang literatura sa Amharic nga lenguahe sa Addis Ababa

Nagpalapit ang isa ka Judiyo sa estante sang literatura sa Mexico kag namangkot sa mga utod kon may balasahon sila parte sa kamatayon. Ginsilingan nila sia nga naubusan sila sing magasin nga nagabinagbinag sa kamatayon, pero gintanyagan nila sia sing balasahon nga nagabinagbinag parte sa palaabuton. Gin-uyatan sang tawo ang butkon sang utod kag nagsiling: “Indi ako interesado sa palaabuton. Gusto ko maghikog.” Dayon naghibi sia. Ginpamangkot sia sang mga utod kon ngaa amo sina ang ginabatyag niya. “Napatay ang akon bata nga lalaki,” hilibion niya. Ginpakita nila sa iya ang kapitulo 7 sang Ginatudlo sang Biblia nga libro. Ginbasa nila sa iya ang una nga duha ka parapo sa idalom sang subtitulo nga “Kon Mapatay ang Isa ka Pinalangga” kag ang katapusan nga parapo sina nga kapitulo, nga nagapaathag sa paglaum sang mga patay. Bangod nalugpayan sia, gin-uyatan niya liwat ang butkon sang utod kag namangkot, “Matuod gid bala ina?” Ginpasalig sia sang mga utod nga tumanon gid ni Jehova ina nga saad. “Ano ang himuon ko agod makita ko liwat ang akon bata?” pamangkot niya. Naghimo sila sing kahimusan agod mabisitahan sia sa ila balay. Pag-abot nila sa balay sang tawo, nagahulat gid sia, nga nalangkag sa pagsugod sa pagtuon sa Biblia.

“Ginpakamaayo gid ni Jehova ini nga programa!” siling sang nagalakbay nga manugtatap nga nagabulig sa pag-organisar sa special metropolitan public witnessing sa New York. “Indi lang ini epektibo nga pamaagi sa pagpanaksi sa linibo ka tawo, kundi madamo man nga nagbugnaw ukon na-disfellowship—‘nadula nga karnero’—ang ginabuligan subong nga magbalik sa panong.”—Ezeq. 34:15, 16.