Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2016 Tuigan nga Libro sang mga Saksi ni Jehova

Canada: Ang lugar sang mga Inuit sa Kangirsuk sa naaminhan nga Quebec

 TALALUPANGDON NGA MGA HITABO SANG NAGLIGAD NGA TUIG

Mga Balita sa Lainlain nga Pungsod

Mga Balita sa Lainlain nga Pungsod

Pagpanaksi sa Tanan nga Taga-Canada

Ang video nga Ngaa Dapat Tun-an ang Biblia? ginbadbad na karon sa walo ka tumandok nga lenguahe agod maaman ang mga kinahanglanon sa teritoryo sang sanga sa Canada. Sa sulod sang napulo ka adlaw nga kampanya sa Nunavik Arctic sang Oktubre 2014, napasalida ang video sa Inuktitut sa halos tanan nga balay sa 14 ka komunidad, nga may sobra 12,000 ka tawo.

Nagdayaw ang Manedyer

Sang Septiembre 2014, ang internasyonal nga kombension sa Seoul ginhiwat sa Sangam World Cup Stadium sa South Korea. Nalipay gid sa programa ang sobra  56,000 nga nagtambong. Ang manedyer sang istadyum nagdayaw gid sa maayo nga paggawi kag pagkooperar sang mga Saksi sa tion sang kombension. Nagsiling sia: “Maayo ang pamatasan sang tanan. Nagdayaw gid ako kay mas maayo pa sila manglimpyo sa istadyum sangsa amon mga propesyonal nga manugtinlo. Kuntani may pareho man sa inyo nga panimuot ang amon mga tinawo kon nagaobra sila. Kon sundon gid naton sing maayo ang relihion, kinahanglan mangin mga Saksi ni Jehova kita.”

South Korea: Ang internasyonal nga kombension sa Seoul sang 2014

Si Jehova Nagahatag sing Kinahanglanon nga Paghanas

Sang Mayo 2012, ang gobierno sang Sweden wala nagbaton sang aplikasyon sang mga Saksi ni Jehova nga hatagan sila sing benepisyo nga ginahatag sa iban nga relihion. Gin-aprobahan sang Nagadumala nga Hubon  nga iapelar ini sa Supreme Administrative Court sang pungsod.

Namat-od ang Korte nga maghiwat sing bista antes ini magdesisyon. Nagmiting ang pila ka utod halin sa lainlain nga pungsod agod binagbinagon kon paano sabton ang posible nga mga pamangkot sa tion sang bista. Nag-ensayo sila sa Kingdom Hall sa Stockholm.

Sa tion sang ila pag-ensayo, nagtunog ang doorbell. Ginbuksan sang utod ang puertahan, kag duha ka dalagita nga nagaedad sing 13 kag 14 ang nagpakilala sa iya. Nagsiling sila nga may gusto sila ipamangkot parte sa mga Saksi ni Jehova. Ang utod nagsaysay, “Gusto ko sila silingan nga magbalik sa dason nga adlaw, bangod masako kami kag indi namon gusto nga madisturbo.”

Apang nagdesisyon ang utod nga istoryahon sila. Madamo sila sing pamangkot, ang pila parte sa mga problema sa sosiedad kag pagbotar. Pagkatapos, nagbalik sia kag ginsugid sa mga utod kon ano ang ginpamangkot sang mga dalagita kag kon paano niya ini ginsabat.

Pagkadason nga adlaw, nakibot ang mga utod sa tion sang bista kay kalabanan nga pamangkot sang Korte pareho sa pamangkot sang mga dalagita. Ang utod nga nagarepresentar sa organisasyon nagsiling: “Dapat kuntani kulbaan ako kay nagaatubang ako sa kilala nga mga abogado sang pungsod, apang kalmado ako. Nabatyagan ko gid nga ginbuligan kami ni Jehova paagi sa paghatag sa amon sing kinahanglanon nga paghanas antes sini nga adlaw.”

Nagpabor sa amon ang Korte, kag ginbalik sa gobierno ang kaso agod bag-uhon ang ila desisyon.

Ang Isa ka Sako nga Bugas ni Ken

Ang anom ka tuig nga si Ken nagaistar sa Haiti. Nalipay gid sia sang nahibaluan niya nga malapit na lang  patindugan sing bag-o nga Kingdom Hall ang ila kongregasyon. Gani, naghimo sia sing sekreto nga kahon kag gintago ini sa iya kuarto. Imbes nga gastuhon ang ginahatag sa iya nga balon nga kuarta, ginabutang niya ini sa kahon. Amo sini ang iya ginahimo kada adlaw asta nga nag-abot ang grupo sa pagpanukod sang Kingdom Hall agod sugdan ang proyekto. Ginhatag niya dayon ang iya sekreto nga kahon, nga nagaunod sing bastante nga kuarta nga ibakal sang isa ka sako nga bugas. Sa sulod sang madamo nga adlaw, ang bugas ni Ken amo ang ila ginpanyaga.

Mando sang Heneral

Sang nagligad nga tuig, dapat magkuha sing pinasahi nga permiso agod makasulod sa Sierra Leone, nga ginkuarentinas bangod sa paglapnag sang Ebola. Halimbawa, ang mga manugtatap sang sirkito dapat magkuha sing mga badge kag passes sang salakyan agod makasulod diri, kag amo man ang mga magadala sang mga literatura kag sulat. Ang mga miembro sang Disaster Relief Committee kinahanglan magdala sing mga infrared thermometer, bleach, kag pagkaon. Dalayawon gid kay pirme sila makakuha sing kinahanglanon nga dokumento.

Makapabakod gid sa pagtuo ang isa ka eksperiensia. Ang mga utod naghatag sing sulat nga nagapangabay sing 34 ka badge kag 11 ka passes sang salakyan, pero kinahanglan nila makigkita sa heneral sang soldado agod aprobahan ang ila pangabay. Duha ka utod halin sa sanga talatapan ang nakigkita sa heneral sa adlaw nga kuhaon nila ang mga badge kag passes. Apang wala nakita ang ila sulat. Ginsugo ang mga utod nga sila ang mangita sa nagatangkas nga mga sulat, pero indi nila ini makita. Sa sina nga tion, ginsilingan sang heneral ang iya sekretaryo  nga isira niya ang iya opisina kag sa masunod nga duha ka semana pa niya basahon ang mga sulat. Hanuot nga nangamuyo sing hipos ang mga utod sing bulig ni Jehova. Gintulok dayon sang heneral ang mga utod kag namangkot, “Pila ka badge kag passes ang inyo kinahanglan?” Sang ginsugiran nila sia, nagtindog sia sa iya bangko kag nagsing-al, “Damo ’na katama!”

Ginpaathag sang mga utod ang aton buluhaton kag kon paano ang aton dala nga mga suplay nagabulig agod maatubang ang kabudlayan bangod sang Ebola. Naghipos ang heneral, nagtulok sa iya sekretaryo, kag nagsiling, “Ihatag ang tanan nila nga kinahanglan.”

Guinea kag Sierra Leone: Ang pamaagi sa pagpanghinaw sang kamot gin-implementar sa tanan nga Kingdom Hall