Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2016 Tuigan nga Libro sang mga Saksi ni Jehova

Sulat Halin sa Nagadumala nga Hubon

Sulat Halin sa Nagadumala nga Hubon

Palangga nga mga Utod:

Mapainubuson nga ginbaton ni manalagna Isaias nga ang bisan ano nga kadalag-an kag kahamungayaan sang Ginharian sang Juda natigayon lang bangod sang pagpakamaayo ni Jehova. Nagsiling sia sa Isaias 26:12: “O Jehova, . . . ang tanan nga nahimo namon ginhimo mo para sa amon.” Amo man sini ang aton mangin reaksion kon binagbinagon naton ang tanan nga nahimo sang nagligad nga tuig sang pag-alagad. Nagahimo gid si Jehova sing “makatilingala nga mga butang nga wala pa mahimo” sadto! (Ex. 34:10) Hunahunaa lang ang pila ka pagpakamaayo nga aton nabaton gikan sa iya.

Ang aton opisyal nga website, ang jw.org, nagamit sa makatilingala nga paagi. Sobra na ini karon sa 600 ka lenguahe, kag ang mga publikasyon mabasa kag ma-download sa sobra 750 ka lenguahe. Daw ano ini ka epektibo sa pagpalab-ot sang kamatuoran sa mga interesado nga tawo? Halimbawa: Ang isa ka mag-asawa nadulaan sing gana sa relihion bangod sang pagkasalimpapaw nga ila nakita. Sa ila pagpangita sing espirituwal nga giya, nasapwan nila ang aton website. Regular nila nga ginakadtuan ang website agod magbasa sing mga artikulo sa aton mga publikasyon kag magtan-aw sing mga video. Gin-download pa gani nila ang Pag-usisa sa Kasulatan Adlaw-adlaw kag ginabasa ini upod sa ila duha ka tin-edyer nga bata. Ang matuod, amo sina ang ila ginahimo sang aga nga nanuktok ang  mga Saksi ni Jehova sa ila puertahan. Nahibaluan sang mga Saksi nga madamo sing ginhimo nga pagbag-o ang pamilya bangod sang ila pagkadto sa website. Ginpanas nila ang ila mga pika kag ginkuha ang mga gintuhog nila sa ila lawas, ginhaboy ang ila relihioso nga mga imahen, gin-untatan ang pagsaulog sa kalibutanon nga mga kapiestahan kag pagtan-aw sang indi nagakaigo nga mga pelikula—ginhimo nila ini tanan antes pa sila nakadtuan sang mga Saksi! Sa tion nga ginasulat ini, ang mga ginikanan kag ang isa sa ila bata mga manugbantala na kag nagaplano ang mga ginikanan sa pagpabawtismo.

Nakabaton man kami sing madamo nga pagpasalamat sa isa pa ka dalayawon nga aman: Ang JW Broadcasting. Ang programa kada bulan matigayon na karon sa sobra 70 ka lenguahe, kag masunod pa ang iban nga lenguahe. Madamo nga pamilya ang nagatan-aw sini sa tion sang ila Pangpamilya nga Pagsimba. Amo ini ang siling sang isa ka utod, “Ang organisasyon ni Jehova nagadaku; apang, nagalapit kami sa ulong talatapan!”

Talalupangdon pirme ang mga kombension para sa katawhan ni Jehova, kag amo man sini ang mga ginhiwat sang 2015 nga tuig sang pag-alagad. May 42 ka video kag presentasyon sang mga piktyur sa programa sang kombension, lakip na ang anom ka matahom nga musika, isa sa pagsugod sang tagsa ka sesyon. Tuhoy sa programa, ang isa ka eksperiensiado nga utod nagsiling, “Ang mga tumalambong daw indi gusto maghalin sa ila pulungkuan sa tion sang programa, bangod indi nila luyag nga may mawasi sila.” Ang misyonera sa latagon nagsiling parte sa kombension sang nagligad nga tuig, “Ang mga video nagbulig sa akon nga mangin mas matuod ang kamatuoran kag ang Ginharian.”

 Ginpakamaayo man kita ni Jehova sang pila ka bag-o nga ambahanon sang Ginharian sang nagligad nga tuig. Ang isa ka mag-asawa nagsulat: “Ang bag-o nga mga ambahanon daw hakos ni Jehova. Nagpahalipay ini sa amon sa tion sang mga kabudlayan.” Ginapahanumdom kita sang aton mga kombension sa mahigugmaon nga pagpangabudlay para sa aton sang orkestra kag koro sang Watchtower, ang tanan para sa kadayawan ni Jehova!

Ginapalig-on namon kamo nga ilugon si Jehova paagi sa pag-abiabi sing maayo sa mga nagabalik

Ginapanginpuslan bala sang inyo kongregasyon ang mga cart para sa publiko nga pagpanaksi? Pagpakamaayo gid ini nga pamaagi sa pagpanaksi! Ang pila ka tawo nga nagaistar sa pribado nga mga komunidad ukon mataas nga mga apartment napalab-utan sang kamatuoran sa una nga tion, kag madamo pa nga tawo, lakip ang indi aktibo nga mga Saksi, ang nakabaton sing espirituwal nga bulig sa sini nga paagi. Sang Enero 2015, ang isa ka tawo sa South Korea nagpalapit sa cart. Ginpaathag niya nga sining karon lang serioso nga ginapamensar niya ang espirituwal nga mga butang. Nasugdan ang pagtuon sa Biblia. Sang Pebrero, nagtambong sia sa miting sang kongregasyon sa una nga tion; sang Marso, nag-untat sia sa pagpanigarilyo. Sang Abril, nagkadto sia sa sanga talatapan sa South Korea, kag padayon sia nga nagauswag sa espirituwal. Isa lang ini sa indi maisip nga mga eksperiensia nga amon nabaton diri sa ulong talatapan.

Ginapangamuyo namon nga ang impormasyon nga mabaton sa kombension magapahulag sa madamo nga nangin indi aktibo nga magbalik sa mahigugmaon nga mga butkon ni Jehova antes mangin ulihi ang tanan! Ginapalig-on namon kamo nga ilugon si Jehova paagi sa pag-abiabi sing maayo sa mga nagabalik.—Ezeq. 34:16.

 Ginpakamaayo gid ni Jehova ang iya katawhan sang nagligad nga tuig sang pag-alagad. Ano pa ang aton mapaabot? Mahulat lang kita. Sa karon, gusto namon, bilang Nagadumala nga Hubon, nga mahibaluan ninyo nga palangga gid namon kamo kag pirme namon kamo ginapangamuyo.

Kabay nga pakamaayuhon kamo,

Ang inyo mga utod,

Nagadumala nga Hubon sang mga Saksi ni Jehova