Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2016 Tuigan nga Libro sang mga Saksi ni Jehova

Australia: Ang whiteboard animation nga video nga Ano ang Matuod nga Abyan?

 PAGBANTALA KAG PAGPANUDLO SA BUG-OS NGA DUTA

Oceania

Oceania
  • PUNGSOD 29

  • POPULASYON 40,642,855

  • MANUGBANTALA 98,353

  • PAGTUON SA BIBLIA 66,022

Kaisog sa Pagpaambit

Ang 12 anyos nga si Emily nagaistar sa Australia. Isa ka adlaw, nagsiling ang iya maestra sa klase parte sa importansia sang pagpili sing maayong mga abyan. Ginpakita gilayon ni Emily sa iya maestra ang whiteboard animation nga video nga Ano ang Matuod nga Abyan? Sang ginapakita sang maestra sa klase ang video, namati gid sila sing maayo. Pagkatapos, isa ka oras sila nga naghinun-anon sa sini. Ginpakita  man sang maestra ang video sa iban nga klase. Ginsugid dayon ni Emily sa iya maestra kag mga klasmeyt ang parte sa jw.org. “Ginhatagan ako ni Jehova sing kaisog nga ipaambit ang website sa ginatos ka estudyante,” siling ni Emily. “Ginpakamaayo gid niya ako.”

Eksibit sa Naligwin nga Lugar

Lima ka manugbantala ang nagbiyahe sing siam ka oras sa batsihon nga dalan sa kabukiran agod magdispley sang mga literatura sa isa ka eksibit sa Suai, Timor-Leste. Nagdayaw ang mga nagatan-aw sa displey sang makita nila ang mga literatura sa Biblia sa 12 ka lokal nga lenguahe, bangod kalabanan sini nga lenguahe may pila lang ukon wala gid sing nabalhag nga balasahon. Nakita sang isa ka babayi ang tig-ulo sang isa ka brosyur kag nagsiling, “Lenguahe ko ina!” Amo ini ang una nga tion nga nakabasa sia sing naimprinta nga literatura sa iya lenguahe nga Bunak. Sa apat lang ka adlaw, nakapanagtag ang mga manugbantala sing 4,571 ka literatura kag madamo ang nangabay nga bisitahon sila sa ila balay. Kalabanan sang mga interesado wala pa gid nakapakig-istorya sa mga Saksi ni Jehova sadto. Inoras nga nagpungko ang mga kabataan sa pagtan-aw sang mga video nga Mangin Abyan ni Jehova sa Tetun Dili nga lenguahe. Nasaulo pa gani sang pila ka kabataan ang mga ambahanon sa sini kag malipayon nila ini nga ginkanta.

Timor-Leste: Nanamian ang mga kabataan magtan-aw sang mga video nga Mangin Abyan ni Jehova

 “Amo Gid Ini ang Kinahanglan sang mga Estudyante”

Ang mga misyonero nga sanday Brian kag Roxanne nangayo sing permiso nga magbutang sing cart sang literatura sa isa ka eskwelahan sang kolehiyo sa isla sang Palau. Nakig-istorya sila sa presidente sang eskwelahan kag ginpakita ang video sa jw.org parte sa aton pagpanaksi sa publiko. Nagbilin man sila sing mga literatura nga ginaplano nila nga idispley sa cart. Ginsilingan sang presidente  sanday Brian kag Roxanne nga kinahanglan nila makig-istorya sa direktor sang student relations. Sa tapos sila makapakig-istorya sa direktor, ginsilingan naman sila nga makig-istorya sa dean sang eskwelahan.

“Maayo ang amon pag-istoryahanay sang dean,” siling ni Brian, “pero ginsilingan niya kami nga magbalik sa opisina sang presidente, diin ginsilingan kami nga magsulat agod mangayo sing permiso nga magbutang sing cart sang literatura. Daw ginapalibutlibot lang kami kag medyo naluyahan, pero nagsulat gihapon kami.”

Palau: Madamo sing naistorya nga estudyante sanday Roxanne kag Brian sang nagbutang sila sang cart sang literatura malapit sa kampus

Agod mamangkot parte sa sulat, ginkadtuan nanday Brian kag Roxanne ang dean, nga nagapaabot nga indi niya  aprobahan ang ila pangabay. “Nakibot gid kami,” siling ni Brian, “sang nagsiling ang dean nga nabasa niya ang mga libro nga amon ginhatag kag para sa iya maayo gid ini nga libro. Nagsiling sia nga amo gid ini ang kinahanglan sang mga estudyante.” Ginhatagan kami sing permiso!

Si Brian nagpadayon: “Ginhambalan kami sang direktor sang student relations nga ang mga estudyante nga nagaistar sa mga dormitoryo mahimo nila idul-ong sa simbahan nga gusto nila kon Domingo. ‘Kon gusto nila magkadto sa inyo simbahan,’ siling niya, ‘idul-ong namon sila didto.’ Nakibot gid kami ni Roxanne. Imbes nga indi pagbatunon ang amon pangabay, nagtanyag ang eskwelahan nga idul-ong ang mga estudyante sa Kingdom Hall!”

Sa una nga adlaw sang pagdispley sang cart nanday Brian kag Roxanne sa kampus, nakapahamtang sila sing 65 ka libro, 8 ka magasin, kag 11 ka brosyur. Madamo man sila sing naistorya nga estudyante. Ang dean kag ang direktor nagpalig-on sa ila nga magbalik.

Natan-aw sang mga Nagapamakal ang Aton mga Video

Ang Bethelite nga si Lipson manugbalik na sa sanga sang Solomon Islands sa tapos magbantala sa aga. Samtang nagalakat sia, nabatian niya ang ambahanon sang Ginharian halin sa sulod sang tiendahan. Nagsulod sia agod mangusisa. Nakibot sia sang nakita niya ang grupo sang mga bata kag mga tigulang nga nagatan-aw sa telebisyon nga nagapasalida sang video sang ambahanon numero 55, “Kabuhi nga Dayon—Yari Na!,” sa serye sang Mangin Abyan ni Jehova. Sang natapos ang ambahanon, ginsilingan sang tag-iya ang grupo, “May isa pa ako ka video nga ipakita sa inyo.” Ginpasalida niya dayon ang video nga Malain ang Magpangawat. Pagkatapos sang video, ginhambalan niya sila nga indi mangawat sa iya tiendahan.

 Bangod madamo ang nagasulod sa tiendahan samtang nagasalida ang video, ginasilingan sila sang tag-iya, “Gusto ko nga mabatian ninyo ang akon paborito nga kanta.” Ginapatokar niya dayon ang ambahanon numero 55. Masunod, ginpasalida niya ang video nga, Ngaa Dapat Tun-an ang Biblia? kag Paano Ginahimo ang Pagtuon sa Biblia? sa Pidgin nga lenguahe sang Solomon Islands.

Solomon Islands: Nalipay ang tag-iya sang tiendahan sa pagpakita sang mga video sa jw.org sa mga nagapamakal

Pila lang sa Solomon Islands ang may Internet bangod tuman ini kamahal kag limitado lang. Apang ining tag-iya sang tiendahan, nga indi Saksi ni Jehova, nagabulig sa pagtanom sang binhi sang kamatuoran paagi sa pagpakita sang aton mga video sa mga nagasulod sa iya tiendahan.

Nasapwan Niya ang Ngalan sang Dios sa Libro

Kada Lunes, ang bataon nga mag-asawa nagadispley sang cart sang literatura sa Nouméa, ang kapital sang New Caledonia. Isa ka adlaw, may babayi nga nagaalang-alang sa pagpalapit sa cart kag nagkuha gilayon sang libro nga  Ano Gid ang Ginatudlo sang Biblia? Pagligad sang tunga sa oras, nagbalik sia dala ang libro. Nagsiling sia sa mag-asawa, “Nakita bala ninyo ini?” Ginbuksan niya ang libro kag gintudlo ang ngalan ni Jehova. “Ngalan ina sang Dios!” siling niya. “Sinemana na nga nagapanalawsaw ako sa librarya agod mahibaluan ang kamatuoran parte sa Dios. Dayon, nagkuha ako sang inyo libro kag nagsakay sa akon salakyan. Sang ginbuksan ko ang libro, ang una nga nakita ko amo ang ngalan sang Dios nga Jehova. Nagpamensar ako nga dapat ako magbalik kag magpasalamat sa inyo.” Nangin maayo ang pag-istoryahanay sang mag-asawa kag sang babayi kag ginpakita nila sa iya ang apendise sang Ginatudlo sang Biblia nga libro, sa topiko nga “Ang Ngalan sang Dios—Ang Paggamit Sini kag ang Kahulugan Sini.” Ginpaathag sang babayi nga gusto niya tani manalawsaw anay sa librarya, pero nahibaluan niya kon sa diin ang cart kada Lunes!