Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

2016 Tuigan nga Libro sang mga Saksi ni Jehova

Brazil: Si Valdira nagatuon nga nagagamit sing kandila kag cell phone

 PAGBANTALA KAG PAGPANUDLO SA BUG-OS NGA DUTA

Kadutaan sa Amerika

Kadutaan sa Amerika
  • PUNGSOD 57

  • POPULASYON 982,501,976

  • MANUGBANTALA 4,102,272

  • PAGTUON SA BIBLIA 4,345,532

Pagtuon sa Latagon nga Nagagamit sing Kandila

Ang mag-asawa nga espesyal payunir nga naasayn sa naligwin nga teritoryo sa Brazil nakabati parte kay Valdira, isa ka babayi nga nagtuon sa Biblia sang nagligad nga 13 ka tuig. Sa tapos sang pagbiyahe sa yab-ukon nga dalan kag pagtabok sa makatalagam nga mga suba, nakita nila si Valdira, nga gusto gid magpadayon sa iya pagtuon. Bangod nagaistar sia sa naligwin nga bahin sang pungsod,  kinahanglan maghimo sing pinasahi nga mga kahimusan. Bisan pa may cell phone si Valdira, ang mabaskog nga signal ara sa latagon malayo sa iya balay. Isa pa, mahimo lang makatuon si Valdira sugod sa alas nuebe sang gab-i. Hunahunaa ang danyag: Isa ka dalaga nga nagapungko sa latagon sa gab-i kag nagatuon sing Biblia paagi sa cell phone kag nagagamit sing kandila.

Nagapamati man si Valdira sa mga miting sa Domingo paagi sa iya cell phone. Nagakadto sia sa latagon dala ang iya Biblia, Lalantawan, kag libro sang ambahanon agod mamati. Kon mag-ulan, nagapamayong sia.

Sang Marso, nagbiyahe si Valdira sing mga 100 ka kilometro pakadto sa Kingdom Hall agod magtambong sing pinasahi nga miting diin ginpagua ang ginrebisar nga Bag-ong Kalibutan nga Badbad sa Portuguese. Nalipay gid sia sa pagbaton sang bag-o nga Biblia. Sang ginhatagan sia sing komendasyon sa tanan niya nga panikasog sa pagtuon sa Biblia, si Valdira nagsabat, “Indi man gid amo sina kabudlay!”

“Nahibaluan Ko nga Maabot Kamo Pila ka Adlaw”

Ang Yukpa amo ang mga Amerikano-Indian nga nagaistar sa Colombia. Antes magbisita sa isa sang ila mga komunidad, ang espesyal payunir nga si Frank ginpaandaman parte sa isa ka lokal nga lider nga si John Jairo, nga nagpalayas sang pila ka ebanghelikal nga grupo nga gusto magbantala sa ila lugar. Isa ka bes, sang natukiban ni John nga nagapangolekta sing diesmos ang ila ministro, gintabog niya sia paagi sa pagpalupok sing pusil.

Colombia: Si Frank, nga isa ka espesyal payunir, nagadumala sing pagtuon sa Biblia sa grupo sang Yukpa nga mga tawo

Si Frank nagsaysay: “Pag-abot namon sa komunidad, ang una nga tawo nga namati sa amon amo ang bata nga babayi ni John Jairo! Sang ginpakita namon sa iya ang libro nga Ano Gid ang Ginatudlo sang Biblia? nagsiling sia  dayon, ‘Amo ini nga relihion ang gusto ko sudlan!’ Dayon nagdalagan sia agod pahibaluon ang iya amay sang amon pag-abot. Gilayon nga ginpatawag kami ni John. Bisan ginakulbaan, nakigkita kami sa iya. Antes pa kami makahambal, nagsiling sia: ‘Nahibaluan ko nga matuod ang inyo relihion. Sang nagligad nga walo ka tuig sa basurahan sa Becerril, nakakita ako sang libro pareho sang inyo ginhatag sa akon bata. Ginbasa ko ini, kag sugod sadto, nagahulat ako sa inyo. Nahibaluan ko nga maabot kamo pila ka adlaw. Gusto ko nga tun-an ninyo ako, ang akon pamilya kag ini nga komunidad sing Biblia. Bukas ang amon puertahan para sa inyo.’

“Naghibi kami bangod sang iya ginsiling. Ang bilog nga komunidad nagtipon agod mamati sang amon ginabantala,  kag gin-interpret ni John Jairo ang amon ginahambal sa ila lenguahe. Sang nagbiya kami, ginpahulam niya kami sing gamay nga asno agod kargahan sang amon bagahe. Nagadumala kami karon sing 47 ka pagtuon sa Biblia nga ginatambungan sang 120 ka tawo nga Yukpa sa lainlain nga komunidad, lakip si John Jairo kag ang iya bata.”

Manughingabot nga Nagbag-o

Si José, nga isa anay ka debotado nga Katoliko, nagaistar sa Ecuador. Nagsulat sia: “Akig ako katama sa mga Saksi ni Jehova. Ginhingabot ko sila sa sulod sang napulo ka tuig. Ginaorganisar ko ang mga grupo agod gamuhon ang mga Saksi, ginasakit sila, kag ginaakusahan nga mga kawatan. Dayon sa estasyunan sang pulis, nagapamilit ako nga ako  mismo ang magkandado sang ila selda. Isa ka bes, ginguba namon ang salakyan sang isa ka Saksi. Sa isa pa ka bes, ginhulog namon sa pangpang ang ila motorsiklo.

“Sang 2010, nalatnan ako sing swine flu. Ginhambalan ako sang akon doktor nga maghalin sa bukid sang Andes kag magkadto sa baybay diin mas mainit ang klima agod magpaayo. Nagkadto ako sa gamay nga uma sang akon paryente sa higad sang dagat kag ako ang nag-atipan sini. Bangod nagaisahanon, gusto ko nga may maistorya. Sin-o ang nag-abot sa uma? Mga Saksi ni Jehova! Bangod nasubuan ako, nakig-istorya ako sa ila kag nagdayaw kon paano nila gingamit ang Biblia. Ginbaton ko ang pagtuon sa Biblia agod lang mangusisa. Pagligad sang anom ka bulan, nagtambong ako sa miting. Nagdayaw gid ako sa ila kaayo kag mahigugmaon nga interes sa akon, amo nga ginpamangkot ko ang akon kaugalingon, ‘Sila ayhan ang matuod nga mga alagad sang Dios?’ Nag-uswag ako kag nabawtismuhan sang Abril 2014.

“Naghinulsol ako nga ginhingabot ko ang mga Saksi. Apang, ginhatagan ako sing kahigayunan ni Jehova nga kay-uhon ini sa masarangan ko. Sa sirkito nga asembleya sang Oktubre 4, 2014, gin-interbyu ako parte sa akon nagligad subong manughingabot kag ginpamangkot, ‘Kon may tsansa ka nga mangayo sing pasaylo sa imo ginhingabot, sin-o sia?’ Nagsabat ako dayon nga ang utod nga si Edmundo pero wala ako sing ideya kon paano sia makita. Lipod sa akon ihibalo, ginpakadto sia sang manugtatap sang sirkito sa likod sang entablado. Naghibi ang tumalambong sang naghaksanay kami ni Edmundo sa plataporma nga nagahibi.”

“Palihug, Jehova, Buligi ang Imo mga Saksi nga Makita Ako”

Paraguay: Namangkot ang babayi sa mga utod kon mga Saksi ni Jehova sila

Nagatagiti na ang kaudtuhon sang natapos sang grupo sang mga utod nga babayi ang gin-asayn sa ila nga teritoryo  sa Asunción, Paraguay. Apang, nagdesisyon sila nga bantalaan man ang pila ka balay sa uluunhan. Nagsiling ang isa ka Saksi, “Basi may isa nga nagapangamuyo.” Sa isa ka balay sa kanto, ginyuhuman sang isa ka pamatan-on nga babayi ang mga utod nga babayi kag namangkot kon mga Saksi ni Jehova sila. Ginpaathag niya nga sang nagligad nga bulan nagsaylo sia sa Paraguay halin sa Bolivia bangod sang iya obra. Nagatuon sia sing Biblia sa Bolivia antes sia magsaylo. Wala sa iya mga kasilingan ang makasugid kon sa diin makita ang mga Saksi, gani nangamuyo sia, “Palihug, Jehova, buligi ang imo mga Saksi nga makita ako.” Sa sina man nga adlaw nagbisita ang mga utod kag napadayon ang pagtuon sa Biblia.