Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2016 Tuigan nga Libro sang mga Saksi ni Jehova

England: Mga utod nga mainit nga nagaabiabi sa mga delegado para sa internasyonal nga kombension

 PAGBANTALA KAG PAGPANUDLO SA BUG-OS NGA DUTA

Europa

Europa
  • PUNGSOD 47

  • POPULASYON 743,421,605

  • MANUGBANTALA 1,614,244

  • PAGTUON SA BIBLIA 842,091

Ang Nasal-an nga Delegado Natun-an sa Biblia

Makalilipay gid nga hitabo ang internasyonal nga kombension sa London, England, para sa nagabisita nga mga delegado kag sa lokal nga mga Saksi. Sanday Andrew kag Elizabeth nagkadto sa isa ka hotel sa London agod abiabihon ang pila ka delegado. Natalupangdan ni Elizabeth ang babayi nga disente sing pamayo sa reception area kag nasal-an ini nga delegado,  gani ginhakos niya sia. Nakibot ang babayi, gani nangayo sing pasaylo si Elizabeth. “Pasensia na,” siling niya. “Abi ko delegado ka!”

“Delegado sa ano?” pamangkot sang babayi.

Gintudlo ni Elizabeth ang karatula sa reception nga nagaabiabi sa mga Saksi ni Jehova kag nakibot sia sa reaksion sang babayi. “Kanami gid sa inyo!” siling niya. “Daw Saksi ni Jehova bala ako tulukon?”

Sa ila pag-istoryahanay, nahibaluan ni Elizabeth nga ang ngalan sang babayi amo si Vivien. Taga-Nigeria gid sia, pero lapitanay sila sing ginaistaran subong. Ginbaton ni Vivien ang tanyag nga pagtuon sa Biblia kag gusto niya nga updon man ang iya mga kabataan. Ginkadtuan nanday Andrew kag Elizabeth si Vivien sa iya balay, kag sila naman ang mainit nga ginhakos. Nangin maayo gid ang impresyon kay Vivien sang ila pagkilalahay sa sentro sang London. Sang ginpakita nanday Andrew kag Elizabeth kay Vivien ang Ginatudlo sang Biblia nga libro, nakibot sila kay nagsiling sia nga may kopya na sia kag ginabasa niya ini upod sa iya apat ka bata. Sang ginsilingan sia nga ginagamit ini nga libro sa libre nga pagtuon sa Biblia, malipayon nga nagsiling si Vivien, “Masugod na kita subong!”

Sulat Halin sa Isa ka Utod nga Roma

Sang Nobiembre 2014, naporma ang una nga kongregasyon nga Romany sa Slovakia. Sa bag-o lang nga sirkito nga asembleya, 21 ka manugbantala nga nagahambal sing Romany ang nabawtismuhan. Tanan sila nagaistar sa isa lang ka minuro. Sang Memoryal, 495 ang  nagtambong sa kongregasyon nga Romany. Ang bag-o nabawtismuhan nga utod nga lalaki nagsulat:

Slovakia: Duha ka manugbantala sang Ginharian nga malipayon nga nagapaambit sang maayong balita sa Roma nga babayi

“Isa ako ka Roma nga taga-Žehra, Slovakia. Sa amon lugar, madamo nga puti nga tawo ang nagakabig sa amon subong mga Gypsy kag para sa ila mahigko kami, nagabinutig, kag nagapangawat. Sang gusto ko magsimba, ginhambalan ako sang nagabantay nga indi ako puede didto kag dapat maghalin ako. Pagkatapos sini nga hitabo, nahibaluan na ninyo kon ano ang pagtamod ko sa mga puti. Dayon gin-agda ako sang mga Saksi ni Jehova nga magkadto sa Kingdom Hall. Nagkadto ako nga may pagpangduhaduha, nga nagapaabot nga malugaw-an liwat. Nakibot ako kay bisan wala pa ako makasulod sa Kingdom Hall, ginkamusta ako sang puti nga tawo kag gin-abiabi gid. Sa tion sang pamulongpulong publiko, wala ako nakapamati sing maayo. Nagapamensar ako, ‘Ngaa maayo ang pagtratar sang tanan sa akon?’

“Sa sina nga gab-i, indi ako makatulog bangod ginapamensar ko ang natabo sa Kingdom Hall. Gani nagdesisyon ako nga magbalik agod mahibaluan kon natabuan lang ang ila kaayo. Sa sina nga tion, nangin mas maayo pa gid ang pagtratar sa akon sang mga tawo didto kag ginkabig ako nga madugay na nila nga abyan. Wala ako nag-untat sa pagtambong sa mga miting, kag sang ulihi nabawtismuhan. Sa tapos sang akon bawtismo, wala nagbag-o ang kaayo sang mga utod, kag ginapakita gihapon nila ang pagpabalor sa akon. Kon kaisa, mas manamit pa sa ila ginakaon ang pagkaon nga ila ginahatag sa akon! Gusto ko gid nga mangin bahin sa sini nga organisasyon, kag si Jehova amo ang Dios nga gusto ko alagaron sing dayon.”

 Ginsabat ang Pangamuyo nga Makabantala

Ang utod nga si Aysel nagasakay sa bus halin sa banwa sang Ganja pakadto sa Baku sa Azerbaijan. Nagpangamuyo sia kay Jehova nga gusto niya nga may masugiran sia parte sa Biblia samtang nagabiyahe. Bisan pa may naasayn na nga pulungkuan sa bus kay Aysel, nag-insister ang isa ka babayi nga matupad sa iya si Aysel. Gin-istorya ni Aysel ang babayi kag sang ulihi ginliton niya sa Biblia ang ila pag-istoryahanay. Ginpaathag sang babayi nga ginahigugma niya si Jesus kag gusto pa niya makahibalo sing dugang parte kay Jesus. Nagbayluhanay sila sing numero sa telepono kag nagsugtanay nga makitaay liwat. Ginpangabay sang babayi si Aysel nga kon posible dal-an sia sing Biblia.

Pagbalik ni Aysel sa Ganja, ginkadtuan niya ang babayi sa ginaubrahan sini. Nagsiling ang babayi nga may ginabasa sia kada adlaw nga “libro parte sa pangamuyo.” Nakibot ang utod sang nahibaluan niya nga ang ginatawag sini nga libro parte sa pangamuyo amo ang 2013 nga Pag-usisa sa Kasulatan Adlaw-adlaw! Nasugdan ang pagtuon sa Biblia, kag nalipay si Aysel nga ginhatagan sia ni Jehova sing kaisog nga magpanaksi sing di-pormal.

Sulat sa Pagpasalamat sang Isa ka Priso

Ang masunod nga sulat naghalin sa Espanya:

“Una sa tanan, nagapasalamat ako sa inyo panikasog nga mabantalaan sang mensahe sa Biblia ang tanan nga sahi sang tawo.

“Una ko nga naistorya ang mga Saksi ni Jehova sang nagligad nga 15 ka tuig sa Tiranë, Albania. Nakibot ako kay may kaisog nga nagpalapit sa amon ang isa ka Saksi, bisan pa napulo kami ka hurong nga pamatan-on. Wala sing may mangisog nga makig-istorya sa amon, apang gin-istorya kami sang utod bisan pa may mga armas  kami. Maisugon niya nga ginsugid sa amon ang parte sa Biblia. Nagdayaw gid ako sa iya kaisog.

“Sang nagligad nga apat ka tuig diri sa Espanya, ginbisitahan ako sa prisuhan sang Saksi kag gintanyagan sing pagtuon sa Biblia. Ginbaton ko ini, kag sugod sadto nagbag-o ako. Indi na ako bayolente kag maisog nga tawo. Tinuig na nga wala ako nadalahig sa kagamo. Nakilala ko si Jehova, kag naghatag ini sing katuyuan sa akon kabuhi. Ginatinguhaan ko nga mangin mahidaiton sa mga tawo sa palibot ko, kag sobra na ako isa ka tuig nga di-bawtismado nga manugbantala.

“Bisan 12 na ka tuig ako karon sa prisuhan, sang nagligad nga 4 ka tuig, nabatyagan ko ang kalipay kag kalinong nga wala ko nabatyagan sadto. Adlaw-adlaw ako nga nagapasalamat sa sini kay Jehova.

“Sang nagligad nga pila ka semana, nagtan-aw ako sing mga video sa jw.org. Natandog gid ako sang video parte sa utod sa prisuhan sa Estados Unidos. Indi ako emosyonal, apang sang nakita ko ang iya mga pagbag-o, indi ko mapunggan ang akon mga luha.

 “Kabay pa nga pakamaayuhon ni Jehova ang inyo mga panikasog nga mabantalaan ang tanan nga sahi sang tawo paagi sa pagbadbad sang maayong balita sa madamo nga lenguahe kag paagi man sa pagbisita sa mga prisuhan.

“Madamo gid nga salamat.”

“Nasapwan Ko Gid Man ang Kalinong sa Hunahuna”

“Pirme ako masubo kag wala sing katuyuan sa kabuhi, kag padayon nga nagapangita sang kalinong nga indi ko mabatyagan,” siling ni Felicity, nga 68 anyos nga taga-Sweden. Bangod indi sia kontento sa iya mga pagpati subong Katoliko, gin-usisa niya ang pagpati sang lainlain nga relihion kag nabuyo gid sia sa espiritismo.

Bangod wala niya nasapwan ang matuod nga kahulugan sang kabuhi, naluyahan gid sia amo nga naghunahuna sia nga maghikog. “Upod ang luha, mabaskog ako nga nagtawag sa Dios, nga nagapangabay sa iya nga sugiran ako sang gusto niya nga himuon ko. Pagligad sang duha ka semana, may mahinay nga nanuktok sa puertahan. Ang nagayuhum nga pamatan-on nga lalaki namangkot sa akon kon interesado ako mamati sang Pulong sang Dios. Naghunahuna ako, ‘O Dios ko, indi amo sini ang buot ko silingon—indi mga Saksi ni Jehova!’”

Bisan pa daw gusto niya gilayon isira ang puertahan, nagdesisyon sia nga mamati kag ginbaton ang pagtuon sa Biblia sa libro nga Ginatudlo sang Biblia. “Ginpaathag sa akon ang Biblia sa bag-o nga anggulo,” siling niya. Nabawtismuhan si Felicity sa rehiyonal nga kombension sa Sweden sang 2014. Nagsiling sia karon: “Amo ini ang ginapangita ko sa bug-os ko nga kabuhi. Nasapwan ko gid man ang kalinong sa hunahuna.”