Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

2016 Tuigan nga Libro sang mga Saksi ni Jehova

Israel: Nagagamit sang tablet sa pagbantala sang Ginharian sang Dios

 PAGBANTALA KAG PAGPANUDLO SA BUG-OS NGA DUTA

Asia kag Middle East

Asia kag Middle East
  • PUNGSOD 49

  • POPULASYON 4,409,131,383

  • MANUGBANTALA 718,716

  • PAGTUON SA BIBLIA 766,364

Isa ka Gatos ka Oras Para sa Isa ka Gatos ka Tuig

Sa isa ka pungsod sa Asia, gintun-an sa Biblia ang bantog nga artista sa telebisyon kag modelo. Gin-aplikar niya dayon ang iya natun-an kag ginpanghaboy ang iya espiritistiko nga mga literatura kag mga imahen sang Budhismo.

Ang isa niya ka amiga nagkumbinsi sa iya, nga nagasiling: “Ngaa indi ka anay mag-untat sa  pagtuon sing mga tatlo ka tuig kag magkonsentrar sa imo karera? Pagkatapos, balik ka lang ugaling sa pagtuon.”

Nagsabat ang babayi: “Naghulat ako sing 24 ka tuig agod makilala si Jehova. Ngaa ipaiway ko sing tatlo pa ka tuig ang pagtuon parte sa iya?”

Sa semana nga mapalista sia sa Teokratikong Eskwelahan Para sa Ministeryo, gintawgan sia sang isa ka kompanya sa paghimo sang pelikula. Gintanyagan nila sia sing apat ka tuig nga kontrata sa kondisyon nga batunon niya ang bisan ano nga papel. Wala niya ini ginbaton. Sang Mayo 2014, nakalipikar sia subong di-bawtismado nga manugbantala, kag sang malapit na lang ang Agosto, nagdesisyon sia nga magbantala sing 100 ka oras sa sina nga bulan. Sang ginpamangkot sia kon ngaa, nagsabat sia, “Gusto ko saulugon ang 100 ka tuig nga paggahom ni Jesus paagi sa pagbantala sing isa ka oras para sa isa ka tuig nga paggahom!” Nalab-ot niya ini. Sang Enero 2015, nabawtismuhan sia, kag isa na karon ka auxiliary payunir.

Ginkalitan sing Maayo ang Isa ka Gab-i sa Prisuhan

Sa Sri Lanka, nagsakay ang apat ka utod nga babayi sa bus agod magbantala sa wala maasayn nga teritoryo nga ang kalabanan mga Budhista. Sa ila ikaduha nga adlaw nga pagbantala, gin-akigan sila sang isa ka monghe kag drayber sang taksi. Wala madugay, ginpalibutan sila sang mga 30 ka akig nga tawo. Nag-abot ang pulis, nagdala sa mga utod sa presinto, kag nagpriso sa ila sing isa ka gab-i bisan wala sing akusasyon sa ila. Ginpriso sila upod sa mga kriminal kag nakaeksperiensia sila sing pagbuyayaw, apang ginkalitan nila ang kahigayunan nga makapanaksi sa prisuhan. Ang isa sa mga utod nagsiling: “Ginpriso ako  upod sa mga kriminal, pero ginsugiran ko sila sang kamatuoran. Natingala sila nga napriso ako, kag madamo sila sing pamangkot parte sa akon pagpati. Namangkot pa gani ang isa sa ila, ‘Ngaa malipayon ka gid?’”

Sri Lanka: Apat ka utod nga nagsakay sa bus agod magbantala sa wala maasayn nga teritoryo

Ginbaton sang Korte Suprema sa Sri Lanka ang ginpasaka nga kaso batok sa pulis nga nagpriso sa ila nga wala sing rason. Wala pa madesisyunan ang kaso.

Bulig Para sa Nagahigda Na Lang nga Babayi

Si Michiko, nga payunir nga babayi sa Japan, nagadumala sing pagtuon sa sign language sa tigulang nga babayi sa ospital. Ginpamangkot sang utod ang mga nagaobra diri kon may pasyente pa bala nga puede niya maistorya. Nakilala ni Michiko si Kazumi, nga makabati pero indi makahambal. Sang naaksidente si Kazumi sa salakyan sa edad nga 23, indi na sia makatulon sing pagkaon ukon tubig, kag nagahigda na lang. Madamo sia sing pamangkot kag nagpasugot sia nga magtuon sing Biblia.

Japan: Si Kazumi nanamian sa paghimo sing makapaumpaw kag makapalig-on nga mga sulat

Nagapamangkot si Michiko, kag ginagamit ni Kazumi ang iya mga kamot sa pagtudlo sang sabat sa mga parapo ukon ginasulat ini. Sang may cell phone na si Kazumi, ginabinagbinag ni Michiko upod sa iya kada aga ang inadlaw nga teksto. Bisan pa nagaluya sa pisikal si Kazumi, nagabaskog sia sa espirituwal asta nga nagpabutyag sia sang iya handum nga mangin isa sa mga Saksi ni Jehova. Sa edad nga 61, sa tapos sang 13 ka tuig nga pagtuon, nangin di-bawtismado nga manugbantala si Kazumi.

Bangod nagahigda na lang si Kazumi, naghimo sing kahimusan ang kongregasyon nga makapamati sia sang tanan nga miting kag mga programa sa asembleya. Lainlain  nga utod nga babayi sa kongregasyon ang nagabasa sang ginhanda nga komento ni Kazumi sa mga miting.

Nagahimo si Kazumi sing mga sulat nga makapaumpaw kag makapalig-on nga para gid sa tagsa ka estudyante sang Biblia nga nagatambong sa mga miting. Nagapanaksi sia sa mga nagaobra sa ospital kag sa mga nagabisita sa iya. Ginapahibalo sila ni Kazumi, “Kon magtuon kamo sang Biblia, mangin malipayon kamo.”

Monghe nga Nakatuon sang Kamatuoran

Sa pungsod sa Southeast Asia, nagkadto ang isa ka utod nga babayi sa doktor sa mata, kag naistorya niya ang isa ka monghe. Ginpamangkot niya ang monghe, “Gusto mo bala makatigayon sing perpekto nga panglawas kag magkabuhi sing dayon sa matahom nga lugar?” Nasugdan ang maayo nga pag-istoryahanay, kag ginhatagan  niya sia sang brosyur nga Listen to God. Ginhatag sang monghe ang iya numero sa telepono, kag ginhatag ini sang utod sa isa ka utod nga lalaki sa kongregasyon. Wala madugay, nakontak sang utod nga lalaki ang monghe kag gin-agda niya nga magtambong sa pinasahi nga pamulongpulong. Nanamian gid ang monghe sa miting, ilabi na ang pagkanta sang mga ambahanon sang Ginharian, kag nagdayaw gid sia kay gin-abiabi sia sang tanan.

Sang namangkot ang monghe kon ang mga Saksi may relihioso nga mga unibersidad ukon seminaryo, ginpaathag sang utod nga nagahiwat kita sing personal nga pagtuon sa Biblia, kag gintanyagan niya sia sing pagtuon. Pagkasunod nga semana, natapos sang monghe ang kapitulo 1 sang Ano Gid ang Ginatudlo sang Biblia? nga libro. Nagpadayon sia sa pagtuon, nagtambong sa mga miting, kag nagkomento man sa Pagtinuon sa Ang Lalantawan.

Sang nagtambong ang monghe sa sirkito nga asembleya, gin-agda sia sang tiglawas sang sanga nga magkadto sa Bethel. Pagkadason nga semana nagbiyahe ang monghe sing mga napulo ka oras pakadto sa Bethel, diin gin-abiabi gid sia. Sang katapusan sang Pebrero 2015, nag-untat sia subong monghe kag nagpadayon sa pagtuon sa Biblia kag nagpakigbahin sa Cristianong mga miting.

Nadula, Apang Nakita Liwat

Sining karon lang, ginpadala ang mga payunir sa aminhan-sidlangan nga India, ang lugar nga tinuig na nga wala mabantalaan. Madamo nga interesado ang nasapwan sang mga payunir kag gusto nila mangita sing nagakaigo nga tilipunan agod hiwatan sang mga miting. Samtang nagapakadto sila sa ila ginatun-an sa Biblia, nakita nila ang ginatukod nga bilding kag nagahunahuna nga mamangkot parte sa sini. Sang medyo malayo na sila, nagdesisyon sila nga magbalik. Sa likod sang bilding,  nakita nila ang isa ka tigulang nga babayi kag ginsugiran sia nga mga Saksi ni Jehova sila. Nalipay gid sia. “Saksi ni Jehova man ako,” siling niya kag ginpadayon niya sila sa iya balay. Ginpakita niya sa ila ang iya mga literatura sang dekada 70 asta 80. Gintun-an sia sang mga payunir sang nagligad nga 30 ka tuig kag nagtambong sa pila ka miting bisan pa ginapamatukan sang iya bana. Kumbinsido sia nga nasapwan niya ang kamatuoran apang sang ulihi wala na sia nakapakig-angot sa organisasyon sang naghalin ang mga payunir sa ila lugar. Ang tanan niya nga kabataan nangin miembro sang lainlain nga relihion, apang nangindi sia nga magsimba sa iban nga relihion.

India: Ginapakita sang interesado nga babayi ang iya mga literatura sang dekada 70 asta 80

 Sining karon lang, ginpilit sia sang iya kabataan nga magpamiembro sa Iglesia Katolika agod mamisahan sang Katoliko kon mapatay sia. Ginpilit pa gani sia sang iya manghod nga dal-on sa simbahan agod magpalista, pero sang nagapakadto sila, natrapik sila kag nagpauli na lang. Nagsiling ang iya manghod nga mabalik sila pagkadason nga adlaw, pero nagmasakit sia. Sa sina gid nga hapon nga nakahapit ang mga payunir sa interesado nga babayi! Sa karon, nagatuon sia liwat sing Biblia, nagatambong sa mga miting, kag ginapalig-on ang iya mga kabataan kag kaapuhan nga magtuon man.