Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2016 Tuigan nga Libro sang mga Saksi ni Jehova

Burundi: Si Nolla nga nagapakita sang Ang Lalantawan sa mga lalaki nga nangayo sa iya sang baga

 PAGBANTALA KAG PAGPANUDLO SA BUG-OS NGA DUTA

Aprika

Aprika
  • PUNGSOD 58

  • POPULASYON 1,082,464,150

  • MANUGBANTALA 1,453,694

  • PAGTUON SA BIBLIA 3,688,959

Pagpanaksi sa Motorsiklo

Benin: Si Désiré nga nagbutang sang audio player sa iya motorsiklo agod ipaambit ang maayong balita sa iya mga pasahero

Ang mga motorsiklo nga depasahero, nga ginatawag zem ukon habalhabal, amo ang ginasakyan sang kalabanan sa mga siudad sa nabagatnan sang Benin. Si Désiré, nga isa ka auxiliary payunir, nagbutang sing audio player sa iya habalhabal kag ginpaatubang ang duha ka speaker sini sa ginapungkuan sang pasahero. Wala untat nga ginapatokar niya ang rekording sang mga publikasyon kag mga drama sa Biblia. Kon mag-angkas  ang pasahero, dugaydugay, mamati na sia sing maayo. Madamo ang nanamian sa ila nabatian amo nga pag-abot nila sa ila kadtuan, daw indi sila manaug kag indi pa gani manaug asta matapos ang rekording. Si Désiré nagsiling: “Siempre, gusto ko nga magbayad na sila kag manaug agod makapangita ako sing bag-o nga pasahero, pero nahibaluan ko nga mas importante nga makabati sila sang maayong balita sangsa kuarta. Isa pa, madamo ako sing napahamtang nga literatura bangod sini.”

Pursigido nga Bata

Ang seis anyos nga si Nolla, nagaistar upod sa iya pamilya sa mga bakulod sang Burundi. Isa ka adlaw, samtang nagaluto ang pamilya sing pagkaon gamit ang gamay nga kalan, may duha ka lalaki nga nagatrabaho sa pihak-balay nga nangayo sang baga agod idabok. Si Nolla nga wala pa nagaeskwela, amo ang nagabantay sang nagpalapit ang mga lalaki. Gintugutan niya sila nga magkuha sing pila ka baga. Sang ulihi, nalabayan ni Nolla ang duha ka lalaki kag nakita niya nga gingamit nila ang baga sa pagsindi sang sigarilyo. Indi sia mapahamtang bangod sini, kag ginsilingan sila, “Kon nahibaluan ko lang nga isindi ninyo sa sigarilyo ang baga, kuntani wala ko kamo ginhatagan.” Nadumduman niya nga may nakita sia sa Kingdom Hall nga magasin nga may piktyur sang sigarilyo. Nagdalagan sia sa Kingdom Hall kag nagkuha sing duha ka kopya sang Lalantawan nga Hunyo 1, 2014, parte sa pagpanigarilyo. Ginbalikan ni Nolla ang mga lalaki, ginhatag sa ila ang magasin, kag nag-insister nga basahon nila ini dayon. Sang ulihi, nakita niya sila liwat kag ginhatagan niya sila sing mga imbitasyon para sa nagahilapit nga  rehiyonal nga kombension. Bangod nagdayaw sila sa pagkapursigido sang bata, nagtambong sila sing duha ka adlaw sa kombension. Sang tigpalanyaga na, nakita sila ni Nolla kag gin-agda nga manyaga upod sa iya pamilya. Bangod nagdayaw sang ila nakita kag nabatian sa kombension, nagtuon sa Biblia ining duha ka lalaki.

Pagpanaksi sa mga Prisuhan

Ang mga gulang sa Liberia nagabantala sang mensahe sang Ginharian sa lainlain nga prisuhan sang gobierno. Ang espesyal payunir sa kapital, ang Monrovia, nga si Yves nagpaathag: “Sang Marso, tatlo ka priso ang nangin kalipikado subong indi bawtismado nga mga manugbantala. Gani nangin anom ang manugbantala sa Monrovia Central Prison.” Paano sila nagabantala? “Nagatipon sila kada Mierkoles kag Sabado para sa pagministeryo,” paathag ni Yves. “Dayon ginatugutan sila nga magkadto sa mga selda, nga nagapaambit sang mensahe sang paglaum sa Biblia sa ila kaupod nga mga priso.” Madamo nga priso ang ginatun-an sing personal sa Biblia kag nagatambong sa mga miting nga ginahiwat sa prisuhan. Naghatag sing pamulongpulong publiko sa 79 ka priso sa sina nga prisuhan ang tiglawas halin sa sanga talatapan. Anom pa ka prisuhan ang nagahiwat sing regular nga pagtuon sa Biblia kag makita nga may pagbag-o sa mga priso.

“Kinahanglan Gid Namon ang Bulig”

Daku gid ang panikasog sa pagbulig sa mga interesado sa naligwin nga mga lugar agod makatambong sa Memoryal. Halimbawa, ang mga San, nga  kilala man nga mga Bushman, amo ang orihinal nga nagaistar sa nabagatnan sang Aprika. Simple ang ila pangabuhi sadto, nagasaylosaylo sila kag nagapangayam kag nagapanguha sing pagkaon. Sang 2015 nga Memoryal, si Glenn nga espesyal payunir sa naaminhan sang Namibia, naghimo sing kahimusan nga maghiwat sing Memoryal sa nabaw-ing nga minuro sang mga San nga 270 kilometros sa sidlangan sang Rundu. Ikaduha ini nga tion nga naghiwat sing Memoryal diri. Sa sining duha ka paghiwat, ginhatagan sing permiso sang mga lider sa minuro ang mga Saksi ni Jehova nga gamiton nga wala sing bayad ang korte sang mahistrado. May 232 nga nagtambong sa Memoryal bisan pa mabaskog ang ulan antes kag sa tion sang Memoryal. Ang mga Bushman sa sini nga duog nagahambal sing Khwe, ang lenguahe nga may madamo nga pagpangalintak. Ang pamulongpulong ginbadbad halin sa Ingles pa Khwe. Bangod wala sing Biblia sa Khwe, may de-kolor nga mga slide agod ipaathag ang mga bersikulo pareho sang Isaias 35:5, 6. Si Glenn, nga nagadumala sing pila ka progresibo nga mga pagtuon sa Biblia sa sina nga lugar, nagsiling: “Nagakadto ako diri sing makaisa kada bulan sa sulod na sang duha ka tuig. Nagatener ako sa sina nga lugar sing pila ka adlaw. Mahinay ang pag-uswag bangod sang lenguahe kag kalayuon. Kinahanglan gid namon ang bulig. Sang nagpalapit ako sa mga lider agod maghimo sing mga kahimusan para sa Memoryal sa sini nga tuig, ang miembro sang komite nga nagadumala sa sini nga komunidad nangabay sa akon nga magpatindog kami sang duog sang pagsimba sa sini nga lugar. Nagsiling sia nga mahatag ang komite sing lote kag sila ang magasto sa pagpatindog sang bilding! Ang kinahanglan lang namon himuon amo nga magpadala sang ‘pastor’ ukon maghanas sa isa sa ila nga mangin pastor!”

Namibia: Duha ka manugbantala nga malipayon nga nagapaambit sang maayong balita sa babayi nga Himba