Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

2016 Tuigan nga Libro sang mga Saksi ni Jehova

 INDONESIA

Ang Sanga Talatapan sa Mataas nga Bilding

Ang Sanga Talatapan sa Mataas nga Bilding

Mga opisina sa ika-31 nga panalgan

Sang 2008, nakalab-ot sing 21,699 ang manugbantala sa Indonesia. Wala na sing bakante sa pasilidad sang sanga. Bangod ginpatindog ang pasilidad sa tion sang pagdumili, malayo man ini. Nagapakita ini nga kinahanglan ang mas daku nga sanga talatapan malapit sa Jakarta.

 Pagligad sang mga duha ka tuig, ginbakal sang mga kauturan ang propiedad nga tuhay gid sa nauna nga sanga—ang bilog nga ika-31 nga panalgan sang moderno nga bilding nga may 42 ka panalgan malapit sa sentro sang Jakarta. Dayon ginbakal nila ang 12 ka panalgan sang apartment nga malapit sa sini agod istaran sang 80 ukon kapin pa ka Bethelite. Ginbakal man nila ang lima ka panalgan nga bilding agod mangin mga opisina sang Bethel Home.

Ang residensia sa Bethel sa 12 ka panalgan

Ang mga alagad sa konstruksion halin sa lainlain nga pungsod nagtrabaho upod sa lokal nga mga kontraktor agod bag-uhon ang mga opisina kag ang mga apartment. “Pirme kami ginabuligan ni Jehova nga maatubang ang mabudlay gid nga mga problema,” siling sang manugtatap sang konstruksion nga si Darren Berg. “Halimbawa, gusto namon maghimo sing wastewater treatment plant, pero indi pamilyar sa sini ang awtoridad kag wala nila ini gin-aprobahan. Dayon ang isa ka lokal nga Saksi nga enhinyero nagdala sang amon problema sa isa ka mataas nga opisyal. Gilayon nga gin-aprobahan sang opisyal ang amon pangabay, nga nagasiling nga may salig gid sia sa rekomendasyon sang aton utod.”

“Wala na kami nagapanago. Makilala na karon sang mga tawo ang mga Saksi ni Jehova. Makita nila nga permanente na kami diri”

Ang bag-o nga pasilidad sang sanga gindedikar sang Pebrero 14, 2015. Ang miembro sang Nagadumala nga Hubon nga si Anthony Morris III ang namulongpulong para sa dedikasyon. “Nahamtang na kami karon sa isa ka kilala nga distrito upod sa pila ka nagapanguna nga korporasyon sa Indonesia,” siling ni Vincent Witanto Ipikkusuma,  miembro sang Komite sang Sanga. “Wala na kami nagapanago. Makilala na karon sang mga tawo ang mga Saksi ni Jehova. Makita nila nga permanente na kami diri.”

Komite sang Sanga, halin sa wala pa tuo: Budi Sentosa Lim, Vincent Witanto Ipikkusuma, Lothar Mihank, Hideyuki Motoi

“Daw Piesta ang Pagbantala Diri!”

Sining karon lang nga mga tuig, nagadamo ang mga Saksi halin sa bilog nga kalibutan ang nagasaylo sa Indonesia. “Daku ang nabulig sang mga nagaalagad sa mga lugar nga may daku nga kinahanglanon kaangay sang amon pungsod,” paathag ni Lothar Mihank. “Ginapaambit nila ang ila eksperiensia, pagkahamtong, kag kapagsik sa ila mga kongregasyon, kag nakabulig sila agod magbakod ang apresasyon sa bug-os kalibutan nga paghiliutod.” Ngaa nagsaylo sila? Kag ano ang resulta sang ila pagsaylo? Binagbinaga ang pila sa ila mga komento.

Mga Nagabulig sa May Daku nga Kinahanglanon

1. Sanday Janine kag Dan Moore

2. Sanday Mandy kag Stuart Williams

3. Sanday Casey kag Jason Gibbs

4. Si Mari (sa tuo sa atubang) kag si Takahiro Akiyama (sa tuo sa likod)

Sanday Jason kag Casey Gibbs nga taga-Estados Unidos nagsaysay: “Gintan-aw namon ang mga ratio sang populasyon sa manugbantala sa Tuigan nga Libro kag nakita namon nga ang Indonesia isa sa may pinakamataas nga ratio. Dayon ang pila namon ka abyan nga nag-alagad sa lugar nga may daku nga kinahanglanon nagsiling nga madamo sing interesado sa Indonesia. Gani gintawgan namon ang  sanga sa Indonesia, kag gintudlo nila kami sa Bali. Bag-o pa lang nagsugod ang Ingles nga latagon sa Indonesia, gani makabulig gid kami sa ila. Plano namon isa lang ka tuig, pero nalab-utan kami sing tatlo. Ang kalabanan namon nga nabantalaan wala pa nakabati parte sa mga Saksi ni Jehova. Makalilipay gid ini nga pagministeryo!”

Sanday Stuart kag Mandy Williams, mag-asawa nga taga-Australia kag medyo may edad na, nagsiling: “Gusto namon makaistorya sang mga tawo nga ginauhaw sa kamatuoran, gani nagdesisyon kami nga magsaylo sa Indonesia. Sa Malang, East Java, ginatos ka estudyante sa unibersidad nga nagahambal sing Ingles ang namati gid sang maayong balita. Kag nanamian gid sila sang website nga jw.org! Kanami gid magbantala diri.”

Sanday Takahiro kag Mari Akiyama, nga nagapayunir sa Yogyakarta, sa isla sang Java, nagsaysay: “Nagabatyag kami diri nga luwas sa peligro sangsa Japan. Mainayuhon kag matinahuron ang mga tawo. Madamo sa ila, ilabi na ang mga pamatan-on, ang nagausisa sang iban nga relihion. Isa ka adlaw, samtang nagabantay kami sang amon lamesa para sa pagpanaksi sa publiko, nakapahamtang kami sing mga 2,600 ka magasin sa lima lang ka oras.”

Sanday Dan kag Janine Moore, mag-asawa nga manug-60 anyos na, nagpaathag: “Kon magbantala kami, ginapalibutan kami sang mga tawo. Ginayuhuman namon sila; nagayuhum man sila. Mangusisa sila, dayon mangin interesado, dayon malipay. Kon may ipakita kami sa ila sa Biblia, ang pila nagasiling, ‘Puede ko ina masulat?’ Nagadayaw gid sila sa espirituwal nga kaalam sa Biblia. Isa na kami ka tuig diri, kag kanugon nga subong lang kami nagkari. Nagapangita kami sing masunod nga bantalaan—kag nakita namon ini!”

Sanday Misja kag Kristina Beerens nangin misyonero diri sang 2009 kag karon nagaalagad subong manugtatap  sang sirkito. Nagreport sila: “Dalayawon gid ang resulta sang amon pagbantala sa Madura Island sa East Java, bisan isa ini sa mga lugar sa Indonesia nga konserbatibo gid ang mga Muslim. Ginapadulog sang mga tawo ang ila salakyan kag nagapangayo sing mga magasin. Nagasiling sila: ‘Muslim ako, pero nanamian ako magbasa sini nga mga magasin. Puede makapangayo para sa akon mga abyan?’ Daw piesta ang pagbantala diri!”

Ang Kaumhan Maputi Na Agod Anihon

Sang 1931, sang nag-abot si Frank Rice sa Jakarta, mga 60,000,000 ang pumuluyo sang Indonesia. Karon halos 260,000,000 na, kag ang Indonesia amo ang ikap-at nga may pinakamadamo nga populasyon sa kalibutan.

 Ang mga Saksi ni Jehova sa Indonesia may talalupangdon man nga pag-uswag. Sang 1946, napulo lang ang matutom nga nagabantala sa tapos sang Bug-os Kalibutan nga Inaway II. Karon, sobra na 26,000 ang manugbantala sa pungsod—pamatuod gid ini sang pagpakamaayo ni Jehova! Kag 55,864 ang nagtambong sa Memoryal sang 2015, nga nagapakita sing maayo gid nga posibilidad sang pag-uswag.

Si Jesus nagsiling: “Huo, madamo ang alanyon, apang diutay lamang ang mangangani. Gani, pakiluoy kamo sa Agalon sang alanyon nga magpadala sia sang mga mangangani sa iya alanyon.” (Mat. 9:37, 38) Amo gid sini ang ginapabutyag sang mga alagad ni Jehova sa Indonesia. Determinado sila nga magpadayon sa pagpangabudlay agod mapakabalaan ang mahimayaon nga ngalan ni Jehova sa sining pungsod nga madamo sing isla.—Isa. 24:15.

Magtuon sing Dugang Pa

SIN-O ANG NAGAHIMO SANG KABUBUT-ON NI JEHOVA SUBONG?

Paano Ginasulat kag Gina-translate ang Amon mga Literatura?

Naga-translate kami sing mga literatura sa kapin sa 700 ka lenguahe. Ngaa ginapangabudlayan gid namon ini?