Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2016 Tuigan nga Libro sang mga Saksi ni Jehova

 INDONESIA

Nag-abot ang Iban Pa nga Misyonero

Nag-abot ang Iban Pa nga Misyonero

Sang Hulyo 9, 1964, ang Department of Justice sa Indonesia nagrehistro sang Asosasyon sang mga Estudyante sang Biblia, ang legal nga korporasyon sang mga Saksi ni Jehova. Apang antes matigayon sang mga kauturan ang bug-os nga kahilwayan sa relihion, kinahanglan nila magparehistro sa Department of Religious Affairs. Ini nga ahensia nagapangayo sing laygay sa Directorate General of Christian Community Guidance, nga ginatapuan sang debotado nga mga Protestante nga nagapamatok gid sa mga Saksi ni Jehova.

Isa ka adlaw, naistorya sang utod ang mataas nga opisyal sang Minister of Religious Affairs. Naghibal-anay sila nga isa lang sila ka baryo, gani kanami gid sang ila pag-istoryahanay sa ila dialekto. Sang ginsugiran sia sang utod parte sa mga problema sang mga Saksi sa Directorate  General of Christian Community Guidance, naghimo sing kahimusan ang opisyal agod direkta nga maistorya sang tatlo ka utod ang ministro, nga maamiguhon kag mabuot nga Muslim. Sang Mayo 11, 1968, nagpagua ang ministro sing opisyal nga mando nga nagakilala sa mga Saksi ni Jehova subong relihion kag naghatag sing kinamatarong sa ila nga padayunon ang ila hilikuton sa Indonesia.

Wala na ginakonsulta sang mataas nga opisyal ang Directorate General of Christian Community Guidance agod makakuha sing visa ang dumuluong nga misyonero nga mga Saksi. Sa bulig sining bukas sing hunahuna nga opisyal, 64 ka misyonero ang nakasulod sa Indonesia sa sulod sang pila ka tuig.

Sang 1968, mga 300 ka misyonero kag espesyal payunir kag sobra 1,200 ka manugbantala ang padayon nga nagabantala sa bilog nga Indonesia. Ginhanas gid sang mga misyonero ang lokal nga mga kauturan. Nakabulig ini agod mangin madasig ang ila pag-uswag sa espirituwal. Suno gid sa tion ini nga paghanas bangod may matabo nga grabe nga paghingabot sa indi madugay.

Ang “Regalo sa Krismas” Para sa Klero

Sang 1974, ginpadayon sang Directorate General of Christian Community Guidance ang ila madugay na nga kampanya sa pagdumili sa mga Saksi ni Jehova. Ang direktor sina nga departamento nagsulat sa tanan nga lokal nga talatapan sang Department of Religious Affairs, nga nagasumbong nga indi pa legal ang mga Saksi ni Jehova. Ginsugyot niya ang lokal nga mga opisyal nga pamatukan ang mga Saksi kon maghatag ini sa ila sing “mga problema”—hapaw nga rason agod hingabuton ang katawhan ni Jehova. Wala ini ginsapak sang kalabanan nga opisyal. Apang gingamit ini sang iban agod dumilian ang mga miting kag pagbantala sa mga balay.

Sang Disiembre 24, 1976, ginpahibalo sang pamantalaan ang pagdumili sa mga Saksi ni Jehova

 Sa amo man nga tion, ang World Council of Churches (WCC) nagaplano nga maghiwat sang internasyonal nga pagtilipon sa Jakarta, gani nainsulto kag naakig ang mga Muslim diri. Bangod nagalain ang pagtamdanay sang mga relihion, ginkanselar sang WCC ang pagtilipon. Apang nangin isyu ang pagpangumbertir sang mga Cristiano, kag madamo nga pulitiko ang ginkulbaan sa sini. Siempre, ginbasol sang mga klero ang mga Saksi ni Jehova paagi sa hayag nga pagreklamo sa ila pagbantala. Bangod sini, nagdamo ang opisyal nga may indi maayo nga pagtamod sa mga Saksi.

Sang Disiembre 1975, bangod nagalain na gid ang pagtamdanay sang mga relihion, ginsalakay sang Indonesia ang East Timor (karon Timor-Leste), nga kolonya anay sang mga Portuguese. Pagligad sang pito ka bulan, nakontrol sini ang East Timor, gani nagbaskog pa gid ang patriotismo sa bilog nga pungsod. Nagpabilin nga neutral ang mga kauturan kag nangindi nga mag-entra sa militar ukon magsaludo sa bandera, amo nga naakig gid ang mataas nga mga opisyal sang militar. (Mat. 4:10; Juan 18:36) Ginhingalitan sang mga klero ini nga kahimtangan, gani nagprotesta sila sa gobierno nga maghulag batok sa mga Saksi. Sa katapusan, sang tungatunga sang Disiembre 1976, nabaton sang klero ang ila “regalo sa Krismas”—ginpahibalo sang gobierno nga gindumilian na ang mga Saksi ni Jehova.