Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2016 Tuigan nga Libro sang mga Saksi ni Jehova

 INDONESIA

Mga Pamaagi sa Pagbantala Sadto

Mga Pamaagi sa Pagbantala Sadto

Pagwaragwag sa Radyo

SANG 1933, naghimo sing kahimusan ang mga kauturan agod mawaragwag sa isa ka estasyon sang radyo sa Jakarta ang Ingles nga mga rekording sang lektyur ni Utod Rutherford. Ang lektyur naman sa Dutch ginbasa sa kahanginan sang isa ka interesado sa kamatuoran. Bangod sini madamo ang nangin interesado, kag nabuligan ang mga kauturan nga makapahamtang sing mas madamo nga literatura.

Sang ginwaragwag ang mabaskog nga lektyur ni Utod Rutherford nga “Ang Epekto sang Balaan nga Tuig sa Paghidait kag Kauswagan,” naakig ang Katoliko nga klero. * Ginsugo nila ang ila mga tinawo nga kasuhan sing “pagpasipala, pagyaguta, kag pagdumot” si Utod De Schumaker, ang nagsuplay sang rekording. Ginpangapinan gid ni Utod De Schumaker ang akusasyon sa iya pero ginpamulta sia sing 25 ka guilder * kag ginpabayad sing danyos sa korte. Ang tatlo ka dalagku nga pamantalaan nagreport parte sini, nga nagresulta sa mas daku nga pagpanaksi.

 Ang Lightbearer

Sang Hulyo 15, 1935, ang 52 ka pie nga sakayan sang Watch Tower Society nga Lightbearer nag-abot sa Jakarta sa tapos sang anom ka bulan nga paglayag halin sa Sydney, Australia. Sakay sa sini ang pito ka makugi nga payunir nga determinado sa pagbantala sang maayong balita sa bilog nga Indonesia, Singapore, kag Malaysia.

 Sa sobra duha ka tuig, ginkadtuan sang mga payunir sa Lightbearer ang dalagku kag magagmay nga mga pantalan sa Indonesia, nga nagapanagtag sang madamo nga literatura sa Biblia. Sa pagdungka sa magagmay nga mga pantalan, “ginapatokar sang mga tripulante ang isa sa mga lektyur ni J. F. Rutherford, ang presidente sadto sang Watch Tower Society,” saysay ni Jean Deschamp. “Hunahunaa ang kakibot sang Malay nga mga tawo sa nabaw-ing nga mga lugar sang makita nila ang daku nga yate nga nagdungka sa ila pantalan kag nakabati sang mabaskog nga tingog sa kahanginan. Daw nakakita lang sila sing salakyan halin sa kahawaan.”

Naakig gid ang klero sa maisugon nga pagbantala sang mga utod, gani ginpilit nila ang mga opisyales nga dumilian ang Lightbearer sa madamo nga pantalan sa Indonesia. Sang Disiembre 1937, nagbalik sa Australia ang Lightbearer nga nakahimo sing talalupangdon nga rekord sang pagmisyonero sa Indonesia.

Mga tripulante sang Lightbearer

^ par. 2 Ang lektyur ni Utod Rutherford nagbuyagyag sa kagarukan sang Iglesia Katolika Romana sa espirituwal, pulitikal, kag komersial.

^ par. 2 Katumbas ini karon sang mga 13,500 ka pesos.