• NATAWO 1928

  • NABAWTISMUHAN 1941

  • MALIP-OT NGA BIOGRAPIYA Alagad sang sanga sa Indonesia sa sobra 25 ka tuig.

SANG aga sang Oktubre 1, 1965, ginpatay sang tropa sang Partido Komunista sa Indonesia (PKI) ang anom ka prominente nga heneral agod magkudeta. Maabtik kag mapintas ang balos sang gobierno. Ginpamatay ang mga 500,000 nga ginakabig nila nga komunista sa ginasiling nga “grabe nga kasingki” sa pungsod.

Pila ka semana sa tapos sang napaslawan nga kudeta, ginsilingan ako sang mataas nga opisyal sang militar nga ang akon ngalan una sa listahan sang mga lider sang relihion sa amon lugar nga plano nga patyon sang mga komunista. Nagsiling pa gani sia nga updan niya ako sa ginkutkot nga lulubngan para sa akon, pero mainayuhon ako nga nangindi. Sa mga lugar nga grabe ang tension sa pulitika, indi ko gusto makita nga nagaupod sa iya kag makompromiso ang akon Cristianong neutralidad.