Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2016 Tuigan nga Libro sang mga Saksi ni Jehova

 INDONESIA

Nabantalaan ang Sidlangan

Nabantalaan ang Sidlangan

Sang 1953, si Peter Vanderhaegen gin-asayn subong manugtatap sang sirkito sa Indonesia. Bilog nga pungsod ang iya teritoryo, nga may kalaparon nga mga 5,100 ka kilometro halin sa sidlangan pa-katundan kag 1,800 ka kilometro halin sa aminhan pa-bagatnan. Sa pagkadto sini nga mga lugar, pirme sia may makahaladlok nga mga eksperiensia.

Si Peter Vanderhaegen

Sang 1954, nagbiyahe sia sa nasidlangan nga bahin sang Indonesia, lugar nga madamo sing relihion lakip ang isla sang Bali, nga madamo sing Hindu; Lombok kag Sumbawa, nga kalabanan mga Muslim; Flores, nga kalabanan mga Katoliko; kag Sumba, Alor, kag Timor, nga kalabanan mga Protestante. Nagasakay sia sa gamay nga baruto, kag nagabantala sing makadali sa pila ka isla nga iya maagyan antes sia makaabot sa Kupang, ang kapital sang Timor.  “Duha ka semana ako nga nagbantala sa Timor,” siling ni Utod Vanderhaegen. “Bisan pa mabaskog ang ulan, napahamtang ko ang tanan ko nga literatura, nakabaton sing 34 ka suskripsion, kag nakasugod sing pila ka pagtuon.” Gintatap sang mga espesyal payunir ang mga interesado diri kag nakatukod sing kongregasyon sa Kupang. Halin diri, naglapnag ang maayong balita sa kaingod nga mga isla sang Rotè, Alor, Sumba, kag Flores.

Sang nakita sang klero nga Protestante sa Kupang nga nagapamati sa mga Saksi ni Jehova ang ila panong, nahisa sila kag naakig. Ang mataas nga klerigo nagmando kay Thomas Tubulau, tigulang nga latero nga kumpol ang isa ka kamot, nga mag-untat sa pagtuon sa mga Saksi, nga nagasiling nga kon indi sia mag-untat sa pagsugid sa iban sang iya natun-an, magatulo gid ang dugo. Maisugon nga nagsabat si Thomas: “Wala sing Cristiano nga maghambal sang imo ginsiling. Indi na ako magsimba sa inyo simbahan.” Nangin makugi nga manugbantala si Thomas, kag ang iya bata nga babayi nangin espesyal payunir.

Bisan pa sa sini, determinado ang klero nga balabagan ang mga Saksi ni Jehova. Sang 1961, nagmadinalag-on sila sa pag-impluwensia sa Department of Religious Affairs kag sa lokal nga mga opisyal sang militar nga dumilian ang aton pagbantala sa mga balay. Gani ginbag-o sang mga kauturan ang ila mga pamaagi sa pagbantala. Ginbantalaan nila ang mga tawo sa merkado kag sa mga bubon, ang mga mangingisda nga nagadala sa baybay sang ila isda, kag ang mga pamilya nga nagatinlo sa mga patyo. Pagligad sang isa ka bulan, nangin matinuguton ang mga opisyal sang militar kag ginpahibalo paagi sa mga radyo nga may kahilwayan sa relihion sa Timor. Sang nag-insister ang Department of Religious Affairs nga indi gihapon tugot ang pagbantala sa mga balay, ginpangabay sila sang mga kauturan nga isulat ang ila ginhambal. Nangindi ang mga opisyal,  gani ginpadayon sang mga kauturan ang ila pagbantala sa mga balay nga wala sing upang.

Sang nag-abot ang mga misyonero nga sanday Piet kag Nell de Jager kag Hans kag Susie van Vuure sa Papua sang 1962, ginpamatukan man sila sang klero sang Cristiandad. Ginkomprontar ang mga misyonero sang tatlo ka mataas nga ministro kag ginsugo nga sa iban nga lugar sila magbantala. Sa ila mga pulpito, sa pamantalaan, kag sa radyo, ginpatupatuan ang mga Saksi ni Jehova nga nagasugyot sila sing kagamo batok sa gobierno. Gin-into nila, ginpahog, ukon ginhamhaman ang ila mga miembro nga ginatun-an sang mga misyonero. Kag ginsugyot nila ang lokal nga mga lider sang komunidad nga pamatukan ang pagbantala.

Nagbalandra ini sa ila sang gin-agda sang isa ka lider ang mga misyonero nga mamulongpulong sa iya baryo. Sang natipon niya ang iya mga kasimaryo, naghatag kami ni Piet sing duha ka malip-ot nga pamulongpulong parte sa amon hilikuton,” saysay ni Hans. “Dayon ginpakita sang amon mga asawa kon paano kami manuktok sa ila mga puertahan, magsulod kon padayunon nila, kag magpaambit sing malip-ot nga mensahe sa Biblia. Positibo ang iya reaksion kag sang iya mga kasimaryo sa amon presentasyon kag gintugutan kami nga padayunon ang amon hilikuton.”

May iban pa nga hitabo nga kaangay sini. Talagsa lang nagapamatok ang mga Muslim sa pagbantala; ang kalabanan nga nagapamatok amo ang klero sang Cristiandad. Amo gihapon sini ang nagakatabo subong.

“Dalhon Kamo sa Atubangan sang mga Gobernador . . . Agod Makapanaksi”

Ginsilingan ni Jesus ang iya mga disipulo: “Dalhon kamo sa atubangan sang mga gobernador kag mga hari tungod sa akon, agod makapanaksi kamo sa ila kag sa mga  pungsod tuhoy sa akon.” (Mat. 10:18) Pirme napamatud-an ini nga mga pinamulong sa Indonesia.

Sang 1960, nagbalhag sing libro ang kilala nga Dutch nga teologo sa Jakarta nga nagapakamalaut sa mga Saksi ni Jehova subong butig nga Cristiano. Bangod sini, madamo nga klero ang namatok sa mga Saksi. Halimbawa, ang klero sa isa ka banwa nagsulat sa Department of Religious Affairs nga nagaakusar sa mga Saksi nga “nagalabugay sang ila mga miembro.” Sang ginpangabay sang mga opisyal ang mga kauturan nga sabton ang akusasyon, ginsugid nila ang matuod kag nakapanaksi gid sila. Ang opisyal sang relihion naglaygay sa iya kaupod: “Pabay-i ninyo ang mga Saksi ni Jehova. Ginapukaw lang nila ang nagakatulog nga mga Protestante.”

Pagdiskarga sang kargamento sang mga libro nga Paraiso, 1963

 Sang 1964, ang grupo sang klero nga Protestante sa Papua nag-apelar sa Parliamentary Committee sang Religious and Social Affairs nga dumilian ang hilikuton sang mga Saksi ni Jehova. Gani, nangabay ang sanga talatapan nga maatubang sa komite agod magpangapin. “Halos isa ka oras nga nag-atubang kami sa komite kag ginpaathag sing maayo ang amon hilikuton nga pagtudlo sing Biblia,” siling ni Tagor Hutasoit. “Ang Protestante nga pulitiko nga nagpamatok nagsumbong sa amon nga ginagamo namon ang mga relihion sa Papua. Apang may simpatiya sa amon ang kalabanan nga miembro sang komite nga mga Muslim. Ginsilingan nila kami: ‘Ginagarantiyahan sang Konstitusyon ang kahilwayan sa relihion, gani may kinamatarong kamo nga magbantala.’” Sa tapos sini, ang mataas nga opisyal sa gobierno sang Papua nagsiling: “Ang bag-o nga gobierno . . . magapatuman gihapon sang kahilwayan sa relihion, kag maaplikar man ini sa bag-o nga mga relihion.”