Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

2016 Tuigan nga Libro sang mga Saksi ni Jehova

Pagpanaksi sa merkado sa Jakarta

 INDONESIA

Padayon nga Nag-uswag ang Hilikuton

Padayon nga Nag-uswag ang Hilikuton

Sang nabatian sang mga lider sang simbahan sang Cristiandad nga ginhatagan sing kahilwayan ang mga Saksi ni Jehova, nasubuan gid sila. Sobra 700 ka klero kag mga lider sang pito ka simbahan sang Protestante ang naghiwat sing seminar sa Jakarta agod sugyuton ang gobierno nga ibalik ang pagdumili. Pero mabakod nga nanindugan ang gobierno.

Sang naglapnag ang balita sa bilog nga pungsod nga ginkuha na ang pagdumili, madamo nga interesado ang nagsulat sa sanga talatapan nga nagapangabay sing mga literatura ukon pagtuon sa Biblia. Sang 2003, sobra 42,000 ang nagtambong sa Memoryal, kapin sa duha ka pilo sa kadamuon sang manugbantala sa pungsod. Halos 10,000 ang nagtambong sa isa ka asembleya sa Jakarta, lakip na ang mataas nga opisyal sang Department of Religious Affairs. Nagdayaw gid ang opisyal nga makita ang mga pamatan-on kag mga tigulang nga nagabukad sang ila mga Biblia. Ginpasalig niya ang mga kauturan nga panikasugan niya nga tadlungon ang sala nga impormasyon parte sa mga Saksi ni Jehova.

Bangod wala na ang pagdumili, makabalik na sa Indonesia ang mga misyonero. Ang una nga nakabalik amo sanday Josef kag Herawati Neuhardt * (halin sa Solomon Islands), Esa kag Wilhelmina Tarhonen (halin sa Taiwan), Rainer kag Felomena Teichmann (halin sa Taiwan), kag Bill kag Nena Perrie (halin sa Japan). Nagsunod sa ila ang bag-o nga mga misyonero nga naggradwar sa Gilead nga gin-asayn sa North Sumatra, Kalimantan, North Sulawesi, kag sa iban pa nga naligwin nga lugar.

“Nalipay gid ako sa pagbulig sa mga estudyante nga mag-uswag sa ila ikasarang sa pagtudlo kag pagpamulongpulong.” —Julianus Benig

 Sang 2005, naghiwat ang sanga sing duha ka bag-ong teokratikong eskwelahan. Ang isa ka instruktor sang Ministerial Training School (karon School for Kingdom Evangelizers) nga si Julianus Benig, nagsiling, “Nalipay gid ako sa pagbulig sa mga estudyante nga mag-uswag sa ila ikasarang sa pagtudlo kag pagpamulongpulong kag mangin mapuslanon pa gid sa organisasyon.” Madamo sa naggradwar ang mga espesyal payunir ukon manugtatap sang sirkito na karon. Ang kalabanan nga kauturan nga nag-eskwela sa una nga klase sang School for Traveling Overseers * nahanas na sa tion sang pagdumili. Ang bag-o nga eskwelahan nagbulig sa ila nga matuman ang ila mga asaynment sang nakuha na ang pagdumili. Si Ponco Pracoyo, nga nag-eskwela sa una nga klase, nagsiling: “Ginbuligan ako sang eskwelahan nga mangin mas mahinangpanon kag mas responsable sa pagtuman sang akon katungdanan subong manugtatap sang sirkito. Makapaumpaw ini kag makapalig-on!”

 Pag-aman sang Ginadalian nga Kinahanglanon

Sa sulod sang 25 ka tuig nga pagdumili, kalabanan nga kongregasyon sa Indonesia nagatipon sa pribado kag gamay nga mga balay agod magsimba. Pila lang ka kongregasyon ang makasarang sa pagpatindog sang Kingdom Hall, kag halos imposible nga makakuha sing mga permit sa pagpatindog sing bag-o nga duog sang pagsimba. Bangod madamo nga kongregasyon ang madasig nga nagauswag, ang sanga talatapan nagporma sang Kingdom Hall Construction Desk (karon Local Design/Construction Department) agod maaman ining ginadalian nga kinahanglanon.

Ang isa sa una nga nakabenepisyo sa bag-o nga programa sang pagpatindog amo ang Nias Island sa North Sumatra. “Sang nabatian namon nga patindugan kami sing bag-o nga Kingdom Hall, nalipay gid kami,” siling ni Haogo’aro Gea, madugay na nga miembro sang Kongregasyon sang Gunungsitoli. “Ginpadala sang sanga talatapan ang pito ka boluntaryo agod dumalahan ang proyekto. Nahuman ini sang 2001.” Si Faonasökhi Laoli, miembro sang lokal nga komite sang pagpatindog, nagsaysay: “Nagatipon lang kami sadto sa pribado kag gamay nga balay, kag ginamatamata sang komunidad ang mga Saksi ni Jehova. Apang sang nahuman ang Kingdom Hall, ang aberids nga tumalambong nagtaas halin sa 20 pa 40. Sa sulod sang 12 ka bulan, nagtaas ini sing sobra 500 porsiento. Ang amon duog sang pagsimba amo ang pinakamatahom sa amon lugar, kag ginatahod na sang komunidad ang mga Saksi ni Jehova.”

Kingdom Hall sa Bandung

Sang 2006, sa Bandung, West Java, nagpangita ang mga kauturan sing lote agod patindugan sang una nga Kingdom Hall diri. “Nalab-utan kami sing 12 ka bulan sa pagpangita sing nagakaigo nga lote,” siling ni Singap Panjaitan, gulang nga miembro sang komite sang pagpatindog. “Pero  kinahanglan magpasugot sa sini nga proyekto ang mga 60 ka indi Saksi nga kaingod agod mahatagan kami sang awtoridad sing permit sa pagpatindog. Ginsuportahan sang 76 ka kaingod ang proyekto, lakip ang impluwensiado nga babayi nga nagpamatok sa amon sang primero. Sang nahuman ang tilipunan, gin-agda namon ang mga kaingod kag ang meyor sa Bandung nga lantawon ang sulod sini. Nagsiling ang meyor, ‘Ining matinlo kag mahipid nga duog sang pagsimba nagpahamtang sing talaksan para ilugon sang tanan nga simbahan.’” Ang duha ka panalgan nga Kingdom Hall gindedikar sang 2010.

Sugod sang 2001, sobra 100 ka Kingdom Hall ang napatindog sa Indonesia, pero madamo pa ang kinahanglan.

^ par. 3 Ang sugilanon sang kabuhi ni Herawati Neuhardt naggua sa Pebrero 2011 nga Magmata!

^ par. 1 Ginatawag karon nga School for Circuit Overseers and Their Wives.