Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2016 Tuigan nga Libro sang mga Saksi ni Jehova

 INDONESIA

Maisugon nga Payunir

André Elias

Maisugon nga Payunir
  • NATAWO 1915

  • NABAWTISMUHAN 1940

  • MALIP-OT NGA BIOGRAPIYA Maisugon nga payunir nga malig-on nga nanindugan sang gin-interogar sia kag ginpahog.

SANG Bug-os Kalibutan nga Inaway II, nag-atubang si Utod Elias kag si Josephine nga iya asawa sa mga opisyal sa Sukabumi, West Java, sa ulong talatapan sang Kempeitai, ang pulis militar sang mga Hapon. Si André ang una nga gin-interogar. Ginpaarakan sia sing mga pamangkot. “Sin-o ang mga Saksi ni Jehova? Nagapamatok bala kamo sa gobierno sang Hapon? Espiya bala kamo?”

“Mga alagad kami sang Labing Gamhanan nga Dios kag wala kami sing sala,” sabat ni André. Ginkuha sang nagadumala nga opisyal ang samurai sa dingding kag ginbayaw.

“Ano abi kon patyon ko ikaw?” sing-al niya. Gintaya ni André ang iya ulo sa lamesa kag hipos nga nangamuyo. Sa tapos sang madugay nga kalinong, nagkinadlaw sila. “Maisog ka!” siling sang opisyal. Ginpatawag niya dayon  si Josephine. Sang pareho ang ila sabat ni André, nagsiling ang opisyal: “Indi kamo mga espiya. Lakat na kamo!”

Pagligad sang binulan, ginpakalain si André sang “indi matuod nga mga kauturan” kag napriso sia. (2 Cor. 11:26) Pila ka bulan sia nga nagkaon sing mga pagkaon nga iya napulot sa ginaagyan sang tubig sa iya selda. Apang wala mabungkag ang iya integridad. Sang nakabisita si Josephine sa iya, ginhutikan sia ni André sa mga rehas: “Indi ka magkabalaka. Patyon man nila ako ukon buy-an, mangin matutom ako kay Jehova. Paguaon nila ako nga bangkay pero indi isa ka traidor.”

Pagligad sang anom ka bulan, ginpangapinan ni André ang iya kaugalingon sa Mataas nga Korte sang Jakarta kag nahilway sia.

Mga 30 ka tuig sang ulihi, sang gindumilian liwat sang gobierno sang Indonesia ang mga Saksi ni Jehova, ang abogado sang distrito sa Manado, North Sulawesi, nagpatawag kay André sa iya opisina. “Nakabalo ka bala nga gindumilian na ang mga Saksi ni Jehova?” pamangkot niya.

“Huo,” sabat ni André.

“Masaylo ka na bala sing relihion?” pamangkot niya.

Nagpalapit si André sa iya kag dramatiko nga nagpukpok sang iya dughan. “Bisan kuhaon mo ang akon tagipusuon, indi gid ako magsaylo sing relihion,” siling niya nga may kombiksion.

Ginpalakat niya si André kag wala na sia gintublag liwat.

Sang 2000, napatay si André sa edad nga 85 anyos sa tapos sang mga 60 ka tuig nga makugi nga pagpayunir.