Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

2016 Tuigan nga Libro sang mga Saksi ni Jehova

Sa isa ka asembleya sa tion sang pagdumili, ang iban nga tagpalamati yara sa sakayan

 INDONESIA

Determinado nga Magpadayon

Determinado nga Magpadayon

Sang nahibaluan sang mga utod sa sanga ang pagdumili, naghulag sila gilayon. “Gintago namon ang kompidensial nga mga rekord, suplay sang mga literatura, kag mga kuarta sang sanga sa lainlain nga balay sa bilog nga Jakarta,” siling ni Ronald Jacka. “Dayon ginsaylo namon ang sanga talatapan sa lugar nga wala nila mahibaluan kag likom nga ginbaligya ang mga bilding sang daan nga sanga talatapan.”

Ang kalabanan nga kauturan diri aktibo gihapon kag wala nahadlok. Nakaagi na sila sing grabe nga mga pagtilaw antes sang pagdumili, kag padayon sila nga nagasalig kay Jehova. Pero wala nakapangaman ang pila ka kauturan. May pila ka gulang nga nahadlok kag nagpirma sing kasugtanan nga mag-untat sa pagbantala. Ginsugid naman sang iban kon sin-o ang mga miembro sang kongregasyon. Ginpadala sang sanga talatapan ang hamtong nga mga utod agod pabakuron ang mga kongregasyon kag buligan ang mga nagkompromiso. Si John Booth, miembro sang Nagadumala nga Hubon, nagbisita man sa Indonesia kag nagpalig-on sa ila kaangay sang isa ka amay.

Maathag nga ginapabakod kag ginalugpayan ni Jehova, ang Daku nga Manugbantay, ang iya katawhan. (Ezeq. 34:15) Nangin aktibo ang mga gulang sa pagdumala sang espirituwal nga mga hilikuton, kag nakatukib ang mga manugbantala sing bag-o kag mainandamon nga mga paagi sa pagbantala. (Mat. 10:16) Madamo ang nagbakal sing mga kopya sang moderno kag barato nga Biblia sa Indonesian Bible Society kag ginatanyag ini sa tagbalay, nga mahalungon gid nga nagapaambit sang mensahe sang Ginharian. Ginakakas naman sang iban ang copyright page  sang aton mga publikasyon kag ginapanagtag sa mga interesado. Madamo nga payunir ang nagapakunokuno nga nagabaligya sa mga balay agod makabantala, pareho sang ginhimo sang mga kauturan nga ginsundan nila sa tion sang pagpanakop sang mga Hapon.

Sanday Margarete kag Norbert Häusler

Sang 1977, may paagi na naman ang Department of Religious Affairs agod hingabuton ang mga Saksi—wala nila gin-renew ang visa sang misyonero nga mga Saksi ni Jehova. Ang kalabanan nga misyonero gin-asayn sa iban nga pungsod. * “Ginatos ka kauturan ang nagpa-erport agod magpaalam,” saysay sang misyonero nga si Norbert Häusler, nga nag-alagad upod sa iya asawa nga si Margarete  sa Manado, North Sulawesi. “Nagsaka kami sa hagdan sang eroplano kag nagdulog agod magbalikid. Madamo ang nagababay sa amon, kag nagalanog ang hinibi sa erport: ‘Salamat sa inyo. Salamat sa pagkari ninyo.’ Nagsulod kami sa eroplano kag naghibi.”

Kinagamo sa Sumba

Samtang nagalapnag ang balita parte sa pagdumili sa bilog nga arkipelago, ang Indonesian Communion of Churches nagsugyot sa ila mga miembro nga ireport sa awtoridad ang bisan ano nga hilikuton sang mga Saksi. Bangod sini, madamo ang gin-aresto kag gin-interogar sa madamo nga isla.

Sa Waingapu, sa isla sang Sumba, ginpatawag sang kumander sang militar sa distrito ang 23 ka kauturan sa ila kampo kag ginsugo nga magpirma sa deklarasyon nga nagasikway sang ila pagtuo. Sang nangindi sila, ginsugo sila sang kumander nga magbalik sa kampo sa masunod nga adlaw—nga may kalayuon nga 14 ka kilometro pakadto-pabalik kag malakat lang sila.

Pagkaaga, temprano pa sila nagreport sa kumander kag isaisa sila nga gintawag nga magpalapit kag ginpapirma sa deklarasyon. Ang mangindi ginalapdusan sang mga soldado sing tunukon nga mga sanga. Nagpinagusto ang mga soldado sa pagsakit sa ila, kag nalipong ang pila ka kauturan. Ang iban nga kauturan naghulat sang ila turno. Sang ulihi, ang pamatan-on nga utod nga si Mone Kele nagpalapit kag nagsulat sa deklarasyon. Nasubuan gid ang mga kauturan, pero grabe gid ang kaakig sang kumander. Ang ginsulat ni Mone, “Magapabilin gid ako nga isa sa mga Saksi ni Jehova tubtob san-o!” Ginkastigo si Mone kag gindala sa ospital bangod sa mga pilas, apang wala gid nabungkag ang iya espirituwalidad.

Sa sulod sang 11 ka adlaw, ginpanikasugan gid sang kumander nga bungkagon ang integridad sang mga  kauturan. Ginpatindog niya sila sa bilog nga adlaw sa nagatagiti nga init. Ginpakamang niya sila sing pila ka kilometro kag ginpadalagan sing malayo nga nagadala sing mabug-at nga mga butang. Samtang ginatayaan sila sa tutunlan sing bayoneta, ginmanduan niya sila nga magsaludo sa bandera; apang nangindi sila. Gani nagmando sia nga kastiguhon pa gid sila.

Kada aga, nagabalik ang mga kauturan sa kampo nga nagapalibog kon ano ang nagahulat nga pagpaantos sa ila. Sa dalan, nagapangamuyo sila sing tingob kag nagapalig-unay nga magpabilin nga mainunungon. Kag kada gab-i, nagapauli sila nga madamo sing pilas kag dugo, apang nalipay nga nakapabilin sila nga matutom kay Jehova.

Sang nabalitaan sang sanga talatapan nga ginapaantos ang mga kauturan, nagtelegrama dayon sila sa kumander sang militar sa Waingapu, sa kumander sang militar sa rehiyon sang Timor, sa kumander sang militar sa dibisyon sang Bali, sa pinakamataas nga kumander sang militar sa Jakarta, kag sa iban pa nga opisyal sang gobierno agod magreklamo. Bangod nahuy-an sia kay nabalahuba sa bilog nga Indonesia ang iya ginahimo, gin-untatan sang kumander sang militar sa Waingapu ang paghingabot sa mga kauturan.

“Daw mga Lansang ang mga Saksi ni Jehova”

Pagkadason nga mga tuig, indi maisip nga mga Saksi sa bilog nga Indonesia ang ginpriso, gin-interogar, kag ginkastigo. “Sa isa ka lugar, madamo sing kauturan ang ungab bangod sa pagkastigo,” saysay sang misyonero nga si Bill Perrie. “Kon makaistorya sila sang utod nga ara pa ang  panampad nga unto, ginalahugan nila sia: ‘Bag-uhan ka? Ukon, nagkompromiso ka?’ Bisan pa sang mga pagtilaw, ang mga ginhingabot malipayon gihapon ukon mapagsik sa pag-alagad kay Jehova.”

“Mas nagsalig pa gid ako kay Jehova sang napriso ako, kag nagpabakod pa gid ini sang akon espirituwalidad”

Sa sulod sang 13 ka tuig, 93 ka Saksi ang ginpriso sing duha ka bulan asta apat ka tuig. Ang naagyan nila nga paghingabot nagpabakod pa gid sang ila pagtuo nga magmainunungon kay Jehova. Sa tapos mapriso sing walo ka bulan, ginbisitahan ni Musa Rade ang mga kauturan sa ila lugar agod palig-unon nga magpadayon sa pagbantala. “Mas nagsalig pa gid ako kay Jehova sang napriso ako, kag nagpabakod pa gid ini sang akon espirituwalidad,” siling niya. Indi katingalahan nga nagsiling ang pila nga nakaobserbar: “Daw mga lansang ang mga Saksi ni Jehova. Kon ginapulpog mo sila, nagadalom pa gid ang ila dulot.”

Mga manugbantala nga mabantala sa Ambon, Maluku

^ par. 1 Ang madugay na nga mga misyonero nga sanday Peter Vanderhaegen kag Len Davis mga tigulang na kag si Marian Tambunan (Stoove anay) nakapamana sing Indonesian, gani gintugutan sila nga magtener sa Indonesia. Aktibo gihapon sila kag mabungahon sa pagministeryo sa tion sang pagdumili.