Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

2015 Tuigan nga Libro sang mga Saksi ni Jehova

 DOMINICAN REPUBLIC

Sin-o ang Ulo?

Sin-o ang Ulo?

“Wala Na sing Ulo ang Ila Organisasyon”

Sang Hulyo 13, 1957, si Inspektor Colón nagsulat sa secretary of state: “May popular nga hambalanon nga nagasiling: ‘Dapat mo utdan sing ulo ang man-ug.’ Para madula ang sekta nga mga Saksi ni Jehova sa pungsod, dapat pahalinon ang ila mga misyonero. Kon matabo ina, wala na sing ulo ang ila organisasyon, kag kon wala na sila sing ulo, mauntat na ang ila hilikuton.”

Wala madugay pagkatapos sini, ang Secretary of Security nga si Arturo Espaillat nagmando sa napulo ka misyonero nga nabilin nga maghalin sa pungsod. Sang Hulyo 21, 1957, si Roy Brandt nagsulat kay Trujillo nga nagapangabay nga makigkita sa iya para ipaathag ang aton kahimtangan. Mabasa sa bahin sang sulat: “Ang pagpakalain nga ginahimo sang mga tawo sa sini nga pungsod batok sa ngalan ni Jehova nga Dios pareho sa pagpakalain nga ginhimo sadto sang mga tawo batok sa mga apostoles ni Jesus.” Dayon ginpalig-on ni Brother Brandt si Trujillo nga basahon ang Binuhatan kapitulo 2 asta 6 kag nagpaathag sia, “Ang prangka nga laygay nga ginhatag ni Hukom Gamaliel sadto nga tion maaplikar gihapon asta subong.” Sa dalagku nga mga letra ginkutlo ni Brother Brandt ang Binuhatan  5:38, 39: “PABAY-I NINYO INI NGA MGA TAWO KAY KON ANG ILA HILIKUTON HALIN SA DIOS, BASI MASAPWAN NINYO SA ULIHI NGA NAGAPAKIG-AWAY NA KAMO SA DIOS.” Pero wala gid ginpamatian ang iya pangabay. Sang Agosto 3, 1957, gindala ang mga misyonero sa erport kag ginpahalin sa pungsod.

‘Si Jesus ang Ulo’

Si Donald Nowills ang nagdumala sang hilikuton sa sanga sang 20 anyos pa lang sia

Ano na ang matabo sa mga kauturan kay wala na ang mga misyonero? Wala na bala sila sing ulo, pareho sang ginsiling ni Inspektor Colón? Indi, si Jesus “ang ulo sang lawas, nga amo ang kongregasyon.” (Col. 1:18) Gani, may ulo gihapon ang katawhan ni Jehova sa Dominican Republic. Padayon sila nga ginaatipan ni Jehova kag sang iya organisasyon.

Si Donald Nowills, nga gin-asayn sa pagdumala sang hilikuton sa sanga sang ginpahalin na ang mga misyonero,  20 anyos pa lang sadto kag apat ka tuig pa lang nga nabawtismuhan. Bisan pa nag-alagad sia bilang manugtatap sang sirkito sa sulod sang pila ka bulan, bag-o para sa iya ang hilikuton sa sanga. May gamay sia nga opisina sa ila balay. Human ini sa kahoy, sin ang atop, duta ang salog, kag nahamtang sa Gualey, nga delikado gid nga lugar sa Ciudad Trujillo. Paagi sa bulig ni Félix Marte, naghimo sia sing mga kopya sang Lalantawan para ipanagtag sa bug-os nga pungsod.

Ang Lalantawan nga gin-mimeograph sang 1958

Si Mary Glass, nga ang iya bana nga si Enrique nabilanggo sa sina nga tion, nagbulig kay Brother Nowills. “Nagahalin ako sa akon trabaho 5:00 p.m.,” siling niya, “kag nagakadto sa opisina ni Brother Nowills para i-type ang Lalantawan. Dayon kopyahon ini ni Brother Nowills paagi sa mimeograph. Pagkatapos sini, isulod ini sang sister nga taga-Santiago, nga may code name nga ‘anghel,’ sa lata sang mantika nga lima ka galon ang makaigo. Dayon tabunan niya ini sang tela kag tampukan  sang balinghoy, patatas, ukon gabi kag tabunan ini sang sako. Dayon mabiyahe sia pakadto sa aminhan nga bahin sang pungsod kag bilinan sang isa ka kopya ang tagsa ka kongregasyon. Bulosbulos nga ginahulam ini sang kada pamilya para matun-an nila.”

“Kinahanglan gid namon maghalong,” siling ni Mary, “kay madamo nga tinawo sang gobierno ang nagabantay para tukibon kon diin ginaimprinta ang Lalantawan. Pero wala gid nila ini matukiban. Padayon kami nga ginaamligan ni Jehova.”