Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

2015 Tuigan nga Libro sang mga Saksi ni Jehova

 DOMINICAN REPUBLIC

Ang Paglaum Parte sa Ginharian Indi Isa ka Damgo

Efraín De La Cruz

Ang Paglaum Parte sa Ginharian Indi Isa ka Damgo
  • NATAWO 1918

  • NABAWTISMUHAN 1949

  • MALIP-OT NGA BIOGRAPIYA Bisan pa nabilanggo kag mapintas nga ginsakit sa pito ka prisuhan, wala gid magluya ang iya determinasyon nga ibantala ang maayong balita sang Ginharian sang Dios.

SANG 1948, ang akon asawa nga si Paula, ang amon anak nga babayi, kag ako nagsugod sa pagtambong sa mga miting sang mga Saksi ni Jehova sa Blanco Arriba. Kinahanglan kami maglakat sing 40 kilometros pakadto-pabalik, pero wala gid kami nakaabsent sa miting. Sang Enero 3, 1949, nabawtismuhan kami ni Paula.

Pagligad sang anom ka bulan, ang pila sa amon sa kongregasyon gin-aresto kag ginsentensiahan sing tatlo ka bulan nga pagkabilanggo. Sa salog lang kami nagatulog kag isa ka bes lang kami nagakaon kada adlaw, kag green nga saging kag tsa lang ang amon pagkaon. Sang ginhilway kami, ginpahog kami sang mga opisyal sang gobierno kag naghunahuna sila nga mauntat na kami sa pagbantala. Pero pagpauli namon, sekreto kami nga nagabantala kag nagahiwat sang mga miting. Bangod pirme kami ginabantayan sang mga tinawo sang gobierno, nagatipon kami sa mga balay, sa talamnan sang kape, ukon sa  mga uma. Sa baylo nga magtipon sa isa lang ka lugar, ginapahibalo namon pagkatapos sang kada miting kon diin hiwaton ang masunod nga miting. Kon magbantala, nagaisahanon lang kami; pang-obra nga bayo ang amon ginasuksok, kag wala kami nagagamit sing literatura ukon Biblia. Bisan pa sini, sugod sang 1949 asta 1959, gua-sulod ako sa pito ka prisuhan, nga tatlo asta anom ka bulan ang kada sentensia.

Nagahalong gid ako kay ang pila sa mga nagahingabot sa akon mga paryente ko mismo. Bisan pa nagatulog ako sa mga bukid ukon sa uma para indi madakpan, nagakadakpan gihapon ako. Isa ka bes sang gin-aresto ako, gindala ako sa prisuhan sa La Victoria sa Ciudad Trujillo, diin may mga 50 asta 60 ka bilanggo sa isa ka selda. Sa sini nga prisuhan, makakaon kami sing duha ka beses kada adlaw—binukbok nga mais sa aga kag gamay nga rasyon sang kan-on nga may beans sa udto. Ginabantalaan sang tanan nga Saksi ang iban nga priso, kag regular kami nga nagahiwat sang amon mga miting, paagi sa pagbinagbinag sang mga teksto nga nasaulo namon kag pagsaysay sing mga eksperiensia sa amon ministeryo.

Sang pinakaulihi nga tion nga napriso ako, ginsakit ako sang soldado sa ulo kag gusok paagi sa riple. Bisan pa nabatyagan ko gihapon ang epekto sini kag sang iban pa nga pagmaltrato, yadto nga mga pagtilaw nagpabakod sang akon pagtuo, pagbatas, kag determinasyon nga alagaron si Jehova.

Subong, 96 anyos na ako, kag isa ka ministeryal nga alagad sa kongregasyon. Bisan pa indi na ako makalakat sing malawig, nagapungko ako sa atubang sang amon balay kag nagabantala sa tanan nga nagalabay. Para sa akon, ang paglaum parte sa Ginharian indi isa ka damgo. Matuod gid ini, kag sobra 60 ka tuig ko na ini nga ginabantala. Kon daw ano ka matuod sa akon ang bag-o nga kalibutan sang una ko nga nabatian ang mensahe sang Ginharian, amo man ini gihapon asta subong. *

^ par. 3 Si Efraín De La Cruz napatay samtang ginahanda ini nga kasaysayan.