Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

2015 Tuigan nga Libro sang mga Saksi ni Jehova

 DOMINICAN REPUBLIC

Pag-atubang sa Hangkat sang Pag-uswag

Pag-atubang sa Hangkat sang Pag-uswag

“Ang Tanan nga Sahi sang Tawo Maluwas”

Kabubut-on ni Jehova nga “ang tanan nga sahi sang tawo maluwas kag makadangat sa sibu nga ihibalo tuhoy sa kamatuoran.” (1 Tim. 2:4) May kaangtanan sa sini nga pagtamod sang Dios, ang mga Saksi ni Jehova sa Dominican Republic nanikasog gid para malab-ot ang tanan nga tawo sa ila teritoryo, lakip ang ara sa mga prisuhan.

Sang 1997, sa isa ka pagbisita sang mag-asawa nga espesyal payunir sa Najayo Prison sa San Cristóbal, nakilala nila si Gloria nga 23 anyos nga taga-Colombia nga napriso bangod sa pagbaligya sing droga. May naistorya si Gloria nga isa ka sister nga nabilanggo man bangod sa sayop nga panumbungon. Agod masabat ang mga pamangkot ni Gloria parte sa Biblia, gindal-an sia sang mag-asawa sang libro nga Reasoning From the Scriptures kag sang iban pa nga publikasyon. Bangod sa kakugi ni Gloria sa pagtuon, nangin interesado man ang iban nga priso, gani nagdamo ang ginaduaw sang mga Saksi kada semana.

Daku gid ang epekto sang kamatuoran kay Gloria, amo nga sang 1999 nangin kalipikado sia nga di-bawtismado nga manugbantala. Kada bulan nagahinguyang sia sing  sobra 70 ka oras sa pagbantala sa prisuhan subong iya teritoryo, kag nagadumala sing anom ka pagtuon sa Biblia sa iban nga priso nga babayi. Dayon sang 2000, nangabay sia nga hatagan sing parol kag gin-aprobahan ini bangod sang iya maayo nga paggawi. Ginhilway sia kag ginpapauli sa Colombia. Sang 2001, wala madugay sang nakapauli na sia, ginbawtismuhan sia, bisan pa grabe ang pagpamatok sang iya pamilya.

Natun-an ni Gloria Cardona ang kamatuoran sa prisuhan. Nagapayunir sia subong upod sa iya bana

Sa tapos nabawtismuhan si Gloria, nagpayunir sia. Nakapamana sia sang isa ka gulang, kag pareho sila nga regular payunir. Nagaalagad sila subong sa isa ka lugar sa Colombia diin mas daku ang kinahanglanon. Madamo sing nabuligan si Gloria nga magdedikar kag magpabawtismo. Para sa iya may utang sia kay Jehova, kag ang pinakamaayo nga paagi para makabayad sia amo ang pagbulig sa iban nga mahibaluan ang kamatuoran pareho sang ginhimo sa iya.

Subong sang ginapakita sang eksperiensia ni Gloria, indi mapunggan sang rehas nga salsalon ang mga priso sa pagtuon sang kamatuoran nga nagaluwas sing kabuhi. Ang mga representante sang sanga nakigkita sa mga opisyal sang General Bureau of Prisons agod mangayo sing permit nga tugutan ang mga kauturan sa pagdumala sing pagtuon sa Biblia sa madamo pa nga prisuhan. Subong resulta, 43 ka brother kag 6 ka sister ang ginhatagan sing permit agod makadumala sing pagtuon sa Biblia sa 13 ka prisuhan.

“Palabaa ang mga Banting sang Imo Tolda”

Sang katapusan nga bahin sang ika-20 nga siglo, ang Dominican Republic nagreport sing 21,684 ka manugbantala sang maayong balita sa 342 ka kongregasyon, kag 34,380 ka pagtuon sa Biblia. Ang nagtambong sa Memoryal 72,679. Bangod sini nga pag-uswag, gintuman gilayon  sang katawhan ni Jehova ang mga pulong ni Isaias: “Pasangkara pa ang imo tolda. Palapara ang tolda sang imo daku nga tabernakulo. Indi ini paglatiri, palabaa ang mga banting sang imo tolda.”—Isa. 54:2.

Nabudlayan ang mga utod sa pagpangita sang lugar nga patindugan sang Assembly Hall nga makaigo ang nagadamo nga manugbantala. Sang 1996, natapos ang Assembly Hall sa tupad sang sanga sa Santo Domingo, kag ginagamit ini sang mga kauturan sa kapital kag sa palibot sini. Pero, ang Assembly Hall sa Villa González nga ginagamit sang mga kauturan sa iban nga bahin sang pungsod, kinahanglan kay-uhon ukon bag-uhon.

Sang 2001, gin-aprobahan sang Nagadumala nga Hubon ang pagpatindog sing Assembly Hall sa Villa González nga makaigo ang 2,500 ka tawo. Nalipay ang mga kauturan sang nahibaluan nila nga mapatindog man diri sang pasilidad para sa Ministerial Training School (ginbuslan  karon sang School for Kingdom Evangelizers). Patindugon ini sa tupad sang Assembly Hall kag may ara ini mga kuarto, hulot-klasehan, librarya, kusina, kag kalan-an. Sang 2004, si Theodore Jaracz sang Nagadumala nga Hubon amo ang naghatag sing pamulongpulong para sa dedikasyon sang bag-o nga mga pasilidad. Sugod sadto, 15 na ka klase ang nahiwat diri.