Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2015 Tuigan nga Libro sang mga Saksi ni Jehova

 PAGBANTALA KAG PAGPANUDLO SA BUG-OS NGA DUTA

Oceania

Oceania
  • PUNGSOD 29

  • POPULASYON 40,208,390

  • MANUGBANTALA 97,583

  • PAGTUON SA BIBLIA 64,675

Nagbilin Sila sing Pinutos nga mga Literatura

Madamo nga isla sang Micronesia ang talagsa lang gid mabantalaan sang maayong balita, gani nagplano ang grupo sang manugbantala sa Marshall Islands nga kadtuan ini nga mga isla sa sulod sang duha ka semana. Halin sa isla sang Majuro, nagkadto sila sa mga isla sang Wotje kag Ormed sa Wotje Atoll.

Agod mapanaksihan ang madamo nga tawo, nagputos sila  sing mga literatura antes maghalin. Ang kada putos may apat ka magasin kag duha ka brosyur. Bangod wala nakahibalo ang mga manugbantala kon san-o sila makabalik sa mga isla, nagabilin sila sing isa ka putos sa mga interesado kag ginapalig-on sila nga ipaambit ini sa ila pamilya kag mga abyan. Sa sulod sang duha ka semana, nakapahamtang ang mga manugbantala sing 531 ka brosyur, 756 ka magasin, kag 7 ka libro.

“Salamat Kay Wala Ninyo Kami Nalipatan”

Sang Pebrero 2014, anom ka Saksi halin sa Papua New Guinea ang nagbantala sing napulo ka adlaw sa mga minuro sang Karkar Island. Madamo sila sing nasapwan nga interesado kag nakapahamtang sila sing 1,064 ka publikasyon. Ang sister nga si Relvie nagsiling: “Sa amon una nga adlaw, alas tres sang hapon nagabantala pa kami. Naubos na ang amon tubig nga ilimnon, nagaalay na ang amon apipingig, kag nagamala na ang amon tutunlan bangod wala untat ang amon hambal. Naistorya ko ang isa ka pamatan-on nga babayi. Gusto ko tani magbasa sing teksto, pero nauhaw na gid ako. Maayo lang kay ginhatagan niya ako sing tubig.”

Sang gab-i antes kami maghalin sa isa ka minuro, may miting ang mga miembro sang komunidad, kag ara ang lokal nga mga lider sang simbahan. Si Relvie nagsiling, “Pamatyag ko daw si Esteban lang ako nga nagapangapin sang kamatuoran sa atubangan sang Sanhedrin, ugaling mainabyanon lang ang amon tumalambong.” Sa tapos makahambal ang anom ka manugbantala, ang babayi nga koordenitor sang Lutheran Sunday school nagtindog kag nagpasalamat sa iya tiya, nga isa sa mga manugbantala, sa pagpaambit sang kamatuoran sa iya mga miembro. “Ang  imo maayo nga halimbawa,” siling niya, “pareho sang ginhimo sang Samaritana nga nagkadto kag nagsugid sa iya pamilya parte sa maayo nga mga butang nga nabatian niya kay Jesus. Salamat kay wala ninyo kami nalipatan.”

Kabata Pa Para Magbantala?

Kiribati: Sanday Teariki kag Tueti

Isa ka adlaw, ang pito ka tuig nga bata nga lalaki nga si Teariki sa isla sang Tarawa, nga sakop sang Kiribati, nag-upod sa iya amay nga si Tueti sa ministeryo. Sa isa ka balay, mga napulo ka lalaki kag babayi nga mga beintehon ang edad ang nag-atubang sa ila. Sa tapos nga mapaambit ni Tueti ang mensahe sang Ginharian sa ila, ang isa sa ila nagsiling sa iya: “Natalupangdan namon nga ginapaupod ninyo ang inyo mga bata sa pagbantala. Ngaa ginapaupod n’yo sila? Kabata pa sa ila para magbantala parte sa Dios.”

Si Tueti nagsabat: “Gusto n’yo tilawan kon makasarang na ang akon bata? Magua ako, para sia ang maistorya sa inyo.” Nagsabat ang grupo, “Sige, gusto namon mabatian ang isiling niya.”

Sang makagua si Tueti, ginpamangkot ni Teariki ang grupo, “Bal-an n’yo ang ngalan sang Dios?”

“Huo. Si Jesus!” sabat sang isa sa ila. “Dios,” siling naman sang isa. “Ginuo,” sabat naman sang isa pa.

Si Teariki nagsiling: “Tan-awon naton kon ano ang ginasiling sang Biblia. Basahon ta bala ang Isaias 42:5.” Sa tapos mabasa ang teksto, namangkot sia, “Sin-o ang ginaistoryahan sa sini nga teksto?”

Nagsabat ang isa sa ila, “ang Dios.” Dayon nagsiling si Teariki, “Huo, ang matuod nga Dios. Kon basahon naton ang bersikulo otso, ano ang ginasiling sang matuod nga Dios sa aton? ‘Ako si Jehova. Amo ina ang akon ngalan; indi ko pag-ihatag ang akon himaya sa iban.’ Ti, ano ang ngalan sang Dios?”

Nagsabat sila, “Jehova.”

 Bangod nakuha na ni Teariki ang atension sang grupo, namangkot sia: “Ngaa dapat naton gamiton ang ngalan sang Dios nga Jehova? Basahon ta ang Binuhatan 2:21 para mabal-an naton. ‘Kag ang tagsatagsa nga nagatawag sa ngalan ni Jehova maluwas.’ Ti, ngaa dapat naton gamiton ang ngalan sang Dios?”

Nagsabat ang isa sa ila, “Para maluwas kita.”

Sa sini nga tion, nagsulod liwat ang amay ni Teariki. Ginpamangkot niya dayon ang grupo: “Ti, ano sa banta n’yo? Makasarang na bala sa pagbantala ang amon mga bata? OK lang bala nga paupdon namon sila?” Nag-ugyon ang tanan sa grupo nga makasarang na ang mga bata kag nagakaigo lang nga makigbahin sila sa  pagbantala. Dayon nagsiling si Tueti, “Pareho ni Teariki, mapaambit n’yo man ang kamatuoran sa Biblia kon tun-an n’yo ang kaundan sini.”

Ang Maayong Balita Nakalab-ot sa Nabukid nga Minuro

Sang Nobiembre 2013, si Jean-Pierre, nga nagaboluntaryo sa remote translation office sa Port-Vila sa Vanuatu, nagpuli sa ila isla para magtambong sa sirkito nga asembleya. Paghugpa sang eroplano nga iya ginsakyan, ang grupo sang mga interesado halin sa nabagatnan nga bahin sang isla nagpalapit sa iya kag nangayo sing literatura sa Biblia. Halos maubos ang mga magasin nga dala niya. Dayon nagpalapit ang isa ka lider sang relihion kag nangayo man sing literatura. Ginsilingan niya si Jean-Pierre nga magkadto sa iya minuro: “Gutom kami sa espirituwal. Dapat magkadto ka sa amon minuro para masabat ang amon tanan nga pamangkot.” Pagkatapos sang asembleya, aga pa naglakat sing malawig si Jean-Pierre pakadto sa bukid. Sang ulihi, nakalab-ot sia sa putokputokan sang bukid diin nahamtang ang minuro. Sa tapos maabiabi sang mga pumuluyo, ginbinagbinag ni Jean-Pierre ang Kingdom News Num. 38 nga natig-uluhan “Mabuhi Pa Bala Liwat ang mga Patay?” Mga 30 ka tawo ang namati, kag ginpalig-on niya sila nga sundan sa ila Biblia. Naglawig ini sing halos pito ka oras. Gutom gid man sa espirituwal ang mga pumuluyo! Ang 70 anyos nga tigulang nga lalaki nagsiling, “Sa bilog ko nga kabuhi, subong lang ’ko naathagan parte sa mga patay!”

Sa minuro nagtulog si Jean-Pierre. Isa sila ka kuarto sang pastor. Pagbugtaw niya sang aga, nagabasa na ang pastor sang aton magasin. Ginpamangkot sia ni Jean-Pierre kon parte sa ano ang iya ginabasa, kag nagsabat sia nga parte sa Ginharian sang Dios. Nagaugyon sia nga ang Ginharian sang Dios wala sa tagipusuon sang mga  Fariseo, gani imposible gid nga ara sa tagipusuon sang tawo ang Ginharian sang Dios, pareho sang ginatudlo sang ila simbahan. (Luc. 17:21) Pagbalik ni Jean-Pierre sa Port-Vila, padayon niya nga ginaduaw liwat ang mga interesado sa minuro paagi sa telepono. Tatlo ka brother halin sa kaingod nga kongregasyon ang nagboluntaryo sa pagkadto sa minuro agod maghiwat sang Memoryal, kag 109 ang nagtambong!

Vanuatu