Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

2015 Tuigan nga Libro sang mga Saksi ni Jehova

 DOMINICAN REPUBLIC

Nakasapo sing Katuyuan sa Kabuhi

José Estévez

Nakasapo sing Katuyuan sa Kabuhi
  • NATAWO 1968

  • NABAWTISMUHAN 1989

  • MALIP-OT NGA BIOGRAPIYA Sang pamatan-on pa si José, gusto niya mangin maayo ang iya kabuhi, gani nagsaylo sia sa siudad. Natun-an niya didto ang kamatuoran kag sa sulod sang madamo nga tuig, makugi niya nga ginauna ang Ginharian sang Dios.

SANG 11 anyos si José, nagsaylo sia sa Santo Domingo. Ang iya obra amo ang pagtinlo sing sapatos kag pagbaligya sang shaved ice kag mga orange. Sang pamatan-on na sia, kilala sia nga mapisan. Pagligad sang pila ka tuig, ginpangabay sia sang iya magulang nga lalaki nga isa ka Saksi ni Jehova nga magbantay sang iya balay. Nakita ni José sa lamesa ang libro nga Mahimu Ka Mabuhi sing Dayon sa Paraiso sa Duta, kag ginpulawan niya ini sa pagbasa. Narealisar niya nga nasapwan niya ang butang nga makahatag sing katuyuan sa iya kabuhi.

Pagkasunod nga semana, nagkadto si José sa pinakamalapit nga Kingdom Hall kag nagpakilala sia nga Saksi ni Jehova. Ginsilingan niya ang mga kauturan nga natun-an niya nga dapat sia magtambong sa mga miting kag magbantala sing maayong balita. Ginsambit man niya sa ila nga nabasa niya ang libro nga Mabuhi sing Dayon, kag natun-an niya ang mga butang nga dapat likawan sang mga Cristiano, kag ginpasalig  niya sila nga wala niya ginahimo ina nga mga butang. Pagligad lang sang 15 ka adlaw, nangin kalipikado si José nga manugbantala. Kag pagligad sang anom ka bulan, nabawtismuhan sia sa edad nga 21 anyos.

Bangod ang iskedyul sang obra ni José nagaupang sa iya sa pagtambong sa mga miting, naghalin sia sa iya obra kag mas ginpili ang obra nga ang sueldo 25 porsiento lang sang ginakita niya sang una. Pero makatambong na sia sa mga miting kag makaregular payunir. Apang sang ulihi, sang may asawa na sia kag duha ka bata, nag-untat sia sa pagpayunir.

Determinado gid si José nga tudluan ang iya mga bata sing kamatuoran halin sa pagkalapsag. Gani sang tatlo pa lang ka bulan nga ginabusong sang iya asawa nga si Josefina ang ila kamagulangan nga bata nga si Noé, ginabasahan sia sing matunog ni José sang Ang Akon Libro sang mga Sugilanon sa Biblia, nga nagalaum nga mabatian ini sang lapsag sa tiyan sang iya iloy. Sang nabun-ag na si Noé, nabasa na sa iya ni José ang bilog nga libro. Amo man sini ang iya ginhimo sa ila ikaduha nga bata nga si Neftalí.

Sang ulihi, nangin manedyer si José sang isa ka kompanya kag ang iya sueldo pulo ka pilo sangsa ginabaton niya sa iya obra sadto. Pero sang 2008, sang 10 kag 13 anyos na ang iya mga bata, nag-untat sia sa pagka-manedyer kag nagregular payunir liwat. Sa sini nga tion, upod na ang iya asawa kag kabataan. Bangod naggamay ang iya sueldo, nagakooperar ang tanan sa pamilya agod makakinot sila. Kon tingubon, 30 ka pagtuon sa Biblia ang ginahiwat nila nga apat kada bulan. Si Jesus nagpasalig sa aton nga kon unahon naton ang Ginharian, pakamaayuhon kita ni Jehova. (Mat. 6:33) Nagasalig sa sini nga saad si José kag ang iya pamilya kag naeksperiensiahan gid nila nga si Jehova nagatuman sang iya mga saad.