Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2015 Tuigan nga Libro sang mga Saksi ni Jehova

 DOMINICAN REPUBLIC

Nahilway, Dayon Gindumilian Liwat

Nahilway, Dayon Gindumilian Liwat

Wala Ginapaabot nga Kahilwayan

Si Manuel Hierrezuelo ginpatay samtang ginainterogar sang awtoridad

Sa sulod sang pila ka tuig nga pagdumili, sanday Lennart kag Virginia Johnson kag sanday Roy kag Juanita Brandt nagpabilin sa ila asaynment. “Ginpatawag ako kag si Roy Brandt para interogahon sang awtoridad,” siling ni Lennart. “Antes sini, ginpatawag na sang mga opisyal ni Trujillo si Brother Manuel Hierrezuelo.” Ginpatay si Manuel samtang ginainterogar sia, pero nahuptan niya ang iya integridad. Ano naman ang natabo kanday Lennart kag Roy? Si Lennart nagpadayon: “Pag-abot namon, gin-interogar kami isaisa, kag ginrekord nila ang amon mga sabat. Pagkatapos sini, wala na sing mga paghingabot nga natabo, kag pagligad sang duha ka bulan, ginpahibalo sa mga pamantalaan nga ginkuha na sang panguluhan ni Trujillo ang pagdumili sa mga Saksi ni Jehova kag makapadayon na kami sa amon hilikuton.”

Antes sang pagdumili sang 1950, may 261 ka manugbantala sa Dominican Republic. Sang ginkuha ang pagdumili sang Agosto 1956, may 522 na ka manugbantala sing maayong balita. Nalipay gid ang mga kauturan nga hilway na sila sa pagministeryo pagkatapos sang anom ka tuig nga pagbilanggo, pagdumili, kag pagbantay sang mga awtoridad.

Ano ang ginhimo sang katawhan ni Jehova sa wala ginapaabot nga pagbag-o? Gilayon nga gin-organisar nila liwat ang hilikuton! Nangita sila sang mga lugar nga tipunan sang mga kongregasyon kag naghimo sing bag-o nga mga mapa sang teritoryo kag file sang kongregasyon. Nalipay ang mga kauturan nga makaorder na sila kag makabaton sang mga literatura. Gingamit nila sing maayo ang ila natigayon nga bag-o nga kahilwayan sa pagbantala. Subong resulta, sa sulod lang sang tatlo ka bulan, pagka-Nobiembre 1956, may 612 na ka manugbantala.

 Ginpakalain sang mga Klero

Ang memorandum ni Toledano nga nagarekomendar nga indi pagtugutan nga makasulod sa pungsod ang aton mga publikasyon

Ang mga klero sang Katoliko naghimo gilayon sing mga pahito para pakalainon ang mga Saksi. Paagi sa kasugtanan nga ginpirmahan ni Trujillo sa Vatican, ginpabaskog pa gid sang mga klero ang ila panikasog para impluwensiahan ang gobierno nga dulaon ang mga Saksi. Ang Katoliko nga pari nga si Oscar Robles Toledano nagpadala sing memorandum sa State Secretary of the Interior, nga si Virgilio Álvarez Pina, nga nagapangabay sa gobierno nga suportahan ang iya panikasog nga “iparealisar sa mga taga-Dominican Republic nga makatalagam ang sekta nga ‘mga Saksi ni Jehova’.”

Ginpaathag ni Toledano nga ang iya panguna nga katuyuan amo nga “paslawon ang pagpangumbertir sang mga Saksi ni Jehova.” Ginarekomendar man sa memorandum ni Toledano nga indi pagtugutan nga makasulod sa pungsod ang aton mga publikasyon, “ilabi na ang libro  nga ‘The Truth Shall Make You Free’ kag ang magasin nga Lalantawan.”

Gindumilian Liwat

Ang mga lider sang relihion kag ang ila mga kakunsabo sa gobierno ni Trujillo nag-entra sa plano nga hingabuton ang mga Saksi. Si Francisco Prats-Ramírez, presidente sang Dominican Party, nagsulat sang memorandum kay Trujillo sang Hunyo 1957, nga nagasiling: “Nagaplano ako nga maghiwat sing mga miting para punggan ang makahalalit kag kontra sa pungsod nga hilikuton sang mga Saksi ni Jehova.”

Ini nga pagpakalain may epekto gilayon. Ang libro nga Trujillo—Little Caesar of the Caribbean nagsiling: “Sang tig-ilinit sang 1957, ang mga pamantalaan sang Dominican Republic nag-imprinta sing sunodsunod nga akusasyon sang mataas nga mga opisyal sang Gobierno nga nagasumbong parte sa ‘rebelyuso kag makahalalit’ nga hilikuton sang mga Saksi ni Jehova. Nagsugod ini sang ang Jesuita nga pari nga si Mariano Vásquez Sanz nagpakalain sa sekta paagi sa estasyon sang radyo ni Trujillo nga La Voz Dominicana [ang Tingog sang Dominican Republic]. Nagsiling man sia nga mga Komunista sila kag gintawag niya ang ila mga sumulunod nga ‘rebelyuso, kriminal, kag traidor nga mga kaaway.’ Dayon may isa ka sulat nga ginpirmahan sang mga arsobispo nga sanday Ricardo Pittini kag Octavio Antonio Beras nga nagapangabay sa mga pari nga amligan ang ila mga miembro sa sining ‘malaut nga mga erehes.’”

Nagmadinalag-on ang Simbahan kag Estado sa ila katuyuan. Sang Hulyo, ang Kongreso sang Dominican Republic nagpasar sing kasuguan nga nagadumili sa mga Saksi ni Jehova. Wala madugay, nakaeksperiensia ang aton mga kauturan sing pagpanakit kag kapintas sang mga pulis. Sa kabilugan, mga 150 ka utod ang gin-aresto.